ਮੌਤ ਕਦੋਂ ਤੇ ਕਿਵੇਂ ਆਵੇਗੀ ਇਸ ਬਾਰੇ ਕੋਈ ਭਰੋਸਾ ਨਹੀਂ। ਪਿਉ-ਪੁੱਤ ਦੀ ਮੌਤ ਨੇ ਇਹ ਗੱਲ ਫਿਰ ਸਾਬਤ ਕਰ ਦਿੱਤੀ। ਕਾਰਨ ਬਣ ਗਿਆ ਉਸ ਦੀ ਪਾਲਤੂ ਬਿੱਲੀ। ਦੋਵਾਂ ਦੀ ਇੱਕ ਹਫਤੇ ਦੇ ਅੰਦਰ ਮੌਤ ਹੋ ਗਈ। ਮਾਮਲਾ ਕਾਨਪੁਰ ਦੇਹਾਤ ਦੇ ਅਕਬਰਪੁਰ ਦੇ ਅਸ਼ੋਕ ਨਗਰ ਦਾ ਹੈ। ਇਮਤਿਆਜ਼ ਉੱਦੀਨ (58) ਪ੍ਰਾਇਮਰੀ ਸਕੂਲ ਦਾ ਅਧਿਆਪਕ ਸੀ। ਉਸ ਨੇ ਘਰ ਵਿੱਚ ਇੱਕ ਬਿੱਲੀ ਪਾਲਤੂ ਬਿੱਲੀ ਰੱਖੀ ਹੋਈ ਸੀ।
ਮੀਡੀਆ ਰਿਪੋਰਟਾਂ ਮੁਤਾਬਕ ਬਿੱਲੀ ਨੂੰ ਕਰੀਬ ਦੋ ਮਹੀਨੇ ਪਹਿਲਾਂ ਇੱਕ ਆਵਾਰਾ ਕੁੱਤੇ ਨੇ ਵੱਢ ਲਿਆ ਸੀ। ਇਮਤਿਆਜ਼ ਉੱਦੀਨ ਨੇ ਉਸ ਦਾ ਇਲਾਜ ਕਰਵਾਇਆ ਸੀ। ਹਾਲ ਹੀ ਵਿੱਚ, ਬਿੱਲੀ ਰੇਬੀਜ਼ ਨਾਲ ਸੰਕਰਮਿਤ ਹੋਣ ਤੋਂ ਬਾਅਦ ਹਿੰਸਕ ਹੋ ਗਈ ਸੀ। ਬਿੱਲੀ ਨੇ ਇਮਤਿਆਜ਼ ਉੱਦੀਨ ਤੇ ਉਸ ਦੇ 25 ਸਾਲਾ ਬੇਟੇ ਅਜ਼ੀਮ ਨੂੰ ਵੱਢ ਲਿਆ ਤੇ ਕੁਝ ਦਿਨਾਂ ਬਾਅਦ ਬਿੱਲੀ ਦੀ ਮੌਤ ਹੋ ਗਈ। ਅਖਬਾਰ ਮੁਤਾਬਕ ਬਿੱਲੀ ਦੇ ਕੱਟਣ ਤੋਂ ਬਾਅਦ ਇਮਤਿਆਜ਼ ਅਤੇ ਅਜ਼ੀਮ ਨੇ ਐਂਟੀ-ਰੇਬੀਜ਼ ਵੈਕਸੀਨ ਨਹੀਂ ਲਗਵਾਈ, ਸਗੋਂ ਟੈਟਨਸ ਦਾ ਟੀਕਾ ਲਗਵਾ ਲਿਆ।
ਮੀਡੀਆ ਰਿਪੋਰਟਾਂ ਮੁਤਾਬਕ 25 ਨਵੰਬਰ ਨੂੰ ਅਜ਼ੀਮ ਭੋਪਾਲ ਗਿਆ ਸੀ, ਜਿੱਥੇ ਉਹ ਇੱਕ ਵਿਆਹ ਵਿੱਚ ਸ਼ਾਮਲ ਹੋਇਆ ਸੀ। ਅਚਾਨਕ ਉਸ ਦੀ ਸਿਹਤ ਵਿਗੜ ਗਈ। ਪਰਿਵਾਰ ਵਾਲੇ ਉਸ ਨੂੰ ਕਾਨਪੁਰ ਲੈ ਗਏ ਤੇ ਉਸਦਾ ਇਲਾਜ ਕਰਵਾਇਆ, ਜਿਸ ਦੌਰਾਨ ਅਜ਼ੀਮ ਦੀ ਮੌਤ ਹੋ ਗਈ।
29 ਨਵੰਬਰ ਦੀ ਦੇਰ ਰਾਤ ਇਮਤਿਆਜ਼ ਉੱਦੀਨ ਦੀ ਸਿਹਤ ਵੀ ਵਿਗੜ ਗਈ। ਪਰਿਵਾਰ ਵਾਲੇ ਉਸ ਨੂੰ ਪੀਜੀਆਈ ਸੈਫਈ ਲੈ ਗਏ। ਅਗਲੇ ਦਿਨ ਉਸ ਦੀ ਵੀ ਮੌਤ ਹੋ ਗਈ। ਹਾਲਾਂਕਿ, ਇਮਤਿਆਜ਼ ਉੱਦੀਨ ਦੀ ਪਤਨੀ ਨੇ ਇਸ ਗੱਲ ਤੋਂ ਇਨਕਾਰ ਕੀਤਾ ਹੈ ਕਿ ਉਸ ਦੇ ਪਤੀ ਨੂੰ ਰੇਬੀਜ਼ ਦੀ ਲਾਗ ਸੀ। ਉਸ ਨੇ ਮੌਤ ਦਾ ਕਾਰਨ ਦਿਲ ਦਾ ਦੌਰਾ ਦੱਸਿਆ। ਉਨ੍ਹਾਂ ਮੁਤਾਬਕ ਇਮਤਿਆਜ਼ ਬੀਪੀ ਅਤੇ ਸ਼ੂਗਰ ਤੋਂ ਵੀ ਪੀੜਤ ਸੀ। ਹਾਲਾਂਕਿ, ਆਲੇ-ਦੁਆਲੇ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਪਿਉ-ਪੁੱਤਰ ਦੋਵਾਂ ਵਿੱਚ ਰੇਬੀਜ਼ ਦੇ ਲੱਛਣ ਦਿਖਾਈ ਦੇਣ ਲੱਗੇ ਸਨ।