ਖ਼ਬਰਿਸਤਾਨ ਨੈੱਟਵਰਕ: ਪੰਜਾਬ ਵਿੱਚ ਸਫ਼ਰ ਕਰਨ ਵਾਲੇ ਲੋਕਾਂ ਲਈ ਇੱਕ ਜ਼ਰੂਰੀ ਖ਼ਬਰ ਹੈ। ਸੂਬੇ ਦਾ ਸਭ ਤੋਂ ਮਹਿੰਗਾ ਟੋਲ ਪਲਾਜ਼ਾ ਯਾਨੀ ਲਾਡੋਵਾਲ ਟੋਲ ਪਲਾਜ਼ਾ ਹੁਣ ਹੋਰ ਵੀ ਮਹਿੰਗਾ ਹੋ ਗਿਆ ਹੈ। NHAI (ਨੈਸ਼ਨਲ ਹਾਈਵੇਅ ਅਥਾਰਟੀ) ਨੇ ਪਿਛਲੇ ਚਾਰ ਮਹੀਨਿਆਂ ਵਿੱਚ ਦੂਜੀ ਵਾਰ ਟੋਲ ਦੇ ਰੇਟ ਵਧਾ ਦਿੱਤੇ ਹਨ। ਇਹ ਨਵੇਂ ਰੇਟ ਤੁਰੰਤ ਲਾਗੂ ਕਰ ਦਿੱਤੇ ਗਏ ਹਨ।
ਵਾਹਨਾਂ ਦੇ ਹਿਸਾਬ ਨਾਲ ਨਵੇਂ ਰੇਟ ਕਾਰ, ਜੀਪ ਅਤੇ ਵੈਨ: ਹੁਣ ਇੱਕ ਪਾਸੇ ਦਾ ਟੋਲ 225 ਰੁਪਏ ਤੋਂ ਵਧ ਕੇ 235 ਰੁਪਏ ਹੋ ਗਿਆ ਹੈ। ਬੱਸ, ਟਰੱਕ ਅਤੇ ਵਪਾਰਕ ਵਾਹਨ: ਇਨ੍ਹਾਂ ਦੇ ਟੋਲ ਵਿੱਚ 10 ਰੁਪਏ ਤੋਂ ਲੈ ਕੇ 60 ਰੁਪਏ ਤੱਕ ਦਾ ਵਾਧਾ ਕੀਤਾ ਗਿਆ ਹੈ। ਰੋਜ਼ਾਨਾ ਆਉਣ-ਜਾਣ ਵਾਲੇ ਲੋਕਾਂ ਲਈ ਮਹੀਨੇ ਦਾ ਪਾਸ ਹੁਣ 7,815 ਰੁਪਏ ਦਾ ਹੋਵੇਗਾ।
ਸਥਾਨਕ ਲੋਕਾਂ ਲਈ ਰਾਹਤ
ਟੋਲ ਪਲਾਜ਼ਾ ਦੇ 20 ਕਿਲੋਮੀਟਰ ਦੇ ਘੇਰੇ (ਦਾਇਰੇ) ਵਿੱਚ ਰਹਿਣ ਵਾਲੇ ਸਥਾਨਕ ਲੋਕਾਂ ਦੇ ਨਿੱਜੀ ਵਾਹਨਾਂ ਲਈ ਮਹੀਨੇ ਦਾ ਪਾਸ ਪਹਿਲਾਂ ਵਾਂਗ ਹੀ 360 ਰੁਪਏ ਰਹੇਗਾ। ਉਨ੍ਹਾਂ ਦੇ ਰੇਟ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ।
ਪੰਜਾਬ ਦੇ ਇਨ੍ਹਾਂ ਟੋਲ ਪਲਾਜ਼ਿਆਂ ‘ਤੇ ਵੀ ਵਧੇ ਰੇਟ:
ਲਾਡੋਵਾਲ ਤੋਂ ਇਲਾਵਾ ਪੰਜਾਬ ਦੇ ਕਈ ਹੋਰ ਟੋਲ ਪਲਾਜ਼ਿਆਂ ਕਾਲਾਝਰ, ਲਹਿਰਾਬੇਗਾ, ਕੋਟ ਕਰੋੜ, ਘੁਲਾਲ, ਕਾਲਾ ਟਿੱਬਾ, ਸ਼ੇਖਪੁਰਾ ‘ਤੇ ਵੀ ਨਵੇਂ ਰੇਟ ਲਾਗੂ ਹੋ ਗਏ ਹਨ।
ਕਿਉਂ ਵਧਾਏ ਗਏ ਰੇਟ?
NHAI ਮੁਤਾਬਕ, ਪੰਜਾਬ ਅਤੇ ਹਰਿਆਣਾ ਦੇ 50 ਤੋਂ ਵੱਧ ਟੋਲ ਪਲਾਜ਼ਿਆਂ ‘ਤੇ ਥੋਕ ਮੁੱਲ ਸੂਚਕਾਂਕ (WPI) ਦੇ ਆਧਾਰ ‘ਤੇ ਫੀਸਾਂ ਵਿੱਚ ਬਦਲਾਅ ਕੀਤਾ ਗਿਆ ਹੈ, ਜਿਸ ਕਾਰਨ ਇਹ ਰੇਟ ਵਧੇ ਹਨ।
