ਖਬਰਿਸਤਾਨ ਨੈੱਟਵਰਕ– ਲੁਧਿਆਣਾ ਵਿੱਚ ਪੰਜਵੀਂ ਜਮਾਤ ਦਾ ਵਿਦਿਆਰਥੀ ਪੈਰ ਫਿਸਲਣ ਕਾਰਣ ਅਚਾਨਕ ਗੰਦੇ ਨਾਲੇ ਵਿਚ ਡਿੱਗ ਗਿਆ, ਜਿਸ ਤੋਂ ਬਾਅਦ ਤੇਜ਼ ਵਹਾਅ ਕਾਰਣ ਉਹ ਗੰਦੇ ਨਾਲੇ ਵਿਚ ਰੁੜ੍ਹ ਗਿਆ। ਇਹ ਮਾਮਲਾ ਕੁੰਦਨ ਪੁਰੀ ਇਲਾਕੇ ਤੋਂ ਸਾਹਮਣੇ ਆਇਆ, ਜਿਥੇ ਬੀਤੇ ਦਿਨੀਂ 10 ਸਾਲਾ ਬੱਚਾ ਗੰਦੇ ਨਾਲੇ ਵਿੱਚ ਵਹਿ ਗਿਆ। ਆਸ਼ਿਕ ਅੰਸਾਰੀ 5ਵੀਂ ਜਮਾਤ ਦਾ ਵਿਦਿਆਰਥੀ ਸੀ।
ਦੇਰ ਰਾਤ ਬੱਚੇ ਦੀ ਮਿਲੀ ਲਾਸ਼
ਦੇਰ ਰਾਤ ਲਗਭਗ 10:30 ਵਜੇ, ਬੱਚੇ ਦੀ ਲਾਸ਼ ਗੋਤਾਖੋਰਾਂ ਨੂੰ ਗੰਦੇ ਨਾਲੇ ਵਿੱਚੋਂ ਮਿਲੀ। ਲਾਸ਼ ਦੀ ਹਾਲਤ ਬਹੁਤ ਖਰਾਬ ਸੀ। ਬੱਚੇ ਦਾ ਨਾਂ ਆਸ਼ਿਕ ਅੰਸਾਰੀ ਦੱਸਿਆ ਜਾ ਰਿਹਾ ਹੈ। ਗੰਦਾ ਪਾਣੀ ਉਸ ਦੇ ਮੂੰਹ ਅਤੇ ਪੇਟ ਵਿੱਚ ਭਰ ਗਿਆ ਸੀ, ਜਿਸ ਕਾਰਨ ਉਸ ਦੀ ਦਮ ਘੁੱਟਣ ਕਾਰਨ ਮੌਤ ਹੋ ਗਈ।
ਪ੍ਰਸ਼ਾਸਨ ਨੇ ਨਾਲੇ ‘ਤੇ ਸੁਰੱਖਿਆ ਲਈ ਕੋਈ ਸਥਾਈ ਹੱਲ ਨਹੀਂ ਕੀਤਾ
ਪ੍ਰਸ਼ਾਸਨ ‘ਤੇ ਇਹ ਇੱਕ ਵੱਡਾ ਸਵਾਲ ਹੈ ਕਿ ਜੇਕਰ ਨਾਲੇ ਦੀ ਸਫਾਈ ਪਿਛਲੇ 3 ਮਹੀਨਿਆਂ ਤੋਂ ਕੀਤੀ ਜਾ ਰਹੀ ਹੈ, ਤਾਂ ਉੱਥੇ ਲੋਕਾਂ ਦੀ ਸੁਰੱਖਿਆ ਲਈ ਸਥਾਈ ਪ੍ਰਬੰਧ ਕਿਉਂ ਨਹੀਂ ਕੀਤੇ ਗਏ। ਬੱਚਾ ਪੁਲ ਪਾਰ ਕਰ ਰਿਹਾ ਸੀ ਕਿ ਅਚਾਨਕ ਉਸਦਾ ਪੈਰ ਗਾਰਡਰ ਤੋਂ ਫਿਸਲ ਗਿਆ, ਜਿਸ ਕਾਰਨ ਉਹ ਗੰਦੇ ਨਾਲੇ ਵਿੱਚ ਡਿੱਗ ਗਿਆ।
ਬੱਚੇ ਨੂੰ ਡੁੱਬਦਾ ਦੇਖ ਕੇ ਕਿਸੇ ਨੇ ਉਸ ਦੀ ਮਦਦ ਨਹੀਂ ਕੀਤੀ ਕਿਉਂਕਿ ਨਾਲੇ ‘ਤੇ ਅਜਿਹੀ ਕੋਈ ਸਹੂਲਤ ਨਹੀਂ ਸੀ ਕਿ ਲੋਕ ਬੱਚੇ ਦੀ ਮਦਦ ਕਰ ਸਕਣ ਅਤੇ ਨਾ ਹੀ ਨਾਲੇ ਦੇ ਨੇੜੇ ਕੋਈ ਅਧਿਕਾਰੀ ਜਾਂ ਗੋਤਾਖੋਰ ਸੀ, ਜੋ ਉਸ ਨੂੰ ਬਚਾ ਸਕੇ। ਰਾਜਨੀਤਿਕ ਆਗੂ ਵੀ ਦੇਰ ਰਾਤ ਗੰਦੇ ਨਾਲੇ ‘ਤੇ ਪਹੁੰਚ ਗਏ। ਫਿਲਹਾਲ ਆਸ਼ਿਕ ਅੰਸਾਰੀ ਦੀ ਲਾਸ਼ ਨੂੰ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਦੇ ਮੁਰਦਾਘਰ ਵਿੱਚ ਰੱਖਿਆ ਗਿਆ ਹੈ।
ਬੱਚੇ ਦੇ ਪਿਤਾ ਦਾ ਬਿਆਨ
ਬੱਚੇ ਦੇ ਪਿਤਾ ਮੁਹੰਮਦ ਰਫੀਕ ਅੰਸਾਰੀ ਨੇ ਕਿਹਾ ਕਿ ਆਸ਼ਿਕ ਅੰਸਾਰੀ ਉਸਦਾ ਪੁੱਤਰ ਹੈ। ਉਹ ਕਢਾਈ ਦਾ ਕੰਮ ਕਰਦਾ ਹੈ। ਉਸਦੇ 5 ਬੱਚੇ ਹਨ। ਪੂਰਾ ਪਰਿਵਾਰ ਕਿਰਾਏ ਦੇ ਘਰ ਵਿੱਚ ਰਹਿੰਦਾ ਹੈ। ਅੱਜ ਉਸ ਨੇ ਆਪਣੇ ਪੁੱਤਰ ਨੂੰ ਭੋਜਨ ਪੈਕਿੰਗ ਲਈ ਲਿਫਾਫੇ ਲੈਣ ਭੇਜਿਆ ਸੀ। ਪਤਾ ਲੱਗਾ ਹੈ ਕਿ ਉਸਦੇ ਕੋਲ 500 ਰੁਪਏ ਸਨ ਜੋ ਹੇਠਾਂ ਡਿੱਗ ਗਏ। ਉਹ ਪੈਸੇ ਦੀ ਭਾਲ ਕਰਦਾ ਹੋਇਆ ਨਾਲੇ ‘ਤੇ ਪਹੁੰਚਿਆ ਅਤੇ ਹੇਠਾਂ ਡਿੱਗ ਗਿਆ।
