ਖ਼ਬਰਿਸਤਾਨ ਨੈੱਟਵਰਕ: ਜਲੰਧਰ ‘ਚ ਮੇਅਰ ਵਿਨੀਤ ਧੀਰ ਨੇ ਅੱਜ ਵਿੱਚ ਕੂੜੇ ਦੇ ਨਾਂ ‘ਤੇ ਹੋ ਰਹੀ ਵੱਡੀ ਧਾਂਦਲੀ ਦਾ ਪਰਦਾਫਾਸ਼ ਕੀਤਾ ਹੈ। ਮੇਅਰ ਸਵੇਰੇ ਜਲਦੀ ਖੁਦ ਕੂੜੇ ਦੇ ਡੰਪ ‘ਤੇ ਪਹੁੰਚੇ ਅਤੇ ਉੱਥੇ ਕੂੜਾ ਭਰ ਰਹੇ ਇੱਕ ਟਿੱਪਰ ਨੂੰ ਰੋਕ ਕੇ ਖਾਲੀ ਕਰਵਾਇਆ। ਚੈੱਕ ਕਰਨ ‘ਤੇ ਪਤਾ ਲੱਗਾ ਕਿ ਠੇਕੇਦਾਰ ਨੇ ਕੂੜੇ ਦਾ ਵਜ਼ਨ ਵਧਾਉਣ ਲਈ ਉਸ ਵਿੱਚ ਮਕਾਨਾਂ ਦਾ ਭਾਰੀ ਮਲਬਾ ਅਤੇ ਇੱਟਾਂ-ਪੱਥਰ ਭਰੇ ਹੋਏ ਸਨ।
ਪਹਿਲਾਂ ਵੀ ਦੋ ਵਾਰ ਲੱਗ ਚੁੱਕਿਆ ਜੁਰਮਾਨਾ
ਮੇਅਰ ਨੇ ਇਸ ਧੋਖਾਧੜੀ ਨੂੰ ਲੈ ਕੇ ਠੇਕੇਦਾਰ ਸਤਪਾਲ ਨੂੰ ਵੀ ਫਿਟਕਾਰਿਆ। ਉਨ੍ਹਾਂ ਦੱਸਿਆ ਕਿ ਠੇਕੇਦਾਰ ਨਿਗਮ ਤੋਂ ਜ਼ਿਆਦਾ ਪੈਸੇ ਲੈਣ ਲਈ ਅਜਿਹਾ ਕਰ ਰਿਹਾ ਸੀ। ਮੇਅਰ ਵਿਨੀਤ ਧੀਰ ਨੇ ਦੱਸਿਆ ਕਿ ਕੂੜੇ ਦੀਆਂ ਗੱਡੀਆਂ ਨੂੰ ਤੋਲ ਕੇ ਉੱਥੋਂ ਕੱਢਿਆ ਜਾਂਦਾ ਸੀ, ਜਿਸ ਤੋਂ ਬਾਅਦ ਨਿਗਮ ਤੋਂ ਪੈਸੇ ਲਏ ਜਾਂਦੇ ਸਨ। ਠੇਕੇਦਾਰ ਨੇ ਕੂੜੇ ਦਾ ਵਜ਼ਨ ਵਧਾਉਣ ਲਈ ਵਿਚਕਾਰ ਇੱਟਾਂ-ਪੱਥਰਾਂ ਦਾ ਮਲਬਾ ਭਰਿਆ ਹੋਇਆ ਸੀ। ਇਸ ਠੇਕੇਦਾਰ ਨੂੰ ਪਹਿਲਾਂ ਵੀ ਦੋ ਵਾਰ 2-2 ਲੱਖ ਦਾ ਜੁਰਮਾਨਾ ਹੋ ਚੁੱਕਾ ਹੈ। ਹੁਣ ਮੇਅਰ ਨੇ ਨਿਗਮ ਕਮਿਸ਼ਨਰ ਨੂੰ ਠੇਕਾ ਰੱਦ ਕਰਨ ਅਤੇ ਠੇਕੇਦਾਰ ‘ਤੇ ਪੁਲਿਸ ਕੇਸ (FIR) ਦਰਜ ਕਰਨ ਦੇ ਹੁਕਮ ਦਿੱਤੇ ਹਨ।
