ਭਾਰਤੀ ਰਿਜ਼ਰਵ ਬੈਂਕ ਨੇ ਆਮ ਲੋਕਾਂ ਨੂੰ ਵੱਡੀ ਰਾਹਤ ਦਿੰਦੇ ਹੋਏ, ਰੈਪੋ ਰੇਟ ਵਿੱਚ 0.25 ਪ੍ਰਤੀਸ਼ਤ ਦੀ ਕਟੌਤੀ ਕੀਤੀ ਹੈ। ਇਸ ਕਟੌਤੀ ਕਾਰਨ ਲੋਕਾਂ ਦੀ EMI ਘੱਟ ਜਾਵੇਗੀ ਅਤੇ ਕਰਜ਼ੇ ਵੀ ਸਸਤੇ ਹੋ ਸਕਦੇ ਹਨ। ਆਰਬੀਆਈ ਗਵਰਨਰ ਸੰਜੇ ਮਲਹੋਤਰਾ ਨੇ ਮੀਟਿੰਗ ਤੋਂ ਬਾਅਦ ਇਸ ਫੈਸਲੇ ਦਾ ਐਲਾਨ ਕੀਤਾ ਹੈ।
ਸਾਲ 2020 ‘ਚ ਘਟਾਈਆਂ ਗਈਆਂ ਸਨ ਦਰਾਂ
ਦੱਸ ਦੇਈਏ ਕਿ ਆਰਬੀਆਈ ਨੇ ਆਖਰੀ ਵਾਰ ਸਾਲ 2020 ਵਿੱਚ ਰੈਪੋ ਰੇਟ ਵਿੱਚ ਬਦਲਾਅ ਕੀਤਾ ਸੀ। ਆਰਬੀਆਈ ਨੇ ਦਰ 0.40% ਘਟਾ ਕੇ 4% ਕਰ ਦਿੱਤੀ ਸੀ। ਹਾਲਾਂਕਿ, ਮਈ 2022 ਵਿੱਚ, ਰਿਜ਼ਰਵ ਬੈਂਕ ਨੇ ਵਿਆਜ ਦਰਾਂ ਵਧਾਉਣੀਆਂ ਸ਼ੁਰੂ ਕਰ ਦਿੱਤੀਆਂ, ਜੋ ਮਈ 2023 ਵਿੱਚ ਬੰਦ ਹੋ ਗਈਆਂ। ਇਸ ਸਮੇਂ ਦੌਰਾਨ, ਰਿਜ਼ਰਵ ਬੈਂਕ ਨੇ ਰੈਪੋ ਰੇਟ ਵਿੱਚ 2.50% ਦਾ ਵਾਧਾ ਕੀਤਾ ਅਤੇ ਇਸਨੂੰ 6.5% ਤੱਕ ਲੈ ਗਿਆ। ਇਸ ਤਰ੍ਹਾਂ 5 ਸਾਲਾਂ ਬਾਅਦ ਰੈਪੋ ਰੇਟ ਘਟਾਇਆ ਗਿਆ ਹੈ।
ਕੀ ਘੱਟ ਜਾਵੇਗੀ EMI ?
ਰੈਪੋ ਰੇਟ ਵਿੱਚ ਕਟੌਤੀ ਕਾਰਨ ਆਮ ਲੋਕ ਸੋਚ ਰਹੇ ਹਨ ਕਿ ਕੀ ਇਸ ਨਾਲ ਉਨ੍ਹਾਂ ਦੇ ਵਿਆਜ ਵਿੱਚ ਕੋਈ ਫ਼ਰਕ ਪਵੇਗਾ ਜਾਂ ਨਹੀਂ। ਤਾਂ ਆਓ ਤੁਹਾਨੂੰ ਦੱਸ ਦੇਈਏ ਕਿ ਦੋ ਤਰ੍ਹਾਂ ਦੇ ਕਰਜ਼ੇ ਹੁੰਦੇ ਹਨ, ਇੱਕ ਫਿਕਸਡ ਅਤੇ ਦੂਜਾ ਫਲੋਟਰ। ਫਿਕਸਡ ਕਰਜ਼ਿਆਂ ਵਿੱਚ, ਰੈਪੋ ਰੇਟ ਵਿੱਚ ਵਾਧਾ ਜਾਂ ਕਮੀ ਤੁਹਾਡੇ ਕਰਜ਼ੇ ‘ਤੇ ਕੋਈ ਫ਼ਰਕ ਨਹੀਂ ਪਾਉਂਦੀ। ਜਦੋਂ ਕਿ ਫਲੋਟਰ ਕਰਜ਼ਿਆਂ ਵਿੱਚ, ਰੈਪੋ ਰੇਟ ਵਿੱਚ ਬਦਲਾਅ ਤੁਹਾਡੀਆਂ ਵਿਆਜ ਦਰਾਂ ਨੂੰ ਪ੍ਰਭਾਵਤ ਕਰਦੇ ਹਨ। ਅਜਿਹੀ ਸਥਿਤੀ ਵਿੱਚ, ਜਿਨ੍ਹਾਂ ਕੋਲ ਲੋਨ ਫਲੋਟਰ ਹੈ, ਉਨ੍ਹਾਂ ਦੀ EMI ਘੱਟ ਜਾਵੇਗੀ।
