ਖ਼ਬਰਿਸਤਾਨ ਨੈੱਟਵਰਕ: ਪੰਜਾਬ ਵਿਧਾਨ ਸਭਾ ਦੇ ਬਜਟ ਇਜਲਾਸ ਦੌਰਾਨ ਇੱਕ ਵਾਰ ਫਿਰ ਭਾਰੀ ਹੰਗਾਮਾ ਦੇਖਣ ਨੂੰ ਮਿਲਿਆ। ਸਦਨ ਵਿੱਚ ਜਿੱਥੇ ਇੱਕ ਪਾਸੇ “ਸ਼ੇਮ-ਸ਼ੇਮ” ਦੇ ਨਾਅਰੇ ਲੱਗੇ, ਉੱਥੇ ਹੀ ਦੂਜੇ ਪਾਸੇ ਵਿੱਤ ਮੰਤਰੀ ਹਰਪਾਲ ਸਿੰਘ ਚੀਮਾ ਅਤੇ ਕਾਂਗਰਸੀ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਵਿਚਾਲੇ ਬੇਹੱਦ ਤਿੱਖੀ ਨੋਕ-ਝੋਕ ਹੋਈ। ਬਹਿਸ ਇੰਨੀ ਵਧ ਗਈ ਕਿ ਹਰਪਾਲ ਚੀਮਾ ਨੇ ਖਹਿਰਾ ‘ਤੇ ਨਿਸ਼ਾਨਾ ਸਾਧਦਿਆਂ ਇੱਥੋਂ ਤੱਕ ਕਹਿ ਦਿੱਤਾ ਕਿ “ਇਸਦਾ ਇਲਾਜ ਕਰਵਾਓ, ਪੈਸੇ ਮੈਂ ਦੇ ਦਿਆਂਗਾ।”
ਚੀਮਾ ਅਤੇ ਖਹਿਰਾ ਵਿਚਾਲੇ ਤਕਰਾਰ
ਵਿੱਤ ਮੰਤਰੀ ਹਰਪਾਲ ਚੀਮਾ ਨੇ ਸੁਖਪਾਲ ਸਿੰਘ ਖਹਿਰਾ ਦੇ ਇੱਕ ਪੁਰਾਣੇ ਇੰਟਰਵਿਊ ਦਾ ਜ਼ਿਕਰ ਕੀਤਾ, ਜਿਸ ਤੋਂ ਬਾਅਦ ਸਦਨ ਵਿੱਚ ਹੰਗਾਮਾ ਸ਼ੁਰੂ ਹੋ ਗਿਆ। ਚੀਮਾ ਨੇ ਕਿਹਾ, “ਇਹ ਵਿਅਕਤੀ ਸਾਡੀਆਂ ਮਾਵਾਂ-ਭੈਣਾਂ ਦੀ ਕੋਖ ਤੱਕ ਜਾਣ ਦੀ ਗੱਲ ਕਰਦਾ ਹੈ। ਇਹ ਲੋਕ ਚਾਂਦੀ ਦਾ ਚਮਚ ਲੈ ਕੇ ਪੈਦਾ ਹੋਏ ਹਨ ਅਤੇ ਲਗਜ਼ਰੀ ਗੱਡੀਆਂ ਵਿੱਚ ਘੁੰਮਦੇ ਹਨ।” ਇਸ ਦੌਰਾਨ ਚੀਮਾ ਨੇ ਖਹਿਰਾ ਨੂੰ ‘ਬੰਦਾ ਬਣ ਕੇ’ ਸੁਣਨ ਦੀ ਨਸੀਹਤ ਦਿੱਤੀ, ਜਿਸ ‘ਤੇ ਦੋਵਾਂ ਵਿਚਾਲੇ ਬਹਿਸ ਹੋਰ ਤੇਜ਼ ਹੋ ਗਈ।
“ਵਿਧਾਨ ਸਭਾ ‘ਚ ਬਦਮਾਸ਼ੀ ਕਰਦਾ ਹੈ ਇਹ ਵਿਅਕਤੀ”
ਹਰਪਾਲ ਚੀਮਾ ਨੇ ਸਪੀਕਰ ਨੂੰ ਮੁਖਾਤਿਬ ਹੁੰਦਿਆਂ ਕਿਹਾ ਕਿ ਖਹਿਰਾ ਸਦਨ ਵਿੱਚ ਬਦਮਾਸ਼ੀ ਕਰਦਾ ਹੈ। ਇਸ ਦੌਰਾਨ ਆਮ ਆਦਮੀ ਪਾਰਟੀ ਦੇ ਹੋਰ ਵਿਧਾਇਕ ਵੀ ਖੜ੍ਹੇ ਹੋ ਗਏ ਅਤੇ ਉਨ੍ਹਾਂ ਦੋਸ਼ ਲਾਇਆ ਕਿ ਖਹਿਰਾ ਵਿਧਾਨ ਸਭਾ ਵਿੱਚ ਬਦਤਮੀਜ਼ੀ ਕਰਦਾ ਹੈ ਅਤੇ ਔਰਤਾਂ ਬਾਰੇ ਗਲਤ ਸ਼ਬਦਾਵਲੀ ਵਰਤਦਾ ਹੈ। ਚੀਮਾ ਨੇ ਚੁਣੌਤੀ ਦਿੰਦਿਆਂ ਕਿਹਾ, “ਜਿੱਥੇ ਮਰਜ਼ੀ ਆ ਜਾ, ਤੇਰੇ ਵਰਗੇ ਕਈ ਬਦਮਾਸ਼ਾਂ ਦੀ ਬਦਮਾਸ਼ੀ ਕੱਢੀ ਹੈ।”
ਡਿਗਰੀ ਅਤੇ ਚੋਰੀ ਦੇ ਦੋਸ਼ਾਂ ‘ਤੇ ਹੋਏ ਵਾਰ-ਪਲਟਵਾਰ
ਚੀਮਾ ਨੇ ਖਹਿਰਾ ‘ਤੇ ਨਿੱਜੀ ਹਮਲੇ ਕਰਦਿਆਂ ਕਿਹਾ ਕਿ ਉਹ ਸੋਸ਼ਲ ਮੀਡੀਆ ‘ਤੇ ਪੜ੍ਹ ਰਹੇ ਸਨ ਕਿ ਕਿਤੇ ਤੇਲ ਚੋਰੀ, ਕਿਤੇ ਤਿਰਪਾਲ ਚੋਰੀ ਅਤੇ ਕਿਤੇ 12ਵੀਂ ਦੀ ਡਿਗਰੀ ਛੁਪਾਉਣ ਦੀਆਂ ਗੱਲਾਂ ਹੋ ਰਹੀਆਂ ਹਨ। ਉਨ੍ਹਾਂ ਕਿਹਾ, “ਸਾਡੀ ਡਿਗਰੀ ਕਿਤੇ ਵੀ ਚੈੱਕ ਕਰਵਾ ਲਓ, ਅਸੀਂ ਤੁਹਾਡੀ ਤਰ੍ਹਾਂ ਕਿਸੇ ਹੋਰ ਨੂੰ ਬਿਠਾ ਕੇ ਪੇਪਰ ਪਾਸ ਨਹੀਂ ਕੀਤੇ। ਇਹ ਜਨਤਕ ਪਲੇਟਫਾਰਮ ‘ਤੇ ਹਮੇਸ਼ਾ ਗਲਤ ਬੋਲਦਾ ਹੈ, ਇਸਦਾ ਇਲਾਜ ਕਰਵਾਉਣ ਦੀ ਲੋੜ ਹੈ, ਜਿਸਦਾ ਖਰਚਾ ਮੈਂ ਚੁੱਕਣ ਲਈ ਤਿਆਰ ਹਾਂ।”
