ਖਬਰਿਸਤਾਨ ਨੈੱਟਵਰਕ- ਦੱਖਣੀ ਮੈਕਸੀਕਨ ਰਾਜ ਓਆਕਸਾਕਾ ਵਿਚ ਇਕ ਵੱਡਾ ਰੇਲ ਹਾਦਸਾ ਵਾਪਰ ਗਿਆ। ਇਸ ਹਾਦਸੇ ਦੌਰਾਨ ਰੇਲਗੱਡੀ ਪਟੜੀ ਤੋਂ ਉਤਰ ਗਈ, ਜਿਸ ਕਾਰਨ ਰੇਲਗੱਡੀ ਦਾ ਇੰਜਣ ਪਲਟ ਗਿਆ ਤੇ ਨਾਲ ਹੀ ਕਈ ਡੱਬੇ ਵੀ ਪਟੜੀ ਤੋਂ ਲਹਿ ਗਏ।ਹਾਦਸੇ ਵਿਚ 13 ਲੋਕਾਂ ਦੀ ਮੌਤ ਹੋ ਗਈ ਅਤੇ 98 ਜ਼ਖਮੀ ਹੋ ਗਏ।
13 ਲੋਕਾਂ ਦੀ ਗਈ ਜਾਨ
ਮੀਡੀਆ ਰਿਪੋਰਟਾਂ ਮੁਤਾਬਕ ਰੇਲਗੱਡੀ ਮੈਕਸੀਕੋ ਦੀ ਖਾੜੀ ਅਤੇ ਪ੍ਰਸ਼ਾਂਤ ਮਹਾਸਾਗਰ ਨੂੰ ਜੋੜਨ ਵਾਲੀ ਇਕ ਨਵੀਂ ਰੇਲਵੇ ਲਾਈਨ ‘ਤੇ ਜਾ ਰਹੀ ਸੀ। ਇਹ ਰੇਲਵੇ ਲਾਈਨ ਮੈਕਸੀਕਨ ਜਲ ਸੈਨਾ ਦੁਆਰਾ ਚਲਾਈ ਜਾਂਦੀ ਹੈ। ਮੈਕਸੀਕਨ ਜਲ ਸੈਨਾ ਦੇ ਅਨੁਸਾਰ ਰੇਲਗੱਡੀ ਵਿਚ 250 ਲੋਕ ਸਵਾਰ ਸਨ, ਜਿਨ੍ਹਾਂ ਵਿਚ ਨੌਂ ਚਾਲਕ ਦਲ ਦੇ ਮੈਂਬਰ ਵੀ ਸ਼ਾਮਿਲ ਸਨ।
ਜ਼ਖਮੀਆਂ ਨੂੰ ਹਸਪਤਾਲ ਕਰਵਾਇਆ ਦਾਖਲ
ਇਹ ਹਾਦਸਾ ਚਿਵੇਲਾ ਅਤੇ ਨਿਜੰਡਾ ਕਸਬਿਆਂ ਦੇ ਵਿਚਕਾਰ ਇਕ ਮੋੜ ‘ਤੇ ਵਾਪਰਿਆ। ਜ਼ਖਮੀਆਂ ਵਿਚੋਂ ਕਈਆਂ ਦਾ ਹਸਪਤਾਲ ਵਿਚ ਇਲਾਜ ਚੱਲ ਰਿਹਾ ਹੈ। ਰਾਸ਼ਟਰਪਤੀ ਕਲਾਉਡੀਆ ਸ਼ੀਨਬੌਮ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਤੇ ਕਿਹਾ ਕਿ ਪੰਜ ਦੀ ਹਾਲਤ ਗੰਭੀਰ ਹੈ। ਉਨ੍ਹਾਂ ਨੇ ਮ੍ਰਿਤਕਾਂ ਦੇ ਪਰਿਵਾਰਾਂ ਦੀ ਸਹਾਇਤਾ ਲਈ ਸੀਨੀਅਰ ਅਧਿਕਾਰੀਆਂ ਨੂੰ ਘਟਨਾ ਸਥਾਨ ‘ਤੇ ਜਾਣ ਦੇ ਨਿਰਦੇਸ਼ ਦਿੱਤੇ ਹਨ।
