ਖ਼ਬਰਿਸਤਾਨ ਨੈੱਟਵਰਕ: ਅਮਰੀਕਾ ਨੇ H-1B ਵੀਜ਼ਾ ਦੇਣ ਦੀ ਪ੍ਰਕਿਰਿਆ ਵਿੱਚ ਇੱਕ ਅਹਿਮ ਬਦਲਾਅ ਕੀਤਾ ਹੈ। ਹੁਣ ਵੀਜ਼ਾ ਦੇਣ ਲਈ ਲਾਟਰੀ ਸਿਸਟਮ ਦੀ ਬਜਾਏ ਤਨਖ਼ਾਹ ਅਤੇ ਹੁਨਰ ਨੂੰ ਤਰਜੀਹ ਦਿੱਤੀ ਜਾਵੇਗੀ। ਇਸ ਨਵੇਂ ਨਿਯਮ ਦੇ ਲਾਗੂ ਹੋਣ ਨਾਲ ਵੱਧ ਤਨਖ਼ਾਹ ਵਾਲੇ ਪੇਸ਼ੇਵਰਾਂ ਲਈ ਅਮਰੀਕਾ ਜਾਣ ਦਾ ਰਾਹ ਸੌਖਾ ਹੋ ਜਾਵੇਗਾ।
ਵੀਜ਼ਾ ਦੀ ਚੋਣ ਹੁਣ ਸੈਲਰੀ ਦੇ ਆਧਾਰ ‘ਤੇ ਕੀਤੀ ਜਾਵੇਗੀ। ਜਿਸ ਦੀ ਸੈਲਰੀ ਜ਼ਿਆਦਾ ਹੋਵੇਗੀ, ਉਸ ਦੇ ਵੀਜ਼ਾ ਮਿਲਣ ਦੀ ਸੰਭਾਵਨਾ ਓਨੀ ਹੀ ਵੱਧ ਹੋਵੇਗੀ। 1 ਅਪ੍ਰੈਲ ਤੋਂ ਨਵਾਂ ਫਾਰਮ I-129 ਲਾਗੂ ਹੋ ਰਿਹਾ ਹੈ। ਸਾਰੀਆਂ ਕੰਪਨੀਆਂ ਨੂੰ ਹੁਣ ਇਸੇ ਫਾਰਮ ਰਾਹੀਂ ਅਰਜ਼ੀ ਦੇਣੀ ਪਵੇਗੀ। ਇਹ ਫੈਸਲਾ ਉੱਚ ਯੋਗਤਾ ਪ੍ਰਾਪਤ ਭਾਰਤੀ ਆਈ.ਟੀ. (IT) ਪੇਸ਼ੇਵਰਾਂ ਲਈ ਫਾਇਦੇਮੰਦ ਹੋ ਸਕਦਾ ਹੈ ਜਿਨ੍ਹਾਂ ਨੂੰ ਅਮਰੀਕੀ ਕੰਪਨੀਆਂ ਵੱਡੇ ਪੈਕੇਜ ਆਫਰ ਕਰਦੀਆਂ ਹਨ।
ਨਵੇਂ ਸਿਸਟਮ ਦੇ ਤਹਿਤ, ਅਰਜ਼ੀ ਦੇਣ ਵਾਲਿਆਂ ਨੂੰ ਉਨ੍ਹਾਂ ਦੀ ਤਨਖ਼ਾਹ ਦੇ ਹਿਸਾਬ ਨਾਲ ਚਾਰ ਵੱਖ-ਵੱਖ ਲੈਵਲ (Level) ਵਿੱਚ ਵੰਡਿਆ ਜਾਵੇਗਾ। ਇਸ ਦਾ ਸਿੱਧਾ ਅਸਰ ਤੁਹਾਡੀ ਚੋਣ ਹੋਣ ਦੀ ਸੰਭਾਵਨਾ ‘ਤੇ ਪਵੇਗਾ। ਲੈਵਲ-4 ਦੇ ਉਮੀਦਵਾਰਾਂ ਨੂੰ 4 ਮੌਕੇ ਮਿਲਣਗੇ। ਯਾਨੀ ਇਨ੍ਹਾਂ ਦੇ ਵੀਜ਼ਾ ਮਿਲਣ ਦੀ ਸੰਭਾਵਨਾ ਸਭ ਤੋਂ ਜ਼ਿਆਦਾ ਹੋਵੇਗੀ। ਲੈਵਲ-1 ਦੇ ਬਿਨੈਕਾਰਾਂ ਨੂੰ ਸਿਰਫ਼ 1 ਮੌਕਾ ਦਿੱਤਾ ਜਾਵੇਗਾ। ਲੈਵਲ-3 ਅਤੇ ਲੈਵਲ-2 ਦੇ ਉਮੀਦਵਾਰਾਂ ਨੂੰ ਉਨ੍ਹਾਂ ਦੀ ਤਨਖ਼ਾਹ ਦੇ ਕ੍ਰਮ ਅਨੁਸਾਰ ਹੀ ਮੌਕੇ ਦਿੱਤੇ ਜਾਣਗੇ। ਉਹ ਕੰਪਨੀਆਂ ਜੋ ਘੱਟ ਤਨਖ਼ਾਹ ‘ਤੇ ਕਰਮਚਾਰੀ ਬੁਲਾਉਂਦੀਆਂ ਸਨ, ਉਨ੍ਹਾਂ ਲਈ ਹੁਣ ਵੀਜ਼ਾ ਹਾਸਲ ਕਰਨਾ ਔਖਾ ਹੋ ਜਾਵੇਗਾ।
