ਦੇਸ਼ ਵਿੱਚ ਲਗਾਤਾਰ ਵੱਧ ਰਹੀ ਸਾਈਬਰ ਧੋਖਾਧੜੀ ਦੇ ਵੱਧਦਿਆਂ ਕੇਂਦਰ ਸਰਕਾਰ ਨੇ ਸੋਸ਼ਲ ਮੀਡੀਆ ਮੈਸੇਜਿੰਗ ਐਪਸ ਸੰਬੰਧੀ ਨਵੇਂ ਆਦੇਸ਼ ਜਾਰੀ ਕੀਤੇ ਹਨ। ਨਵੇਂ ਆਦੇਸ਼ਾਂ ਦੇ ਅਨੁਸਾਰ, WhatsApp, Telegram, Signal, Snapchat, ShareChat, JioChat, Arattai, ਅਤੇ Josh ਵਰਗੇ ਮੈਸੇਜਿੰਗ ਪਲੇਟਫਾਰਮ ਹੁਣ ਤੁਹਾਡੇ ਫੋਨ ‘ਤੇ ਬਿਨਾਂ ਕਿਸੇ ਐਕਟਿਵ ਸਿਮ ਕਾਰਡ ਦੇ ਵਰਤੇ ਨਹੀਂ ਜਾ ਸਕਣਗੇ। ਸਰਕਾਰ ਦਾ ਦਾਅਵਾ ਹੈ ਕਿ ਇਸ ਕਦਮ ਨਾਲ ਸਾਈਬਰ ਅਪਰਾਧ ਘੱਟ ਹੋਣਗੇ ਅਤੇ ਧੋਖਾਧੜੀ ਕਰਨ ਵਾਲਿਆਂ ਦਾ ਪਤਾ ਲਗਾਉਣ ਵਿੱਚ ਮਦਦ ਮਿਲੇਗੀ।
ਮੋਬਾਇਲ ‘ਤੇ ਐਕਟਿਵ ਸਿਮ ਕਾਰਡ ‘ਤੇ ਹੀ ਚੱਲਣਗੇ ਐਪਸ
ਦੂਰਸੰਚਾਰ ਮੰਤਰਾਲੇ ਦਾ ਕਹਿਣਾ ਹੈ ਕਿ ਮੈਸੇਜਿੰਗ ਪਲੇਟਫਾਰਮ ਇਹ ਯਕੀਨੀ ਬਣਾਉਣਗੇ ਕਿ ਐਪਸ ਸਿਰਫ਼ ਉਦੋਂ ਹੀ ਕੰਮ ਕਰਨਗੇ ਜਦੋਂ ਯੂਜ਼ਰਸ ਦਾ ਰਜਿਸਟਰਡ ਸਿਮ ਉਸ ਮੋਬਾਈਲ ਫੋਨ ਵਿੱਚ ਐਕਟਿਵ ਹੋਵੇ। ਇਸ ਤੋਂ ਇਲਾਵਾ, ਸਿਮ ਬਾਈਡਿੰਗ ਦੇ ਤਹਿਤ, ਜੇਕਰ ਸਿਮ ਤੁਹਾਡੇ ਫੋਨ ਤੋਂ ਹਟਾ ਦਿੱਤਾ ਜਾਂਦਾ ਹੈ ਤਾਂ WhatsApp ਵਰਗੇ ਹੋਰ ਮੈਸੇਜਿੰਗ ਐਪਸ ਬੰਦ ਹੋ ਜਾਣਗੇ।
ਵੈੱਬ ਬ੍ਰਾਊਜ਼ਰਾਂ ‘ਤੇ ਹਰ 6 ਘੰਟਿਆਂ ਬਾਅਦ Log Out ਹੋ ਜਾਣਗੇ ਮੈਸੇਜਿੰਗ ਐਪਸ
ਕੇਂਦਰ ਸਰਕਾਰ ਨੇ ਵੈੱਬ ਬ੍ਰਾਊਜ਼ਰਾਂ, ਯਾਨੀ ਲੈਪਟਾਪ ਅਤੇ ਡੈਸਕਟਾਪਾਂ ਰਾਹੀਂ ਲੌਗਇਨ ਕਰਨ ਵਾਲੇ ਉਪਭੋਗਤਾਵਾਂ ਲਈ ਵੀ ਇੱਕ ਮਹੱਤਵਪੂਰਨ ਬਦਲਾਅ ਕੀਤਾ ਹੈ। ਮੈਸੇਜਿੰਗ ਪਲੇਟਫਾਰਮ ਲਈ ਹੁਣ ਯੂਜ਼ਰਸ ਨੂੰ ਹਰ ਛੇ ਘੰਟਿਆਂ ਬਾਅਦ ਲੌਗ ਆਊਟ ਕਰਨ ਹੋਵੇਗਾ। ਇਸ ਤੋਂ ਬਾਅਦ, ਉਹ ਸਿਰਫ਼ ਇੱਕ QR ਕੋਡ ਰਾਹੀਂ ਵਾਪਸ ਲੌਗ ਇਨ ਕਰ ਸਕਣਗੇ।
