ਖ਼ਬਰਿਸਤਾਨ ਨੈੱਟਵਰਕ: ਜਲੰਧਰ ਦਿਹਾਤ ਦੇ SSP ਹਰਵਿੰਦਰ ਸਿੰਘ ਵਿਰਕ ਨੇ ਸ਼ਾਹਕੋਟ ਪੁਲਿਸ ‘ਤੇ ਸਖਤ ਕਾਰਵਾਈ ਕਰਦਿਆਂ ਥਾਣਾ ਸ਼ਾਹਕੋਟ ਦੇ ਐਸਐਚਓ (SHO) ਬਲਵਿੰਦਰ ਸਿੰਘ, ਏਐਸਆਈ (ASI) ਸੁਖਵਿੰਦਰ ਸਿੰਘ ਅਤੇ ਮਹਿਲਾ ਕਾਂਸਟੇਬਲ ਹੈਵਨਪ੍ਰੀਤ ਕੌਰ ਨੂੰ ਲਾਈਨ ਹਾਜ਼ਰ ਕਰ ਦਿੱਤਾ ਹੈ। ਇਹ ਕਾਰਵਾਈ ਘਰ ਵਿੱਚ ਰੇਡ ਕਰਕੇ ਸ਼ਰਾਬ ਬਰਾਮਦਗੀ ਦਿਖਾਉਣ ਦੇ ਮਾਮਲਾ ‘ਚ ਕੀਤੀ ਗਈ ਹੈ।
ਪੁਲਿਸ ‘ਤੇ ਇੱਕ ਵਿਅਕਤੀ ਖਿਲਾਫ ਝੂਠ ਕੇਸ ਦਰਜ ਕਰਨ ਦਾ ਦੋਸ਼ ਹੈ। ਜਿੱਥੇ ਪੁਲਿਸ ਖ਼ੁਦ ਆਪਣੀ ਪ੍ਰਾਈਵੇਟ ਗੱਡੀ ਦੀ ਡਿੱਗੀ ਵਿੱਚੋਂ ਨੀਲਾ ਡਰੱਮ ਕੱਢ ਕੇ ਇੱਕ ਘਰ ਵਿੱਚ ਰੱਖਦੀ ਦਿਖਾਈ ਦੇ ਰਹੀ ਹੈ ਅਤੇ ਬਾਅਦ ਵਿੱਚ ਉਨ੍ਹਾਂ ਨੇ ਉੱਥੋਂ ਸ਼ਰਾਬ ਬਰਾਮਦਗੀ ਦਾ ਦਾਅਵਾ ਕਰ ਦਿੱਤਾ।
ਦੱਸ ਦੇਈਏ ਕਿ 9 ਅਪ੍ਰੈਲ ਨੂੰ ਪੁਲਿਸ ਨੇ ਦਾਅਵਾ ਕੀਤਾ ਸੀ ਕਿ ਉਨ੍ਹਾਂ ਨੇ ਪਿੰਡ ਦੌਲਤਪੁਰ ਢੱਡਾ ਦੇ ਰਹਿਣ ਵਾਲੇ ਅਕਰਮ ਦੇ ਘਰੋਂ 35 ਲੀਟਰ ਲਾਹਣ ਬਰਾਮਦ ਕੀਤੀ ਹੈ। ਪਰ ਘਰ ਦੇ ਬਾਹਰ ਲੱਗੇ CCTV ਕੈਮਰੇ ਵਿੱਚ ਦੇਖਿਆ ਗਿਆ ਕਿ ਪੁਲਿਸ ਮੁਲਾਜ਼ਮ ਖ਼ੁਦ ਇੱਕ ਨੀਲਾ ਡਰੱਮ ਗੱਡੀ ਵਿੱਚੋਂ ਉਤਾਰ ਕੇ ਘਰ ਦੇ ਅੰਦਰ ਲੈ ਕੇ ਗਏ ਸਨ। ਮਹਿਜ਼ 13 ਮਿੰਟਾਂ ਵਿੱਚ ਇਹ ਸਾਰੀ ‘ਬਰਾਮਦਗੀ’ ਦਿਖਾ ਕੇ ਕੇਸ ਦਰਜ ਕਰ ਲਿਆ ਗਿਆ ਸੀ।
ਜਦਕਿ ਪੁਲਿਸ ਮੁਲਾਜ਼ਮਾਂ ਦਾ ਕਹਿਣਾ ਹੈ ਉਨ੍ਹਾਂ ਨੇ ਬਰਾਮਦ ਕੀਤੀ ਲਾਹਣ ਨੂੰ ਭਰਨ ਲਈ ਡਰੱਮ ਦਾ ਇੰਤਜ਼ਾਮ ਕੀਤਾ ਸੀ। ਪੁਲਿਸ ਨੇ ਦੱਸਿਆ ਕਿ ਅਕਰਮ ਅਪਰਾਧਿਕ ਰਿਕਾਰਡ ਵਾਲਾ ਵਿਅਕਤੀ ਹੈ , ਰੇਡ ਦੇ ਸਮੇਂ ਉਹ ਘਰ ‘ਚ ਨਹੀਂ ਸੀ।
ਪੁਲਿਸ ਦਾ ਪੱਖ ਹੈ ਕਿ ਬਰਾਮਦ ਕੀਤੀ ਗਈ ਲਾਹਣ ਨੂੰ ਭਰਨ ਲਈ ਡਰੱਮ ਦਾ ਇੰਤਜ਼ਾਮ ਪੁਲਿਸ ਨੇ ਖ਼ੁਦ ਕੀਤਾ ਸੀ, ਜਿਸ ਕਾਰਨ ਉਹ ਡਰੱਮ ਅੰਦਰ ਲੈ ਕੇ ਗਏ ਸਨ। ਹਾਲਾਂਕਿ, ਮਾਮਲੇ ਦੀ ਗੰਭੀਰਤਾ ਅਤੇ ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਨਿਰਪੱਖ ਜਾਂਚ ਲਈ ਤਿੰਨ ਮੁਲਾਜ਼ਮਾਂ ਨੂੰ ਲਾਈਨ ਹਾਜ਼ਰ ਕੀਤਾ ਗਿਆ ਹੈ।
