ਨੈਸ਼ਨਲ ਟੈਸਟਿੰਗ ਏਜੰਸੀ (ਐਨਟੀਏ) ਨੇ 1563 ਉਮੀਦਵਾਰਾਂ ਦੇ ਦੁਬਾਰਾ ਕਰਵਾਏ ਗਏ NEET UG ਪੇਪਰ (RE-NEET UG 2024) ਦਾ ਨਤੀਜਾ ਜਾਰੀ ਕੀਤਾ ਹੈ।ਦੱਸ ਦੇਈਏ ਕਿ ਪ੍ਰੀਖਿਆ ਵਿੱਚ ਸ਼ਾਮਲ ਹੋਏ ਵਿਦਿਆਰਥੀ ਅਧਿਕਾਰਤ ਵੈੱਬਸਾਈਟ exams.nta.ac.in/NEET/ 'ਤੇ ਜਾ ਕੇ ਆਪਣਾ ਨਤੀਜਾ ਦੇਖ ਸਕਦੇ ਹਨ। ਇਸ ਦੇ ਨਾਲ ਹੀ ਮੁੜ ਪ੍ਰੀਖਿਆ ਦੇ ਨਤੀਜੇ ਜਾਰੀ ਹੋਣ ਤੋਂ ਬਾਅਦ ਹੁਣ ਟਾਪਰਾਂ ਦੀ ਗਿਣਤੀ 67 ਤੋਂ ਘਟ ਕੇ 61 ਰਹਿ ਗਈ ਹੈ।
NTA ਨੇ ਪਹਿਲਾਂ NEET UG ਪ੍ਰੀਖਿਆ ਵਿੱਚ 1563 ਉਮੀਦਵਾਰਾਂ ਨੂੰ ਗ੍ਰੇਸ ਅੰਕ ਦਿੱਤੇ ਸਨ ਪਰ ਜਦੋਂ ਵਿਵਾਦ ਹੋਇਆ ਤਾਂ ਇਹ ਗਰੇਸ ਅੰਕ ਰੱਦ ਕਰਕੇ ਦੁਬਾਰਾ ਪੇਪਰ ਕਰਵਾਉਣ ਦਾ ਫੈਸਲਾ ਕੀਤਾ ਗਿਆ। ਦੁਬਾਰਾ ਕਰਵਾਈ ਗਈ NEET ਪ੍ਰੀਖਿਆ 'ਚ 1,563 ਵਿੱਚੋਂ 813 ਵਿਦਿਆਰਥੀ ਸ਼ਾਮਲ ਹੋਏ। ਦੇਸ਼ ਦੇ ਉਨ੍ਹਾਂ 6 ਕੇਂਦਰਾਂ 'ਤੇ ਦੁਬਾਰਾ ਪ੍ਰੀਖਿਆ ਲਈ ਗਈ, ਜਿੱਥੇ ਗ੍ਰੇਸ ਅੰਕ ਦਿੱਤੇ ਗਏ ਸਨ। ਇਸ ਤੋਂ ਪਹਿਲਾਂ, NEET UG ਮੁੜ ਪ੍ਰੀਖਿਆ ਦੀ ਅੰਤਿਮ ਉੱਤਰ ਕੁੰਜੀ 30 ਜੂਨ ਨੂੰ ਦੁਪਹਿਰ 1:30 ਵਜੇ ਜਾਰੀ ਕੀਤੀ ਗਈ ਸੀ।
6 ਸ਼ਹਿਰਾਂ ਵਿੱਚ ਮੁੜ ਹੋਈ ਸੀ ਪ੍ਰੀਖਿਆ
-ਬਾਲੋਦ, ਛੱਤੀਸਗੜ੍ਹ
-ਦੰਤੇਵਾੜਾ, ਛੱਤੀਸਗੜ੍ਹ
- ਸੂਰਤ, ਗੁਜਰਾਤ
-ਮੇਘਾਲਿਆ, ਮੇਘਾਲਿਆ
-ਬਹਾਦੁਰਗੜ੍ਹ, ਹਰਿਆਣਾ
-ਚੰਡੀਗੜ੍ਹ
750 ਉਮੀਦਵਾਰਾਂ ਨੇ ਪੇਪਰ ਨਹੀਂ ਦਿੱਤੇ
ਰਿਪੋਰਟ ਦੇ ਅਨੁਸਾਰ, NEET UG ਮੁੜ ਪ੍ਰੀਖਿਆ 'ਚ 750 ਉਮੀਦਵਾਰ ਸ਼ਾਮਲ ਨਹੀਂ ਹੋਏ। 1563 ਵਿੱਚੋਂ ਸਿਰਫ਼ 813 ਉਮੀਦਵਾਰ ਪ੍ਰੀਖਿਆ ਵਿੱਚ ਬੈਠੇ ਸਨ। ਚੰਡੀਗੜ੍ਹ ਵਿੱਚ 2 ਉਮੀਦਵਾਰਾਂ ਲਈ ਪ੍ਰੀਖਿਆ ਕੇਂਦਰ ਬਣਾਇਆ ਗਿਆ ਸੀ, ਜਿਨ੍ਹਾਂ ਵਿੱਚੋਂ ਕੋਈ ਵੀ ਪ੍ਰੀਖਿਆ ਦੇਣ ਲਈ ਨਹੀਂ ਆਇਆ। ਛੱਤੀਸਗੜ੍ਹ ਦੇ 602 ਉਮੀਦਵਾਰਾਂ ਵਿੱਚੋਂ 291, ਗੁਜਰਾਤ ਤੋਂ 1 ਉਮੀਦਵਾਰ, ਹਰਿਆਣਾ ਦੇ 494 ਉਮੀਦਵਾਰਾਂ ਵਿੱਚੋਂ 287 ਅਤੇ ਮੇਘਾਲਿਆ ਦੇ ਤੁਰਾ ਤੋਂ 234 ਉਮੀਦਵਾਰਾਂ ਨੇ ਪ੍ਰੀਖਿਆ ਦਿੱਤੀ।
ਗ੍ਰੇਸ ਮਾਰਕ 'ਤੇ ਜਤਾਇਆ ਸੀ ਇਤਰਾਜ਼
ਪਟੀਸ਼ਨਕਰਤਾਵਾਂ ਨੇ NEET ਪ੍ਰੀਖਿਆ ਵਿੱਚ 1563 ਉਮੀਦਵਾਰਾਂ ਨੂੰ ਦਿੱਤੇ ਗਏ ਗ੍ਰੇਸ ਅੰਕਾਂ 'ਤੇ ਇਤਰਾਜ਼ ਜਤਾਇਆ ਸੀ। NTA ਨੇ ਇਸ ਮਾਮਲੇ ਦੀ ਜਾਂਚ ਲਈ ਇੱਕ ਕਮੇਟੀ ਬਣਾਈ ਸੀ। ਇਸ ਕਮੇਟੀ ਦੀ ਮੀਟਿੰਗ 10, 11 ਅਤੇ 12 ਜੂਨ ਨੂੰ ਹੋਈ ਸੀ। ਕਮੇਟੀ ਨੇ ਸੁਝਾਅ ਦਿੱਤਾ ਸੀ ਕਿ ਗ੍ਰੇਸ ਅੰਕ ਪ੍ਰਾਪਤ ਕਰਨ ਵਾਲੇ 1563 ਉਮੀਦਵਾਰਾਂ ਦੇ ਸਕੋਰ ਕਾਰਡ ਰੱਦ ਕੀਤੇ ਜਾਣ ਅਤੇ ਉਨ੍ਹਾਂ ਦੀ ਦੁਬਾਰਾ ਪ੍ਰੀਖਿਆ ਕਰਵਾਈ ਜਾਵੇ। ਇਹਨਾਂ ਵਿਦਿਆਰਥੀਆਂ ਨੂੰ ਬਗੈਰ ਗ੍ਰੇਸ ਅੰਕਾਂ ਵਾਲੇ ਅਸਲ ਅੰਕਾਂ ਬਾਰੇ ਵੀ ਸੂਚਿਤ ਕੀਤਾ ਜਾਣਾ ਚਾਹੀਦਾ ਹੈ।
ਅਗਲੇ ਸਾਲ ਤੋਂ ਪ੍ਰੀਖਿਆ ਔਨਲਾਈਨ ਮੋਡ ਦੀ ਕਰ ਰਿਹਾ ਤਿਆਰੀ
NEET UG ਪੇਪਰ ਦੇ ਲੀਕ ਹੋਣ ਤੋਂ ਬਾਅਦ ਕਈ ਸਵਾਲ ਖੜ੍ਹੇ ਹੋ ਗਏ ਹਨ। ਇਸ ਮੁੱਦੇ ਨੂੰ ਲੈ ਕੇ ਉਮੀਦਵਾਰਾਂ ਨੇ ਸੜਕਾਂ 'ਤੇ ਪ੍ਰਦਰਸ਼ਨ ਕੀਤਾ ਅਤੇ ਇਸ ਦੀ ਗੂੰਜ ਸੰਸਦ ਦੇ ਗਲਿਆਰਿਆਂ 'ਚ ਵੀ ਸੁਣਾਈ ਦਿੱਤੀ। NEET UG ਪੇਪਰ ਲੀਕ ਨੂੰ ਲੈ ਕੇ ਵਧਦੇ ਵਿਵਾਦ ਦੇ ਵਿਚਕਾਰ ਸਰਕਾਰ ਇੱਕ ਵੱਡਾ ਕਦਮ ਚੁੱਕਣ ਜਾ ਰਹੀ ਹੈ।
ਰਿਪੋਰਟ ਦੇ ਅਨੁਸਾਰ, ਅਗਲੇ ਸਾਲ ਤੋਂ NEET UG ਦੀ ਪ੍ਰੀਖਿਆ ਨੂੰ ਆਨਲਾਈਨ ਮੋਡ ਵਿੱਚ ਕਰਵਾਉਣ 'ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ। ਇਹ ਜਾਣਿਆ ਜਾਂਦਾ ਹੈ ਕਿ ਹੁਣ ਤੱਕ NEET ਦੀ ਪ੍ਰੀਖਿਆ ਪੈੱਨ-ਅਤੇ-ਪੇਪਰ ਦੁਆਰਾ ਕਰਵਾਈ ਜਾਂਦੀ ਹੈ, ਜਿਸ ਵਿੱਚ MCQ ਕਿਸਮ ਦੇ ਪ੍ਰਸ਼ਨ ਪੁੱਛੇ ਜਾਂਦੇ ਹਨ ਪਰ, ਆਉਣ ਵਾਲੇ ਦਿਨਾਂ 'ਚ NEET UG ਲਈ, ਆਈਆਈਟੀ, ਜੇਈਈ ਮੇਨ ਜਾਂ ਜੇਈਈ ਐਡਵਾਂਸਡ ਵਰਗੀਆਂ ਕੰਪਿਊਟਰ ਆਧਾਰਿਤ ਪ੍ਰੀਖਿਆਵਾਂ ਨੂੰ ਵੀ ਅਪਣਾਇਆ ਜਾ ਸਕਦਾ ਹੈ।