ਇੱਕ ਵਾਰ ਫਿਰ ਫਲਾਈਟ ਨੂੰ ਬੰਬ ਨਾਲ ਉਡਾਉਣ ਦੀਆਂ ਧਮਕੀਆਂ ਮਿਲਣੀਆਂ ਸ਼ੁਰੂ ਹੋ ਗਈਆਂ ਹਨ। ਮੁੰਬਈ ਤੋਂ ਨਿਊਯਾਰਕ ਜਾ ਰਹੀ ਏਅਰ ਇੰਡੀਆ ਦੀ ਉਡਾਣ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲੀ ਹੈ। ਧਮਕੀ ਮਿਲਣ ਤੋਂ ਬਾਅਦ, ਪਾਇਲਟ ਨੇ ਆਪਣਾ ਰਸਤਾ ਬਦਲ ਲਿਆ ਅਤੇ ਉਡਾਣ ਨੂੰ ਵਾਪਸ ਮੁੰਬਈ ਲੈ ਆਇਆ। ਜਿਸ ਤੋਂ ਬਾਅਦ ਮਾਮਲੇ ਦੀ ਜਾਂਚ ਸ਼ੁਰੂ ਕੀਤੀ ਗਈ।
ਫਲਾਈਟ ‘ਚ 324 ਲੋਕ ਸਨ ਸਵਾਰ
ਏਅਰ ਇੰਡੀਆ ਦੀ ਫਲਾਇਟ ਨੇ ਸਵੇਰੇ 2 ਵਜੇ ਮੁੰਬਈ ਤੋਂ ਉਡਾਣ ਭਰੀ ਅਤੇ ਸਵੇਰੇ 10:30 ਵਜੇ ਵਾਪਸ ਆਈ। ਇਸ ਉਡਾਣ ਵਿੱਚ 303 ਯਾਤਰੀ ਅਤੇ 19 ਚਾਲਕ ਦਲ ਦੇ ਮੈਂਬਰ ਸਨ। ਏਅਰ ਇੰਡੀਆ ਦਾ ਕਹਿਣਾ ਹੈ ਕਿ ਸ਼ੁਰੂਆਤੀ ਜਾਂਚ ਵਿੱਚ ਅਜੇ ਤੱਕ ਕੁਝ ਵੀ ਸਾਹਮਣੇ ਨਹੀਂ ਆਇਆ ਹੈ ਅਤੇ ਇਹ ਸਿਰਫ਼ ਇੱਕ ਝੂਠੀ ਧਮਕੀ ਸੀ।
ਅਮਰੀਕਾ ਪਹੁੰਚਣ ਲਈ 15 ਘੰਟੇ ਲੱਗਦੇ
ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਮੁੰਬਈ ਦੇ ਛਤਰਪਤੀ ਸ਼ਿਵਾਜੀ ਮਹਾਰਾਜ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ ਨਿਊਯਾਰਕ ਦੇ ਜੌਨ ਐਫ ਕੈਨੇਡੀ ਹਵਾਈ ਅੱਡੇ ਤੱਕ ਯਾਤਰਾ ਕਰਨ ਵਿੱਚ ਲਗਭਗ 15 ਘੰਟੇ ਲੱਗਦੇ ਹਨ। ਏਅਰ ਇੰਡੀਆ ਦਾ ਕਹਿਣਾ ਹੈ ਕਿ ਫਲਾਇਟ ਹੁਣ ਕੱਲ੍ਹ ਸਵੇਰੇ 5 ਵਜੇ ਉਡਾਣ ਭਰੇਗੀ। ਯਾਤਰੀਆਂ ਨੂੰ ਆਰਾਮ ਕਰਨ ਲਈ ਜਗ੍ਹਾ, ਖਾਣਾ ਅਤੇ ਹੋਰ ਸਹੂਲਤਾਂ ਪ੍ਰਦਾਨ ਕੀਤੀਆਂ ਜਾ ਰਹੀਆਂ ਹਨ।
ਪ੍ਰੋਟੋਕੋਲ ਅਨੁਸਾਰ ਵਾਪਸ ਬੁਲਾਇਆ ਗਿਆ
ਏਅਰ ਇੰਡੀਆ ਨੇ ਕਿਹਾ ਕਿ 10 ਮਾਰਚ, 2025 ਨੂੰ ਮੁੰਬਈ ਤੋਂ ਨਿਊਯਾਰਕ ਜਾ ਰਹੀ AI-119 ਉਡਾਣ ਵਿੱਚ ਸੁਰੱਖਿਆ ਖਤਰੇ ਦਾ ਪਤਾ ਲੱਗਿਆ ਸੀ। ਪ੍ਰੋਟੋਕੋਲ ਦੇ ਅਨੁਸਾਰ, ਉਡਾਣ ਵਿੱਚ ਸਵਾਰ ਸਾਰਿਆਂ ਦੀ ਸੁਰੱਖਿਆ ਦੇ ਹਿੱਤ ਵਿੱਚ ਜਹਾਜ਼ ਨੂੰ ਮੁੰਬਈ ਵਾਪਸ ਬੁਲਾਇਆ ਗਿਆ। ਇਹ ਉਡਾਣ ਸਵੇਰੇ 10.25 ਵਜੇ ਮੁੰਬਈ ਵਿੱਚ ਸੁਰੱਖਿਅਤ ਉਤਰ ਗਈ। ਸੁਰੱਖਿਆ ਏਜੰਸੀਆਂ ਇਸ ਮਾਮਲੇ ਦੀ ਜਾਂਚ ਕਰ ਰਹੀਆਂ ਹਨ।
