ਖ਼ਬਰਿਸਤਾਨ ਨੈੱਟਵਰਕ: ਯੂਰਪ ਦੀ ਸਭ ਤੋਂ ਵੱਡੀ ਏਅਰਲਾਈਨ ਲੁਫਥਾਂਸਾ ਨੇ 20 ਹਜ਼ਾਰ ਤੋਂ ਵੱਧ ਉਡਾਣਾਂ ਰੱਦ ਕਰਨ ਦਾ ਐਲਾਨ ਕੀਤਾ ਹੈ। ਜਰਮਨੀ ਦੀ ਇਸ ਏਅਰਲਾਈਨ ਕੰਪਨੀ ਨੇ ਇਹ ਫੈਸਲਾ ਜੈੱਟ ਫਿਊਲ (ਹਵਾਈ ਬਾਲਣ) ਦੀਆਂ ਕੀਮਤਾਂ ਵਿੱਚ ਹੋਏ ਭਾਰੀ ਵਾਧੇ ਅਤੇ ਲਗਾਤਾਰ ਹੋ ਰਹੇ ਨੁਕਸਾਨ ਦੇ ਮੱਦੇਨਜ਼ਰ ਲਿਆ ਹੈ। ਇਸ ਕਦਮ ਨਾਲ ਕੰਪਨੀ ਨੂੰ ਲਗਭਗ 40 ਹਜ਼ਾਰ ਟਨ ਫਿਊਲ ਦੀ ਬਚਤ ਹੋਵੇਗੀ।
ਕੰਪਨੀ ਨੇ ਮੰਗਲਵਾਰ ਨੂੰ 120 ਉਡਾਣਾਂ ਰੱਦ ਕੀਤੀਆਂ ਸਨ, ਜੋ ਮਈ ਦੇ ਅੰਤ ਤੱਕ ਲਾਗੂ ਰਹਿਣਗੀਆਂ। ਗਰਮੀਆਂ ਦੇ ਪੂਰੇ ਸੀਜ਼ਨ ਲਈ ਉਡਾਣਾਂ ਵਿੱਚ ਹੋਰ ਕਟੌਤੀ ਦਾ ਐਲਾਨ ਅਪ੍ਰੈਲ ਦੇ ਅੰਤ ਜਾਂ ਮਈ ਦੀ ਸ਼ੁਰੂਆਤ ਵਿੱਚ ਕੀਤਾ ਜਾ ਸਕਦਾ ਹੈ। ਲੁਫਥਾਂਸਾ ਨੇ ਆਪਣੀ ਰੀਜਨਲ ਯੂਨਿਟ ‘ਸਿਟੀਲਾਈਨ’ ਨੂੰ ਬੰਦ ਕਰਨ ਅਤੇ 27 ਪੁਰਾਣੇ ਜਹਾਜ਼ਾਂ (ਜੋ ਜ਼ਿਆਦਾ ਤੇਲ ਖਾਂਦੇ ਸਨ) ਨੂੰ ਸੇਵਾ ਤੋਂ ਬਾਹਰ ਕਰਨ ਦਾ ਫੈਸਲਾ ਕੀਤਾ ਹੈ।
ਲਾਗਤ ਘਟਾਉਣ ਲਈ ਕੰਪਨੀ 2030 ਤੱਕ 4000 ਪ੍ਰਬੰਧਕੀ ਨੌਕਰੀਆਂ ਖ਼ਤਮ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਕੰਪਨੀ ਛੋਟੀ ਦੂਰੀ ਦੀਆਂ ਉਡਾਣਾਂ ਨੂੰ ‘ਸਿਟੀ ਏਅਰਲਾਈਨਜ਼’ ਅਤੇ ‘ਡਿਸਕਵਰ’ ਵਰਗੀਆਂ ਇਕਾਈਆਂ ਨੂੰ ਸੌਂਪ ਰਹੀ ਹੈ, ਜਿੱਥੇ ਕਰਮਚਾਰੀਆਂ ਦਾ ਖਰਚਾ ਮੁੱਖ ਏਅਰਲਾਈਨ ਦੇ ਮੁਕਾਬਲੇ 40 ਫੀਸਦੀ ਤੱਕ ਘੱਟ ਹੈ।
