ਖਬਰਿਸਤਾਨ ਨੈੱਟਵਰਕ- ਬਟਾਲਾ ਵਿੱਚ ਦੇਰ ਰਾਤ ਉਸ ਵੇਲੇ ਗੁੰਡਾਗਰਦੀ ਦਾ ਨੰਗਾ ਨਾਚ ਖੇਡਿਆ ਗਿਆ ਜਦੋਂ 2 ਲੋਕਾਂ ਨੂੰ ਸ਼ਰੇਆਮ ਗੋਲੀਆਂ ਮਾਰ ਕੇ ਭੁੰਨ ਸੁੱਟਿਆ। ਜਾਣਕਾਰੀ ਅਨੁਸਾਰ ਛੇ ਅਣਪਛਾਤੇ ਹਮਲਾਵਰਾਂ ਨੇ ਜੱਸਾ ਸਿੰਘ ਚੌਕ ਨੇੜੇ ਇੱਕ ਰੈਸਟੋਰੈਂਟ ਅਤੇ ਇੱਕ ਬੂਟ ਹਾਊਸ ‘ਤੇ ਅੰਨ੍ਹੇਵਾਹ ਗੋਲੀਆਂ ਚਲਾਈਆਂ। ਇਸ ਹਮਲੇ ਵਿੱਚ ਦੋ ਲੋਕਾਂ ਦੀ ਮੌਤ ਹੋ ਗਈ ਅਤੇ ਪੰਜ ਹੋਰ ਗੰਭੀਰ ਜ਼ਖਮੀ ਹੋ ਗਏ।
ਇਲਾਕੇ ਵਿੱਚ ਦਹਿਸ਼ਤ
ਰਿਪੋਰਟਾਂ ਅਨੁਸਾਰ, ਰਾਤ 8:15 ਵਜੇ ਦੇ ਕਰੀਬ, ਦੋ ਮੋਟਰਸਾਈਕਲਾਂ ‘ਤੇ ਸਵਾਰ ਛੇ ਨੌਜਵਾਨ ਚਾਂਦ ਖਾਨਾ ਖਜ਼ਾਨਾ ਰੈਸਟੋਰੈਂਟ ਅਤੇ ਨੇੜਲੇ ਚਾਂਦ ਬੂਟ ਹਾਊਸ ਦੇ ਬਾਹਰ ਰੁਕੇ ਅਤੇ ਅਚਾਨਕ ਗੋਲੀਆਂ ਚਲਾ ਦਿੱਤੀਆਂ। ਗੋਲੀਬਾਰੀ ਦੀ ਆਵਾਜ਼ ਸੁਣ ਕੇ ਇਲਾਕੇ ਵਿੱਚ ਦਹਿਸ਼ਤ ਫੈਲ ਗਈ। ਘਟਨਾ ਤੋਂ ਬਾਅਦ ਦੋਸ਼ੀ ਆਪਣੇ ਮੋਟਰਸਾਈਕਲਾਂ ‘ਤੇ ਫਰਾਰ ਹੋ ਗਏ।
ਵਾਰਦਾਤ ਵਿੱਚ ਮਾਰੇ ਗਏ ਲੋਕਾਂ ਦੀ ਪਛਾਣ ਕਨਵ ਮਹਾਜਨ ਅਤੇ ਸਰਵਜੀਤ ਸਿੰਘ ਵਜੋਂ ਹੋਈ ਹੈ। ਗੰਭੀਰ ਜ਼ਖਮੀਆਂ ਵਿੱਚ ਰੈਸਟੋਰੈਂਟ ਦੇ ਮਾਲਕ ਐਡਵੋਕੇਟ ਚੰਦਰ ਚੰਦਾ, ਸੁਰੱਖਿਆ ਗਾਰਡ ਸਰਬਜੀਤ ਸਿੰਘ (ਬੁੱਲੇਵਾਲ ਵਾਸੀ), ਅੰਮ੍ਰਿਤ ਪਾਲ (ਉਮਰਪੁਰਾ), ਅਮਨਦੀਪ, ਸੰਜੀਵ ਸੇਠ (ਖਜੂਰੀ ਗੇਟ), ਅਤੇ ਜੁਗਲ ਕਿਸ਼ੋਰ (ਪੁਰੀਆ ਮੁਹੱਲਾ) ਸ਼ਾਮਲ ਹਨ।
ਇਲਾਕਾ ਸੀਲ
ਇਸ ਬਾਰੇ ਸੂਚਨਾ ਮਿਲਣ ‘ਤੇ ਪੁਲਿਸ ਮੌਕੇ ‘ਤੇ ਪਹੁੰਚੀ ਤੇ ਪੂਰੇ ਇਲਾਕੇ ਨੂੰ ਸੀਲ ਕਰ ਦਿੱਤਾ ਅਤੇ ਮੁਲਜ਼ਮਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ। ਪੁਲਿਸ ਦਾ ਕਹਿਣਾ ਹੈ ਕਿ ਗੋਲੀਬਾਰੀ ਦੇ ਪਿੱਛੇ ਦੇ ਉਦੇਸ਼ ਦੀ ਜਾਂਚ ਜਾਰੀ ਹੈ।
