ਖ਼ਬਰਿਸਤਾਨ ਨੈੱਟਵਰਕ: ਖਰਾਬ ਮੌਸਮ ,ਭਿਆਨਕ ਬਰਫ਼ਬਾਰੀ ਅਤੇ ਤੇਜ਼ ਹਵਾਵਾਂ ਦਾ ਕਹਿਰ ਜਾਰੀ ਹੈ। ਬਰਫ਼ਬਾਰੀ ਕਾਰਨ ਅਮਰੀਕਾ ਦੇ ਉੱਤਰ-ਪੂਰਬੀ ਰਾਜਾਂ ਵਿੱਚ 6 ਲੱਖ ਤੋਂ ਵੱਧ ਘਰਾਂ ਦੀ ਬਿਜਲੀ ਗੁਲ ਹੋ ਗਈ। ਐਤਵਾਰ ਤੋਂ ਮੰਗਲਵਾਰ ਦਰਮਿਆਨ 11,055 ਤੋਂ ਵੱਧ ਉਡਾਣਾਂ ਰੱਦ ਕੀਤੀਆਂ ਗਈਆਂ। ਭਾਰੀ ਬਰਫ਼ਬਾਰੀ ਕਾਰਨ ਏਅਰਪੋਰਟਾਂ ਦੇ ਰਨਵੇਅ ਬੰਦ ਕਰਨੇ ਪਏ ਹਨ ਅਤੇ ਕਈ ਥਾਵਾਂ ‘ਤੇ ਉਡਾਣਾਂ ‘ਤੇ ਰੋਕ ਲਗਾ ਦਿੱਤੀ ਗਈ ਹੈ।
ਨੈਸ਼ਨਲ ਵੈਦਰ ਸਰਵਿਸ ਮੁਤਾਬਕ, ਰੋਡ ਆਈਲੈਂਡ ਅਤੇ ਮੈਸੇਚਿਊਸੇਟਸ ਦੇ ਕੁਝ ਹਿੱਸਿਆਂ ਵਿੱਚ ਲਗਭਗ 37 ਇੰਚ ਤੱਕ ਬਰਫ਼ ਪਈ। ਸਿਰਫ਼ ਸੋਮਵਾਰ ਨੂੰ ਹੀ ਲਗਭਗ 5,600 ਤੋਂ 5,700 ਉਡਾਣਾਂ ਕੈਂਸਲ ਹੋਈਆਂ, ਜੋ ਦੇਸ਼ ਭਰ ਦੀਆਂ ਉਡਾਣਾਂ ਦਾ ਲਗਭਗ 20% ਸੀ। ਇਹ ਜਾਣਕਾਰੀ ਫਲਾਈਟ ਟ੍ਰੈਕਿੰਗ ਕੰਪਨੀ ‘ਫਲਾਈਟਅਵੇਅਰ’ (FlightAware) ਨੇ ਦਿੱਤੀ ਹੈ।
ਬਰਫ਼ਬਾਰੀ ਕਾਰਨ ਉੱਤਰ-ਪੂਰਬੀ ਰਾਜਾਂ ਵਿੱਚ 6 ਲੱਖ ਤੋਂ ਵੱਧ ਘਰਾਂ ਦੀ ਬਿਜਲੀ ਗੁਲ ਹੋ ਗਈ। ਸੋਮਵਾਰ ਸ਼ਾਮ ਤੱਕ 5 ਲੱਖ 19 ਹਜ਼ਾਰ 232 ਘਰ ਅਤੇ ਦਫ਼ਤਰ ਬਿਨਾਂ ਬਿਜਲੀ ਦੇ ਸਨ। ਭਾਰੀ ਬਰਫ਼ਬਾਰੀ ਕਾਰਨ ‘ਦ ਬੋਸਟਨ ਗਲੋਬ’ (The Boston Globe) ਆਪਣੇ 153 ਸਾਲਾਂ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ ਅਖ਼ਬਾਰ ਨਹੀਂ ਛਾਪ ਸਕਿਆ ਕਿਉਂਕਿ ਮੁਲਾਜ਼ਮ ਪ੍ਰਿੰਟਿੰਗ ਪ੍ਰੈੱਸ ਤੱਕ ਨਹੀਂ ਪਹੁੰਚ ਸਕੇ।
