ਖਬਰਿਸਤਾਨ ਨੈੱਟਵਰਕ- ਜਲੰਧਰ ਵਿਚ ਲੁੱਟ-ਖੋਹ ਤੇ ਚੋਰੀ ਦੀਆਂ ਘਟਨਾਵਾਂ ਲਗਾਤਾਰ ਵੱਧ ਰਹੀਆਂ ਹਨ। ਤਾਜ਼ਾ ਮਾਮਲਾ ਬਾਂਸਾ ਵਾਲੇ ਬਾਜ਼ਾਰ ਤੋਂ ਸਾਹਮਣੇ ਆਇਆ ਹੈ, ਜਿਥੇ ਦਿਨ-ਦਿਹਾੜੇ ਚੋਰੀ ਦੀ ਇੱਕ ਸਨਸਨੀਖੇਜ਼ ਘਟਨਾ ਵਾਪਰੀ ਹੈ। ਜਦੋਂ ਇੱਕ ਪੰਡਤ ਨੇ ਚੋਰ ਨੂੰ ਐਕਟਿਵਾ ਚੋਰੀ ਕਰਨ ਤੋਂ ਰੋਕਣ ਦੀ ਕੋਸ਼ਿਸ਼ ਕੀਤੀ ਤਾਂ ਦੋਸ਼ੀ ਉਸ ਨੂੰ ਲਗਭਗ 100 ਮੀਟਰ ਤੱਕ ਘਸੀਟ ਕੇ ਲੈ ਗਿਆ। ਇਹ ਸਾਰੀ ਘਟਨਾ ਨੇੜੇ ਦੀਆਂ ਦੁਕਾਨਾਂ ਵਿੱਚ ਲੱਗੇ ਸੀਸੀਟੀਵੀ ਕੈਮਰਿਆਂ ਵਿੱਚ ਕੈਦ ਹੋ ਗਈ।
ਭੈਰੋਂ ਬਾਜ਼ਾਰ ਵਿੱਚ ਹਨੂੰਮਾਨ ਮੰਦਰ ਦੇ ਪੰਡਿਤ ਰਾਮ ਸੁਸ਼ੀਲ ਤਿਵਾੜੀ ਨੇ ਪੁਲਿਸ ਸਟੇਸ਼ਨ 4 ਵਿੱਚ ਸ਼ਿਕਾਇਤ ਦਰਜ ਕਰਵਾਈ ਹੈ। ਪੁਲਿਸ ਨੇ ਅਣਪਛਾਤੇ ਚੋਰ ਵਿਰੁੱਧ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਪੰਡਿਤ ਰਾਮ ਸੁਸ਼ੀਲ ਤਿਵਾੜੀ ਦੇ ਅਨੁਸਾਰ, ਉਹ ਦੁਪਹਿਰ ਸਮੇਂ ਆਪਣੇ ਜਾਣਕਾਰ ਦੀ ਐਕਟਿਵਾ ਲੈ ਕੇ ਪੂਜਾ ਦਾ ਸਮਾਨ ਖਰੀਦਣ ਲਈ ਬਾਜ਼ਾਰ ਗਿਆ ਸੀ। ਉਸ ਨੇ ਟੋਨੀ ਸਵੀਟਸ ਦੇ ਬਾਹਰ ਐਕਟਿਵਾ ਖੜ੍ਹੀ ਕੀਤੀ ਅਤੇ ਸਮਾਨ ਖਰੀਦਣ ਗਿਆ, ਪਰ ਚਾਬੀ ਐਕਟਿਵਾ ਵਿੱਚ ਲੱਗੀ ਰਹਿ ਗਈ। ਜਿਵੇਂ ਹੀ ਉਹ ਚਾਬੀ ਕੱਢਣ ਲਈ ਪਿੱਛੇ ਮੁੜਿਆ, ਇੱਕ ਨੌਜਵਾਨ ਐਕਟਿਵਾ ਸਟਾਰਟ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ।
ਮੁਲਜ਼ਮ ਐਕਟਿਵਾ ਲੈ ਕੇ ਫਰਾਰ
ਉਹ ਤੁਰੰਤ ਐਕਟਿਵਾ ਕੋਲ ਗਿਆ ਅਤੇ ਚੋਰ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ, ਪਰ ਦੋਸ਼ੀ ਐਕਟਿਵਾ ਲੈ ਕੇ ਭੱਜ ਗਿਆ। ਪੰਡਿਤ ਨੇ ਐਕਟਿਵਾ ਨੂੰ ਪਿੱਛੇ ਤੋਂ ਫੜ ਲਿਆ, ਪਰ ਰੋਕਣ ਦੀ ਬਜਾਏ, ਚੋਰ ਉਸ ਨੂੰ ਘਸੀਟ ਕੇ ਲੈ ਗਿਆ। ਇਹ ਘਟਨਾ ਸੀਸੀਟੀਵੀ ਵਿੱਚ ਰਿਕਾਰਡ ਹੋ ਗਈ। ਪੁਲਿਸ ਫੁਟੇਜ ਦੇ ਆਧਾਰ ‘ਤੇ ਦੋਸ਼ੀ ਦੀ ਪਛਾਣ ਕਰ ਰਹੀ ਹੈ ਅਤੇ ਉਸਦੀ ਭਾਲ ਕਰ ਰਹੀ ਹੈ।
