ਖ਼ਬਰਿਸਤਾਨ ਨੈੱਟਵਰਕ: DGCA ਨੇ ਹਵਾਈ ਯਾਤਰੀਆਂ ਲਈ ਸਖਤ ਨਿਯਮ ਤੈਅ ਕੀਤੇ ਹਨ। ਹੁਣ ਫਲਾਈਟ ‘ਚ ਉਡਾਣ ਦੌਰਾਨ ਜਾਂ ਹਵਾਈ ਅੱਡੇ ‘ਤੇ ਚਾਲਕ ਦਲ ਨਾਲ ਦੁਰਵਿਵਹਾਰ ਕਰਨਾ, ਜਾਂ ਨਸ਼ੇ ਦੀ ਹਾਲਤ ਵਿੱਚ ਹੰਗਾਮਾ ਕਰਨਾ ਮਹਿੰਗਾ ਪੈ ਸਕਦਾ ਹੈ। ਏਅਰਲਾਈਨ ਉਸ ਵਿਅਕਤੀ ‘ਤੇ ਸਿੱਧੇ ਤੌਰ ‘ਤੇ 30 ਦਿਨ ਜਾਂ ਉਸ ਤੋਂ ਵੱਧ ਸਮੇਂ ਲਈ ਉਡਾਣ ਭਰਨ ‘ਤੇ ਪਾਬੰਦੀ (ਫਲਾਇੰਗ ਬੈਨ) ਲਗਾ ਸਕਦੀ ਹੈ। ਇਸ ਵਿੱਚ ਮਾਮਲੇ ਨੂੰ ਕਿਸੇ ਸੁਤੰਤਰ ਕਮੇਟੀ ਕੋਲ ਨਹੀਂ ਭੇਜਿਆ ਜਾਵੇਗਾ।
ਡਾਇਰੈਕਟੋਰੇਟ ਜਨਰਲ ਆਫ਼ ਸਿਵਲ ਏਵੀਏਸ਼ਨ (ਡੀਜੀਸੀਏ) ਨੇ ਨਵੇਂ ਨਿਯਮਾਂ ਦਾ ਖਰੜਾ ਜਾਰੀ ਕੀਤਾ ਹੈ। ਨਵੇਂ ਪ੍ਰਸਤਾਵ ਵਿੱਚ DGCA ਸਾਰੀਆਂ ਏਅਰਲਾਈਨਜ਼ ਨੂੰ ਯਾਤਰੀਆਂ ‘ਤੇ ਸਿੱਧੀ ਕਾਰਵਾਈ ਕਰਨ ਦੀ ਤਾਕਤ ਦੇ ਰਿਹਾ ਹੈ। DGCA ਨੇ ਆਪਣੇ ਬਦਲੇ ਹੋਏ ਨਿਯਮਾਂ ਵਿੱਚ ‘ਜ਼ੀਰੋ ਟਾਲਰੈਂਸ ਪਾਲਿਸੀ’ ਅਪਣਾਈ ਹੈ। ਡਰਾਫਟ ਵਿੱਚ ਕਿਹਾ ਗਿਆ ਹੈ ਕਿ ਨਵੇਂ ਨਿਯਮਾਂ ਦਾ ਮਕਸਦ ਜਹਾਜ਼, ਲੋਕਾਂ ਅਤੇ ਜਾਇਦਾਦ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਉਣਾ ਹੈ, ਨਾਲ ਹੀ ਜਹਾਜ਼ ਦੇ ਅੰਦਰ ਅਨੁਸ਼ਾਸਨ ਬਣਾਈ ਰੱਖਣਾ ਹੈ।
ਮੌਜੂਦਾ ਨਿਯਮਾਂ ਮੁਤਾਬਕ, ਫਲਾਈਟ ਵਿੱਚ ਹੰਗਾਮਾ ਕਰਨ ਵਾਲੇ ਯਾਤਰੀਆਂ ਦੀ ਸ਼ਿਕਾਇਤ ਸਾਹਮਣੇ ਆਉਣ ‘ਤੇ ਪਹਿਲਾਂ ਇੱਕ ਜਾਂਚ ਕਮੇਟੀ ਬਣਾਈ ਜਾਂਦੀ ਸੀ। ਇਸ ਦੌਰਾਨ ਏਅਰਲਾਈਨਜ਼ ਨੂੰ ਯਾਤਰੀਆਂ ‘ਤੇ 45 ਦਿਨਾਂ ਤੱਕ ਪਾਬੰਦੀ ਲਗਾਉਣ ਦੀ ਇਜਾਜ਼ਤ ਮਿਲਦੀ ਸੀ। ਪਰ ਨਵੇਂ ਨਿਯਮਾਂ ਵਿੱਚ ਹੁਣ ਜਾਂਚ ਕਮੇਟੀ ਦੀ ਲੋੜ ਨਹੀਂ ਹੋਵੇਗੀ।
ਇਹਨਾਂ ਗਲਤੀਆਂ ‘ਤੇ ਹੋਵੇਗੀ ਕਾਰਵਾਈ
ਏਜੰਸੀ ਨੇ ਸੁਝਾਅ ਦਿੱਤਾ ਹੈ ਕਿ ਏਅਰਲਾਈਨ ਜਹਾਜ਼ ਦੇ ਅੰਦਰ ਸਮੋਕਿੰਗ ਕਰਨ, ਘਰੇਲੂ ਉਡਾਣਾਂਵਿੱਚ ਸ਼ਰਾਬ ਪੀਣ, ਐਮਰਜੈਂਸੀ ਐਗਜ਼ਿਟ ਦੀ ਗਲਤ ਵਰਤੋਂ ਕਰਨ, ਲਾਈਫ ਜੈਕੇਟ ਵਰਗੇ ਜੀਵਨ-ਰੱਖਿਅਕ ਉਪਕਰਣਾਂ ਦੀ ਬਿਨਾਂ ਇਜਾਜ਼ਤ ਵਰਤੋਂ ਕਰਨ ਵਾਲਿਆਂ ਖਿਲਾਫ ਐਕਸ਼ਨ ਲੈ ਸਕਦੀ ਹੈ।
