ਚੰਡੀਗੜ੍ਹ–ਪੰਚਕੂਲਾ ਰੇਲਵੇ ਸਟੇਸ਼ਨ ‘ਤੇ ਅੱਜ ਇੱਕ ਵੱਡਾ ਹਾਦਸਾ ਹੋਣ ਤੋਂ ਬਚ ਗਿਆ, ਜਦੋਂ ਲੋਕੋ ਪਾਇਲਟ ਨੇ ਨਿਰਧਾਰਤ ਰਵਾਨਗੀ ਸਮੇਂ ਤੋਂ ਪਹਿਲਾਂ ਹੀ ਟ੍ਰੇਨ ਚਲਾ ਦਿੱਤੀ। ਇਸ ਦੌਰਾਨ ਟ੍ਰੇਨ ਵਿੱਚ ਚੜ੍ਹ ਰਹੇ ਕਈ ਯਾਤਰੀ ਸੰਤੁਲਨ ਗੁਆ ਕੇ ਪਲੇਟਫਾਰਮ ‘ਤੇ ਡਿੱਗ ਪਏ। ਇੱਕ ਯਾਤਰੀ ਟ੍ਰੇਨ ਅਤੇ ਪਲੇਟਫਾਰਮ ਦੇ ਵਿਚਕਾਰ ਫਸ ਗਿਆ, ਜਿਸਨੂੰ ਮੌਕੇ ‘ਤੇ ਮੌਜੂਦ ਲੋਕਾਂ ਨੇ ਖਿੱਚ ਕੇ ਸੁਰੱਖਿਅਤ ਬਾਹਰ ਕੱਢ ਲਿਆ।
ਇਹ ਘਟਨਾ ਕਾਲਕਾ–ਦਿੱਲੀ ਸ਼ਤਾਬਦੀ ਐਕਸਪ੍ਰੈਸ (ਟ੍ਰੇਨ ਨੰਬਰ 12006) ਨਾਲ ਸੰਬੰਧਿਤ ਹੈ। ਸ਼ਿਕਾਇਤਕਰਤਾ ਸੁਰਿੰਦਰ ਭਾਰਦਵਾਜ ਮੁਤਾਬਕ, ਸਵੇਰੇ ਲਗਭਗ 7 ਵਜੇ ਕਈ ਯਾਤਰੀ ਟ੍ਰੇਨ ਵਿੱਚ ਸਵਾਰ ਹੋ ਰਹੇ ਸਨ, ਤਾਂ ਅਚਾਨਕ ਲੋਕੋ ਪਾਇਲਟ ਨੇ ਟ੍ਰੇਨ ਅੱਗੇ ਵਧਾ ਦਿੱਤੀ। ਟ੍ਰੇਨ ਦੇ ਅਚਾਨਕ ਰੁਕਣ ਅਤੇ ਫਿਰ ਚੱਲਣ ਨਾਲ ਯਾਤਰੀਆਂ ਦਾ ਸੰਤੁਲਨ ਬਿਗੜ ਗਿਆ, ਜਿਸ ਕਾਰਨ ਔਰਤਾਂ ਅਤੇ ਬਜ਼ੁਰਗਾਂ ਸਮੇਤ ਕਈ ਲੋਕ ਹੇਠਾਂ ਡਿੱਗ ਪਏ।
ਇਸ ਹਾਦਸੇ ਦੌਰਾਨ ਇੱਕ ਵਿਅਕਤੀ ਨੂੰ ਬਚਾਉਣ ਲਈ ਉਸਦੀ ਧੀ ਟ੍ਰੇਨ ਤੋਂ ਛਾਲ ਮਾਰ ਗਈ, ਜਿਸ ਨਾਲ ਉਸਦੇ ਪੈਰ ਵਿੱਚ ਚੋਟ ਆਈ। ਇਸੇ ਤਰ੍ਹਾਂ ਸ਼ਿਕਾਇਤਕਰਤਾ ਦੀ ਧੀ ਸਵਾਸਤਿਕਾ ਵੀ ਡਿੱਗਣ ਕਾਰਨ ਜ਼ਖ਼ਮੀ ਹੋ ਗਈ। ਸੁਰਿੰਦਰ ਭਾਰਦਵਾਜ ਆਪਣੀ ਪਤਨੀ ਸੁਮਨ ਅਤੇ ਧੀ ਦੇ ਨਾਲ ਚੰਡੀਗੜ੍ਹ ਤੋਂ ਦਿੱਲੀ ਯਾਤਰਾ ਕਰ ਰਹੇ ਸਨ।
ਸ਼ਿਕਾਇਤ ਵਿੱਚ ਇਹ ਵੀ ਦੱਸਿਆ ਗਿਆ ਹੈ ਕਿ ਟ੍ਰੇਨ ਵਿੱਚ ਮੌਜੂਦ ਇੱਕ ਟੀਟੀਈ ਨੂੰ ਵੀ ਚੋਟਾਂ ਆਈਆਂ ਹਨ ਅਤੇ ਡਿੱਗਣ ਦੌਰਾਨ ਉਸਦਾ ਟੈਬਲੈਟ ਟੁੱਟ ਗਿਆ। ਘਟਨਾ ਤੋਂ ਬਾਅਦ ਲੋਕੋ ਪਾਇਲਟ ਨੇ ਟ੍ਰੇਨ ਰੋਕ ਦਿੱਤੀ।
ਮਾਮਲੇ ਦੀ ਇੱਕ ਵੀਡੀਓ ਵੀ ਸਾਹਮਣੇ ਆਈ ਹੈ, ਜਿਸ ਵਿੱਚ ਅਚਾਨਕ ਟ੍ਰੇਨ ਚੱਲਣ ਨਾਲ ਯਾਤਰੀਆਂ ਨੂੰ ਡਿੱਗਦੇ ਹੋਏ ਵੇਖਿਆ ਜਾ ਸਕਦਾ ਹੈ। ਵੀਡੀਓ ਦੇ ਆਧਾਰ ‘ਤੇ ਜੀ.ਆਰ.ਪੀ. ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਸੋਸ਼ਲ ਮੀਡੀਆ ‘ਤੇ ਸ਼ਿਕਾਇਤ ਸਾਹਮਣੇ ਆਉਣ ਤੋਂ ਬਾਅਦ ਪੁਲਿਸ ਨੇ ਸੰਗਿਆਨ ਲੈਂਦਿਆਂ ਲੋਕੋ ਪਾਇਲਟ ਵਿਰੁੱਧ ਕਤਲ ਦੀ ਕੋਸ਼ਿਸ਼ ਦੀਆਂ ਧਾਰਾਵਾਂ ਹੇਠ ਕੇਸ ਦਰਜ ਕਰ ਲਿਆ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪੂਰੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਵੀਡੀਓ ਤੇ ਚਸ਼ਮਦੀਦਾਂ ਦੇ ਬਿਆਨਾਂ ਦੇ ਆਧਾਰ ‘ਤੇ ਅੱਗੇ ਦੀ ਕਾਰਵਾਈ ਕੀਤੀ ਜਾਵੇਗੀ।
