ਖਬਰਿਸਤਾਨ ਨੈੱਟਵਰਕ- ਸਾਲ 2025 ਪੰਜਾਬੀ ਮਿਊਜ਼ਕ ਇੰਡਸਟਰੀ ਤੇ ਪੰਜਾਬੀ ਸਿਨੇਮਾ ਲਈ ਬਹੁਤ ਹੀ ਮਾੜਾ ਵਰ੍ਹਾ ਰਿਹਾ, ਇਸ ਸਾਲ ਬਹੁਤ ਸਾਰੇ ਮਸ਼ਹੂਰ ਕਲਾਕਾਰ ਅਤੇ ਵੱਡੀਆਂ ਹਸਤੀਆਂ ਇਸ ਫਾਨੀ ਸੰਸਾਰ ਨੂੰ ਅਲਵਿਦਾ ਆਖ ਗਈਆਂ, ਜਿਨ੍ਹਾਂ ਵਿਚ ਹਾਸਿਆਂ ਦੇ ਬਾਦਸ਼ਾਹ ਜਸਵਿੰਦਰ ਭੱਲਾ, ਨੌਜਵਾਨ ਦਿਲਾਂ ਦੀ ਧੜਕਨ, ਰਾਜਵੀਰ ਜਵੰਦਾ, ਮਿਊਜ਼ਿਕ ਇੰਡਸਟਰੀ ਦਾ ਧੜਕਦਾ ਦਿਲ, ਜਿਨ੍ਹਾਂ ਦੇ ਸੁਰ ਸਦੀਵੀ ਜਿਉਂਦੇ ਰਹਿਣਗੇ, ਜਨਾਬ ਚਰਨਜੀਤ ਅਹੁਜਾ ਸਾਬ, ਸੁਰਾਂ ਦੇ ਬਾਦਸ਼ਾਹ ਉਸਤਾਦ ਪੂਰਨ ਸ਼ਾਹ ਕੋਟੀ, ਜਿਨ੍ਹਾਂ ਨੇ ਅਨੇਕਾਂ ਗਾਇਕਾਂ ਨੂੰ ਸੰਗੀਤ ਦੀਆਂ ਬਰੀਕੀਆਂ ਸਿਖਾ ਕੇ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਨੂੰ ਫਨਕਾਰ ਦਿੱਤੇ।
ਇਸ ਤੋਂ ਇਲਾਵਾ ਪੰਜਾਬ ਦਾ ਮਸ਼ਹੂਰ ਗੀਤਕਾਰ, ਨਿੰਮਾ ਲੁਹਾਰਕਾ, ਜਿਸ ਦੇ ਲਿਖੇ ਗੀਤ ਅੱਜ ਵੀ ਲੋਕਾਂ ਵਿਚ ਮਕਬੂਲ ਹਨ। ਮਿਸ ਪੂਜਾ ਨਾਲ ‘ਪੇਪਰ ਜਾਂ ਪਿਆਰ ਗੀਤ’ ਤੋਂ ਚਰਚਾ ਵਿੱਚ ਆਏ ਪੰਜਾਬੀ ਗਾਇਕ ਹਰਮਨ ਸਿੱਧੂ ਦੀ ਵੀ ਇਸੇ ਸਾਲ ਇਕ ਸੜਕ ਹਾਦਸੇ ਵਿਚ ਮੌਤ ਹੋ ਗਈ।
ਪੰਜਾਬ ਦੇ ਮਸ਼ਹੂਰ ਬਾਡੀਬਿਲਡਰ ਘੁੰਮਣ ਨੇ ਵੀ ਆਖਿਆ ਅਲਵਿਦਾ
ਪੰਜਾਬੀ ਫਿਲਮ ਉਦਯੋਗ ਵਿੱਚ ਬਤੌਰ ਅਦਾਕਾਰ ਅਤੇ ਨਿਰਦੇਸ਼ਕ ਰਹੇ ਮਨੀ ਕੁਲਾਰ ਦੀ ਮੌਤ ਨੇ ਵੀ ਸਾਰਿਆਂ ਨੂੰ ਝੰਜੋੜ ਕੇ ਰੱਖ ਦਿੱਤਾ। ਇਸ ਤੋਂ ਇਲਾਵਾ ਬਾਡੀ ਬਿਲਡਿੰਗ ਦੀ ਦੁਨੀਆ ਵਿਚ ਜਲੰਧਰ ਤੇ ਪੰਜਾਬ ਦਾ ਨਾਂ ਚਮਕਾਉਣ ਵਾਲੇ ਵੈਜੀਟੇਰੀਅਨ ਬਾਡੀ ਬਿਲਡਰ ਵਰਿੰਦਰ ਸਿੰਘ ਘੁੰਮਣ ਤੇ ਬਜ਼ੁਰਗ ਮੈਰਾਥਨ ਦੌੜਾਕ ਫੌਜਾ ਸਿੰਘ ਵੀ ਇਸੇ ਵਰ੍ਹੇ ਦੁਨੀਆ ਨੂੰ ਅਲਵਿਦਾ ਆਖ ਗਏ।
ਧਰਮਿੰਦਰ ਸਿੰਘ ਦਿਓਲ ਦਾ ਦਿਹਾਂਤ
ਬਾਲੀਵੁੱਡ ਦੇ ਹੀ-ਮੈਨ ਦੇ ਤੌਰ ਉਤੇ ਜਾਣੇ ਜਾਂਦੇ ਪੰਜਾਬ ਦੇ ਪੁੱਤਰ ਧਰਮਿੰਦਰ ਸਿੰਘ ਦਿਓਲ ਵੀ ਇਸੇ ਸਾਲ ਦੁਨੀਆ ਤੋਂ ਚਲੇ ਗਏ। ਉਨ੍ਹਾਂ ਦੇ ਦਿਹਾਂਤ ਨਾਲ ਬਾਲੀਵੁੱਡ ਵਿਚ ਮਾਤਮ ਛਾ ਗਿਆ। ਕੁਲ ਮਿਲਾ ਕੇ ਸਾਲ 2025 ਪੰਜਾਬੀ ਇੰਡਸਟਰੀ ਨੂੰ ਡੂੰਘੇ ਜ਼ਖਮ ਦੇ ਗਿਆ।
