ਖ਼ਬਰਿਸਤਾਨ ਨੈੱਟਵਰਕ: ਭਾਰਤੀ ਏਅਰਲਾਈਨਾਂ ਨੂੰ ਪਾਕਿਸਤਾਨੀ ਹਵਾਈ ਖੇਤਰ ਬੰਦ ਹੋਣ ਕਾਰਨ ਕਰੋੜਾਂ ਦਾ ਨੁਕਸਾਨ ਹੋਵੇਗਾ | ਏਅਰ ਇੰਡੀਆ ਨੇ ਅੰਦਾਜ਼ਾ ਲਗਾਇਆ ਹੈ ਕਿ ਜੇਕਰ ਹਵਾਈ ਖੇਤਰ ਇੱਕ ਸਾਲ ਤੱਕ ਬੰਦ ਰਹਿੰਦਾ ਹੈ, ਤਾਂ ਉਸਨੂੰ 600 ਮਿਲੀਅਨ ਡਾਲਰ ਯਾਨੀ ਲਗਭਗ 5081 ਕਰੋੜ ਰੁਪਏ ਦਾ ਨੁਕਸਾਨ ਹੋਵੇਗਾ। ਪਾਕਿਸਤਾਨ ਨੇ 24 ਅਪ੍ਰੈਲ ਨੂੰ ਭਾਰਤੀ ਏਅਰਲਾਈਨਾਂ ਲਈ ਆਪਣਾ ਹਵਾਈ ਖੇਤਰ ਬੰਦ ਕਰ ਦਿੱਤਾ ਸੀ ਅਤੇ ਭਾਰਤ ਨੇ 30 ਅਪ੍ਰੈਲ ਨੂੰ ਪਾਕਿਸਤਾਨੀ ਜਹਾਜ਼ਾਂ ਲਈ ਆਪਣਾ ਹਵਾਈ ਖੇਤਰ ਬੰਦ ਕਰ ਦਿੱਤਾ ਸੀ।
ਪਾਕਿਸਤਾਨ ਦੀ ਆਰਥਿਕਤਾ ‘ਤੇ ਪਵੇਗਾ ਵੱਡਾ ਪ੍ਰਭਾਵ
ਹਵਾਈ ਖੇਤਰ ਬੰਦ ਕਰਨ ਨਾਲ ਪਾਕਿਸਤਾਨ ਦੀ ਆਰਥਿਕਤਾ ‘ਤੇ ਵੱਡਾ ਪ੍ਰਭਾਵ ਪਵੇਗਾ। ਪਾਕਿਸਤਾਨ ਨੂੰ ਥਾਈਲੈਂਡ, ਬੰਗਲਾਦੇਸ਼, ਮਿਆਂਮਾਰ ਅਤੇ ਸ਼੍ਰੀਲੰਕਾ ਸਮੇਤ ਦੱਖਣੀ ਏਸ਼ੀਆਈ ਦੇਸ਼ਾਂ ਤੱਕ ਪਹੁੰਚਣ ਲਈ ਬਹੁਤ ਲੰਬਾ ਰਸਤਾ ਅਪਣਾਉਣਾ ਪਵੇਗਾ। ਇਸ ਨਾਲ ਉੱਥੇ ਹਵਾਈ ਯਾਤਰਾ ਮਹਿੰਗੀ ਹੋ ਜਾਵੇਗੀ।
ਹਵਾਈ ਖੇਤਰ ਬੰਦ ਹੋਣ ਕਾਰਨ ਬਾਲਣ ਦੀ ਖਪਤ ਵਧਦੀ ਹੈ ਅਤੇ ਫਲਾਇੰਗ ਪੀਰੀਆਡ ਵੀ ਵਧ ਜਾਂਦੀ ਹੈ। ਇਸ ਕਾਰਨ, ਮੰਤਰਾਲਾ ਏਅਰਲਾਈਨਾਂ ਅਤੇ ਯਾਤਰੀਆਂ ਨਾਲ ਸਬੰਧਤ ਪਹਿਲੂਆਂ ਦਾ ਮੁਲਾਂਕਣ ਕਰ ਰਿਹਾ ਹੈ, ਜਿਸ ਵਿੱਚ ਹਵਾਈ ਕਿਰਾਏ ਵਿੱਚ ਵਾਧਾ ਵੀ ਸ਼ਾਮਲ ਹੈ। ਇਸ ਤੋਂ ਇਲਾਵਾ, ਏਅਰਲਾਈਨਾਂ ਉਡਾਣ ਦੀ ਲਾਗਤ ਘਟਾਉਣ ਲਈ ਵਿਕਲਪਿਕ ਉਡਾਣ ਰੂਟਾਂ ‘ਤੇ ਵੀ ਵਿਚਾਰ ਕਰ ਰਹੀਆਂ ਹਨ।
ਏਅਰਲਾਈਨਾਂ ਨੂੰ ਓਵਰਫਲਾਈਟ ਫੀਸ ਦਾ ਕਰਨਾ ਪੈਂਦਾ ਹੈ ਭੁਗਤਾਨ
ਦੱਸ ਦੇਈਏ ਕਿ ਕਿਸੇ ਵੀ ਦੇਸ਼ ਦੇ ਉੱਪਰ ਤੋਂ ਉਡਾਣ ਭਰਨ ਲਈ ਏਅਰਲਾਈਨਾਂ ‘ਓਵਰਫਲਾਈਟ ਫੀਸ’ ਨਾਂ ਦੀ ਡਿਊਟੀ ਦਾ ਭੁਗਤਾਨ ਕਰਦੀਆਂ ਹਨ। ਜਿਸ ਪ੍ਰਕਾਰ ਕਿਸੇ ਵੀ ਦੇਸ਼ ਨੂੰ ਆਪਣੀ ਜ਼ਮੀਨ ‘ਤੇ ਅਧਿਕਾਰ ਹੁੰਦਾ ਹੈ, ਉਸੇ ਤਰ੍ਹਾਂ ਉਸ ਦਾ ਆਪਣੇ ਹਵਾਈ ਖੇਤਰ ‘ਤੇ ਵੀ ਮਾਲਕਾਨਾ ਹੱਕ ਹੁੰਦਾ ਹੈ। ਜ਼ਿਆਦਾਤਰ ਦੇਸ਼ ਆਪਣੇ ਹਵਾਈ ਖੇਤਰ ਨੂੰ ਵਿਦੇਸ਼ੀ ਏਅਰਲਾਈਨਾਂ ਨੂੰ ‘ਕਿਰਾਏ’ ‘ਤੇ ਦਿੰਦੇ ਹਨ ਅਤੇ ਉਹ ਏਅਰਲਾਈਨਾਂ ਉਸ ਖੇਤਰ ਤੋਂ ਉਡਾਣ ਭਰ ਸਕਦੀਆਂ ਹਨ। ਕੁਝ ਦੇਸ਼ ਹਵਾਈ ਟਰੈਫਿਕ ਕੰਟਰੋਲ ਸੇਵਾਵਾਂ ਵੀ ਪ੍ਰਦਾਨ ਕਰਦੇ ਹਨ। ਫੀਸ ਦਾ ਕੁਝ ਹਿੱਸਾ ਇਨ੍ਹਾਂ ਸੇਵਾਵਾਂ ਲਈ ਵੀ ਹੈ।
ਹੋਰ ਦੇਸ਼ਾਂ ਦੀ ਤਰ੍ਹਾਂ ਏਅਰਲਾਈਨਾਂ ਤੋਂ ਪ੍ਰਾਪਤ ਇਹ ਹਵਾਈ ਕਿਰਾਏ ਪਾਕਿਸਤਾਨ ਲਈ ਆਮਦਨ ਦਾ ਇੱਕ ਸਰੋਤ ਹਨ। ਪਾਕਿਸਤਾਨ ਵਿਦੇਸ਼ੀ ਜਹਾਜ਼ਾਂ ਲਈ ਉਡਾਣ ਫੀਸ ਉਡਾਣ ਦੇ ਸਮੇਂ, ਉਨ੍ਹਾਂ ਦੇ ਵਜ਼ਨ ਅਤੇ ਤੈਅ ਕੀਤੀ ਗਈ ਦੂਰੀ (ਕਿਲੋਮੀਟਰ) ਦੇ ਆਧਾਰ ‘ਤੇ ਤੈਅ ਕਰਦਾ ਹੈ। ਕਦੇ-ਕਦੇ ਏਅਰਲਾਈਨਾਂ ਇਸ ਪ੍ਰਕਾਰ ਦੀ ਫੀਸ ਤੋਂ ਬਚਣ ਲਈ ਲੰਬੇ ਮਾਰਗ ਵੀ ਅਪਣਾਉਂਦੀਆਂ ਹਨ। ਪਰ ਕਿਸੇ ਹਵਾਈ ਖੇਤਰ ਤੋਂ ਬਚਣਾ ਇੰਨਾ ਆਸਾਨ ਨਹੀਂ ਹੈ, ਕਿਉਂਕਿ ਇਹ ਕਿਸੇ ਦੇਸ਼ ਦੇ ਆਕਾਰ ਤੋ ਵੀ ਵੱਡਾ ਹੋ ਸਕਦਾ ਹੈ।
