ਖਬਰਿਸਤਾਨ ਨੈੱਟਵਰਕ- ਰਾਜਧਾਨੀ ਦਿੱਲੀ ਦੇ ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਸੋਨੇ ਦੀ ਤਸਕਰੀ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਥੇ ਕਿ ਇਕ ਵਿਦੇਸ਼ੀ ਔਰਤ ਕੋਲੋਂ ਸੋਨੇ ਦੀ ਬਿਸਕੁਟ ਬਰਾਮਦ ਕੀਤੇ ਗਏ ਹਨ। ਦਿੱਲੀ ਕਸਟਮ ਅਧਿਕਾਰੀਆਂ ਨੇ ਸ਼ੁੱਕਰਵਾਰ ਨੂੰ ਫਲਾਈਟ ਨੰਬਰ 8M 620 ਰਾਹੀਂ ਯਾਂਗੂਨ (ਰੰਗੂਨ) ਤੋਂ ਆ ਰਹੀ ਇੱਕ ਮਹਿਲਾ ਯਾਤਰੀ ਨੂੰ ਰੋਕ ਲਿਆ, ਜਿਸ ਕੋਲੋਂ ਸੋਨੇ ਦੇ ਬਿਸਕੁਟ ਬਰਾਮਦ ਹੋਏ ਹਨ।
ਗ੍ਰੀਨ ਚੈਨਲ ਰਾਹੀਂ ਬਾਹਰ ਨਿਕਲਣ ਦੀ ਕਰ ਰਹੀ ਸੀ ਕੋਸ਼ਿਸ਼
ਏਅਰਪੋਰਟ ਅਧਿਕਾਰੀਆਂ ਨੇ ਦੱਸਿਆ ਕਿ ਮਹਿਲਾ ਯਾਤਰੀ ਗ੍ਰੀਨ ਚੈਨਲ ਰਾਹੀਂ ਬਾਹਰ ਨਿਕਲਣ ਦੀ ਕੋਸ਼ਿਸ਼ ਕਰ ਰਹੀ ਸੀ, ਜਦੋਂ ਉਸ ਨੂੰ ਰੋਕਿਆ ਗਿਆ। ਜਦਕਿ ਗ੍ਰੀਨ ਚੈਨਲ ਉਨ੍ਹਾਂ ਲਈ ਹੁੰਦਾ ਹੈ ਜਿਨ੍ਹਾਂ ਕੋਲ ਐਲਾਨ ਕਰਨ ਲਈ ਕੋਈ ਟੈਕਸਯੋਗ ਸਮਾਨ ਨਹੀਂ ਹੁੰਦਾ।
997.5 ਗ੍ਰਾਮ ਸੋਨਾ ਜ਼ਬਤ
ਜਦੋਂ ਉਕਤ ਵਿਦੇਸ਼ੀ ਔਰਤ ਦੀ ਤਲਾਸ਼ੀ ਲਈ ਗਈ ਤਾਂ ਅਧਿਕਾਰੀਆਂ ਨੇ ਮਹਿਲਾ ਯਾਤਰੀ ਦੇ ਅੰਡਰਗਾਰਮੈਂਟਸ ਵਿੱਚ ਲੁਕਾ ਕੇ ਰੱਖੇ ਗਏ 997.5 ਗ੍ਰਾਮ ਵਜ਼ਨ ਦੇ ਛੇ ਸੋਨੇ ਦੇ ਬਿਸਕੁਟ ਜ਼ਬਤ ਕੀਤੇ। ਬਰਾਮਦ ਕੀਤੇ ਗਏ ਇਸ ਸੋਨੇ ਨੂੰ ਕਸਟਮਜ਼ ਐਕਟ, 1962 ਦੀਆਂ ਧਾਰਾਵਾਂ ਤਹਿਤ ਜ਼ਬਤ ਕਰ ਲਿਆ ਗਿਆ ਹੈ।
ਤਸਕਰੀ ਦੇ ਮਾਮਲੇ ਵਧੇ
ਜ਼ਿਕਰਯੋਗ ਹੈ ਕਿ IGI ਏਅਰਪੋਰਟ ‘ਤੇ ਸੋਨੇ ਦੀ ਤਸਕਰੀ ਦੇ ਮਾਮਲੇ ਲਗਾਤਾਰ ਵੱਧ ਰਹੇ ਹਨ। ਹਾਲ ਹੀ ਦੇ ਮਹੀਨਿਆਂ ਵਿੱਚ ਕਸਟਮ ਅਧਿਕਾਰੀਆਂ ਨੇ ਕਈ ਹੈਰਾਨੀਜਨਕ ਘਟਨਾਵਾਂ ਦਾ ਪਰਦਾਫਾਸ਼ ਕੀਤਾ ਹੈ, ਜਿੱਥੇ ਤਸਕਰਾਂ ਨੇ ਸੋਨੇ ਨੂੰ ਦੇਸ਼ ਵਿੱਚ ਲਿਆਉਣ ਲਈ ਵਿਲੱਖਣ ਤਰੀਕੇ ਅਪਣਾਏ। ਖਜੂਰ, ਅਡਾਪਟਰ ਅਤੇ ਇੱਥੋਂ ਤੱਕ ਕਿ ਟਰਾਲੀ ਬੈਗਾਂ ਦੇ ਪਹੀਆਂ ਵਿੱਚ ਲੁਕਾ ਕੇ ਤਸਕਰੀ ਕਰਦੇ ਯਾਤਰੀਆਂ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
