ਵੰਦੇ ਭਾਰਤ ਟਰੇਨ ਤੇ MEMU ਟਰੇਨ ਦੇ ਨਵੇਂ ਕੋਚ, ਜੋ ਕਿ ਭਾਰਤ ਦੀਆਂ ਮੁੱਖ ਟਰੇਨਾਂ ਵਿੱਚੋਂ ਇਕ ਹਨ, ਉਹਨਾਂ ਦਾ ਨਿਰਮਾਣ ਰੇਲ ਕੋਚ ਫੈਕਟਰੀ ਕਪੂਰਥਲਾ ਵਿੱਚ ਕੀਤਾ ਜਾਵੇਗਾ। RCF ਦੇ ਜਨਰਲ ਮੈਨੇਜਰ ਐਸ ਸ੍ਰੀਨਿਵਾਸ ਨੇ ਦੱਸਿਆ ਕਿ ਇਨ੍ਹਾਂ ਕੋਚਾਂ ਦੇ ਨਿਰਮਾਣ ਲਈ ਰੇਲ ਕੋਚ ਫੈਕਟਰੀ ਵਿੱਚ ਤਿਆਰੀਆਂ ਕੀਤੀਆਂ ਜਾ ਰਹੀਆਂ ਹਨ।
ਵੰਦੇ ਭਾਰਤ ਕੋਚਾਂ ਦੀ ਅਧਿਕਤਮ ਸਪੀਡ 160 ਕਿਲੋਮੀਟਰ ਪ੍ਰਤੀ ਘੰਟਾ ਤੇ MEMU ਦੀ ਅਧਿਕਤਮ ਗਤੀ ਸੀਮਾ 110 ਕਿਲੋਮੀਟਰ ਪ੍ਰਤੀ ਘੰਟਾ ਤੈਅ ਕੀਤੀ ਗਈ ਹੈ। ਇਨ੍ਹਾਂ ਦੇ ਨਿਰਮਾਣ ਨਾਲ ਰੇਲ ਕੋਚ ਫੈਕਟਰੀ ਦੇ ਨਿਰਮਾਣ ਕਾਰਜ ਵਿੱਚ ਇੱਕ ਨਵਾਂ ਅਧਿਆਏ ਜੁੜ ਜਾਵੇਗਾ।
ਇਸ ਦੇ ਨਾਲ ਹੀ ਰੇਲਵੇ ਕੋਚ ਫੈਕਟਰੀ ਕਪੂਰਥਲਾ ਨੇ ਸੇਵਾਮੁਕਤ ਹੋਣ ਵਾਲੇ ਮੁਲਾਜ਼ਮਾਂ ਨੂੰ ਨਵੰਬਰ ਮਹੀਨੇ ਤੋਂ ਹਰ ਮਹੀਨੇ ਸੇਵਾ ਮੁਕਤੀ ਪੱਤਰ ਸੌਂਪਣ ਦੇ ਨਾਲ-ਨਾਲ ਉਨ੍ਹਾਂ ਦੀ ਥਾਂ ’ਤੇ ਤਰੱਕੀ ਪ੍ਰਾਪਤ ਕਰਨ ਵਾਲੇ ਮੁਲਾਜ਼ਮਾਂ ਨੂੰ ਉਸੇ ਦਿਨ ਹੀ ਤਰੱਕੀ ਦੇ ਹੁਕਮ ਸੌਂਪਣ ਦੀ ਨਵੀਂ ਪਹਿਲ ਸ਼ੁਰੂ ਕੀਤੀ ਹੈ।
ਇਸ ਦੇ ਨਾਲ ਹੀ ਅੱਜ ਸੇਵਾਮੁਕਤੀ ਤੇ ਤਰੱਕੀ ਸਮਾਰੋਹ ਦਾ ਆਯੋਜਨ ਕੀਤਾ ਗਿਆ। ਸਮਾਗਮ ਦੀ ਪ੍ਰਧਾਨਗੀ RCF ਦੇ ਜਨਰਲ ਮੈਨੇਜਰ ਐਸ ਸ੍ਰੀਨਿਵਾਸ ਨੇ ਕੀਤੀ।
RCF ਦੇ ਤਕਨੀਕੀ ਸਿਖਲਾਈ ਕੇਂਦਰ ਵਿਖੇ ਕਰਵਾਏ ਗਏ ਇਸ ਸਮਾਗਮ ਵਿੱਚ ਜਨਰਲ ਮੈਨੇਜਰ ਵੱਲੋਂ 16 ਮੁਲਾਜ਼ਮਾਂ ਤੇ 2 ਅਧਿਕਾਰੀਆਂ ਨੂੰ ਸੇਵਾਮੁਕਤੀ ਮੌਕੇ ਉਨ੍ਹਾਂ ਦੇ ਬਕਾਏ ਸਮੇਤ ਪੈਨਸ਼ਨ ਪੱਤਰ ਸੌਂਪੇ ਗਏ ਅਤੇ 29 ਮੁਲਾਜ਼ਮਾਂ ਨੂੰ ਤਰੱਕੀ ਪੱਤਰ ਦਿੱਤੇ ਗਏ।