ਰਾਜਸਥਾਨ ਦੇ ਨਾਗੌਰ ਜ਼ਿਲੇ 'ਚ ਸ਼ਰਾਬੀ ਪਤੀ ਨੇ ਪਤਨੀ ਨਾਲ ਅਜਿਹਾ ਕਾਰਾ ਕੀਤਾ ਕਿ ਪੂਰਾ ਪਿੰਡ ਹੈਰਾਨ ਰਹਿ ਗਿਆ। ਦਰਅਸਲ ਪਤਨੀ ਦਾ ਆਪਣੇ ਪਤੀ ਅਤੇ ਸੱਸ ਨਾਲ ਕਿਸੇ ਗੱਲ ਨੂੰ ਲੈ ਕੇ ਝਗੜਾ ਹੋ ਗਿਆ ਸੀ। ਇਸ ਤੋਂ ਬਾਅਦ ਗੁੱਸੇ 'ਚ ਆਏ ਪਤੀ ਨੇ ਪਤਨੀ ਨੂੰ ਬਾਈਕ ਪਿੱਛੇ ਬੰਨ੍ਹ ਲਿਆ ਤੇ ਘਸੀਟਦਾ ਪਿੰਡ ਲੈ ਗਿਆ। ਪਤਨੀ ਰੌਲਾ ਪਾਉਂਦੀ ਰਹੀ ਪਰ ਉਸ ਨੂੰ ਬਚਾਉਣ ਲਈ ਕੋਈ ਅੱਗੇ ਨਹੀਂ ਆਇਆ। ਹੁਣ ਇਸ ਘਟਨਾ ਦਾ ਵੀਡੀਓ ਵਾਇਰਲ ਹੋ ਰਿਹਾ ਹੈ।
ਪੁਲਸ ਨੇ ਦੋਸ਼ੀ ਪਤੀ ਨੂੰ ਗ੍ਰਿਫਤਾਰ ਕਰ ਲਿਆ
ਪੁਲਸ ਨੂੰ ਇਸ ਘਟਨਾ ਦਾ ਪਤਾ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਲੱਗਾ। ਪੁਲਸ ਨੇ ਇਸ ’ਤੇ ਤੁਰੰਤ ਕਾਰਵਾਈ ਕਰਦਿਆਂ ਮੁਲਜ਼ਮ ਪਤੀ ਪ੍ਰੇਮਾਰਾਮ ਮੇਘਵਾਲ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਹਾਲਾਂਕਿ ਔਰਤ ਨੇ ਕੋਈ ਸ਼ਿਕਾਇਤ ਨਹੀਂ ਕੀਤੀ ਹੈ। ਉਹ ਆਪਣੇ ਪਤੀ ਦੇ ਘਰੋਂ ਚਲੀ ਗਈ ਹੈ ਅਤੇ ਜੈਸਲਮੇਰ, ਮੋਹਨਗੜ੍ਹ ਵਿੱਚ ਆਪਣੀ ਨਨਾਣ ਕੋਲ ਹੈ।
2 ਲੱਖ ਰੁਪਏ ਦੇ ਕੇ ਪੰਜਾਬ ਜਾ ਕੇ ਵਿਆਹ ਕਰਵਾਇਆ
ਜਾਣਕਾਰੀ ਅਨੁਸਾਰ ਪ੍ਰੇਮਾਰਾਮ ਦਾ ਵਿਆਹ 6 ਮਹੀਨੇ ਪਹਿਲਾਂ ਪੰਜਾਬ ਦੀ ਰਹਿਣ ਵਾਲੀ ਸੁਮਿਤਰਾ (25) ਨਾਲ 2 ਲੱਖ ਰੁਪਏ ਦੇ ਕੇ ਹੋਇਆ ਸੀ। ਸੁਮਿੱਤਰਾ ਦੇ ਪਿਤਾ ਦੀ ਮੌਤ ਹੋ ਚੁੱਕੀ ਹੈ। ਪ੍ਰੇਮਾਰਾਮ ਦੀ ਭੈਣ ਸ਼ਾਰਦਾ, ਮਾਮਾ ਅਤੇ ਮਾਸੀ ਨੇ ਸੁਮਿਤਰਾ ਦੀ ਮਾਂ ਨੂੰ 2 ਲੱਖ ਰੁਪਏ ਦਿੱਤੇ ਸਨ। ਇਸ ਤੋਂ ਬਾਅਦ ਵਿਆਹ ਤੋਂ ਬਾਅਦ ਪ੍ਰੇਮਾਰਾਮ ਸੁਮਿਤਰਾ ਨੂੰ ਨਾਹਰਸਿੰਘਪੁਰਾ ਲੈ ਆਇਆ।