ਖ਼ਬਰਿਸਤਾਨ ਨੈੱਟਵਰਕ: ਪਾਕਿਸਤਾਨ ਜਾ ਕੇ ਵਿਆਹ ਕਰਵਾਉਣ ਵਾਲੀ ਸਰਬਜੀਤ ਕੌਰ ਦੇ ਪੰਜਾਬੀ ਪਤੀ ਨੇ ਹਾਈਕੋਰਟ ਦਾ ਰੁੱਖ ਕੀਤਾ ਹੈ। ਪਤੀ ਕਰਨੈਲ ਸਿੰਘ ਨੇ ਲਾਹੌਰ ਦੇ ਹਾਈਕੋਰਟ ‘ਚ ਪਟੀਸ਼ਨ ਦਾਇਰ ਕਰ ਸਰਬਜੀਤ ਨੂੰ ਭਾਰਤ ਵਾਪਸ ਭੇਜਣ ਦੀ ਮੰਗ ਕੀਤੀ ਹੈ। ਉਸ ਦਾ ਕਹਿਣਾ ਹੈ ਕਿ ਸਰਬਜੀਤ ਕੌਰ ਨੇ ਅਜੇ ਉਸ ਤੋਂ ਤਲਾਕ ਨਹੀਂ ਲਿਆ ਹੈ।
ਪਤੀ ਨੇ ਸਰਬਜੀਤ ਦੇ ਇਸਲਾਮ ਕਬੂਲ ਕਰਨ ਨੂੰ ਵੀ ਜ਼ਬਰਦਸਤੀ ਧਰਮ ਪਰਿਵਰਤਨ ਦੱਸਿਆ ਹੈ। ਉਸ ਨੇ ਦੋਸ਼ ਲਾਇਆ ਕਿ ਸਰਬਜੀਤ ਨੂੰ ਅਸ਼ਲੀਲ ਫੋਟੋਆਂ ਅਤੇ ਵੀਡੀਓਜ਼ ਰਾਹੀਂ ਬਲੈਕਮੇਲ ਕੀਤਾ ਗਿਆ ਅਤੇ ਇਸੇ ਬਲੈਕਮੇਲਿੰਗ ਰਾਹੀਂ ਦੁਬਈ ਤੋਂ ਉਸ ਕੋਲੋਂ ਪੈਸੇ ਵੀ ਮੰਗਵਾਏ ਗਏ। ਉਸ ਨੇ ਕਿਹਾ ਕਿ ਸਰਬਜੀਤ ਦੇ ਪਾਕਿਸਤਾਨੀ ਪਤੀ ਖਿਲਾਫ ਬਲਾਤਕਾਰ ਦਾ ਮਮਲ ਦਰਜ ਹੋਣਾ ਚਾਹੀਦਾ ਹੈ । ਤਲਾਕ ਤੋਂ ਬਿਨ੍ਹਾਂ ਸਰਬਜੀਤ ਨਾਲ ਸਰੀਰਕ ਸੰਬੰਧ ਨੂੰ ਗੈਰ ਕਨੂੰਨੀ ਦੱਸਿਆ ਹੈ।
ਦੱਸ ਦੇਈਏ ਕਿ ਸਿੱਖ ਸ਼ਰਧਾਲੂਆਂ ਦੇ ਜਥੇ ਨਾਲ ਕਪੂਰਥਲਾ ਦੀ ਰਹਿਣ ਵਾਲੀ ਸਰਬਜੀਤ ਕੌਰ ਪਾਕਿਸਤਾਨ ਗਈ ਸੀ, ਜਿੱਥੇ ਉਹ ਅਚਾਨਕ ਲਾਪਤਾ ਹੋ ਗਈ। ਇਸ ਤੋਂ ਬਾਅਦ ਉਸ ਨੇ ਕਥਿਤ ਤੌਰ ‘ਤੇ ਧਰਮ ਪਰਿਵਰਤਨ ਕੀਤਾ ਅਤੇ ਆਪਣਾ ਨਾਂ ਬਦਲ ਕੇ ‘ਨੂਰ ਹੁਸੈਨ’ ਰੱਖ ਲਿਆ। ਫਿਰ ਉਸ ਨੇ ਨਾਸਿਰ ਹੁਸੈਨ ਨਾਲ ਨਿਕਾਹ ਕਰ ਲਿਆ। ਸਰਬਜੀਤ ਨੇ ਦਾਅਵਾ ਕੀਤਾ ਸੀ ਕਿ ਉਹਨਾਂ ਵਿਚਕਾਰ 8 ਸਾਲਾਂ ਤੋਂ ਪ੍ਰੇਮ ਸਬੰਧ ਸਨ ਅਤੇ ਉਹ ਆਨਲਾਈਨ ਇੱਕ-ਦੂਜੇ ਨਾਲ ਸੰਪਰਕ ‘ਚ ਸਨ। ਉਸ ਨੇ ਕਿਹਾ ਸੀ ਕਿ ਉਹ ਆਪਣੀ ਮਰਜ਼ੀ ਨਾਲ ਪਾਕਿਸਤਾਨ ਆਈ ਹੈ ਅਤੇ ਨਾਸਿਰ ਨਾਲ ਨਿਕਾਹ ਕਰਕੇ ਖ਼ੁਸ਼ ਹੈ।
