ਜਲੰਧਰ ਮਖਦੂਮਪੁਰਾ ਸਥਿਤ ਇੱਕ ਮੰਦਿਰ ਵਿੱਚ ਸ਼ਿਵ ਸੈਨਾ ਆਗੂ ਬੰਟੀ ‘ਤੇ ਮੰਦਿਰ ਦੀ ਮਰਯਾਦਾ ਭੰਗ ਕਰਨ ਦੇ ਦੋਸ਼ਾਂ ਨੂੰ ਲੈ ਕੇ ਅੱਜ ਜਾਲੰਧਰ ਪੁਲਿਸ ਕਮਿਸ਼ਨਰ ਦਫ਼ਤਰ ਦੇ ਬਾਹਰ ਭਾਰੀ ਹੰਗਾਮਾ ਹੋਇਆ। ਇੱਕ ਮਹਿਲਾ ਨੇ ਵੀਡੀਓ ਜਾਰੀ ਕਰਦਿਆਂ ਦੋਸ਼ ਲਾਇਆ ਸੀ ਕਿ ਬੰਟੀ ਨੇ ਜੁੱਤੀਆਂ ਪਾ ਕੇ ਮੰਦਿਰ ਅੰਦਰ ਪ੍ਰਵੇਸ਼ ਕੀਤਾ, ਜਿਸ ਨਾਲ ਸ਼ਰਧਾਲੂਆਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚੀ ਹੈ।
ਸੀਪੀ ਦਫ਼ਤਰ ਦੇ ਬਾਹਰ ਦੋਵੇਂ ਧਿਰਾਂ ਆਹਮੋ-ਸਾਹਮਣੇ
ਅੱਜ ਜਦੋਂ ਮਹਿਲਾ ਬੰਟੀ ਖ਼ਿਲਾਫ਼ ਐਫਆਈਆਰ (FIR) ਦਰਜ ਕਰਵਾਉਣ ਲਈ ਸੀਪੀ ਦਫ਼ਤਰ ਪਹੁੰਚੀ, ਤਾਂ ਉੱਥੇ ਬੰਟੀ ਵੀ ਆਪਣੀ ਪਤਨੀ ਸਮੇਤ ਪਹੁੰਚ ਗਿਆ। ਦੇਖਦੇ ਹੀ ਦੇਖਦੇ ਦੋਵਾਂ ਧਿਰਾਂ ਵਿਚਾਲੇ ਤਕਰਾਰ ਵੱਧ ਗਈ। ਬੰਟੀ ਦੀ ਪਤਨੀ ਨੇ ਮਹਿਲਾ ‘ਤੇ ਠੱਗੀ ਦੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਉਨ੍ਹਾਂ ਕੋਲ ਸਾਰੇ ਸਬੂਤ ਹਨ ਅਤੇ ਮੰਦਿਰ ਵਿੱਚ ਹੋਰ ਵੀ ਕਈ ਲੋਕ ਜੁੱਤੀਆਂ ਪਾ ਕੇ ਆਏ ਸਨ।
AI ਵੀਡੀਓ ਅਤੇ ਬੇਅਦਬੀ ਦੇ ਦੋਸ਼
ਦੂਜੇ ਪਾਸੇ, ਮਹਿਲਾ ਨੇ ਆਪਣੇ ਉੱਤੇ ਲੱਗੇ ਦੋਸ਼ਾਂ ਨੂੰ ਬੇਬੁਨਿਆਦ ਦੱਸਿਆ ਅਤੇ ਉਲਟਾ ਦੋਸ਼ ਲਾਇਆ ਕਿ ਉਸ ਦੀ ਮੰਦਿਰ ਵਿੱਚ ਨੱਚਣ ਵਾਲੀ ਵੀਡੀਓ ਨੂੰ AI ਰਾਹੀਂ ਗਲਤ ਤਰੀਕੇ ਨਾਲ ਜਨਰੇਟ ਕਰਕੇ ਵਾਇਰਲ ਕੀਤਾ ਗਿਆ ਹੈ। ਮਹਿਲਾ ਨੇ ਦਾਅਵਾ ਕੀਤਾ ਕਿ ਬੰਟੀ ਨੂੰ ਉਸ ਨੇ ਖੁਦ ਜੁੱਤੀਆਂ ਪਾ ਕੇ ਮੰਦਿਰ ਵਿੱਚ ਦੇਖਿਆ ਸੀ।
ਧਰਨੇ ਦੀ ਚੇਤਾਵਨੀ
ਇਸ ਮੌਕੇ ਨਰਿੰਦਰ ਥਾਪਰ ਨੇ ਮੰਗ ਕੀਤੀ ਕਿ ਇਸ ਮਾਮਲੇ ਵਿੱਚ ਬੇਅਦਬੀ ਦਾ ਪਰਚਾ ਦਰਜ ਹੋਣਾ ਚਾਹੀਦਾ ਹੈ। ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਜੇਕਰ ਪੁਲਿਸ ਨੇ ਕਾਰਵਾਈ ਨਾ ਕੀਤੀ ਤਾਂ ਉਹ ਸੀਪੀ ਦਫ਼ਤਰ ਦੇ ਬਾਹਰ ਧਰਨਾ ਲਗਾਉਣਗੇ। ਹੰਗਾਮਾ ਵਧਦਾ ਦੇਖ ਪੁਲਿਸ ਨੇ ਦੋਵਾਂ ਧਿਰਾਂ ਨੂੰ ਸ਼ਾਂਤ ਕਰਵਾਇਆ ਅਤੇ ਮਾਮਲੇ ਦੀ ਜਾਂਚ ਲਈ ਦਫ਼ਤਰ ਦੇ ਅੰਦਰ ਲੈ ਗਈ।
