ਜਲੰਧਰ ਦੀ ਇੱਕ ਮਸ਼ਹੂਰ ਬੇਕਰੀ ਵਿੱਚੋਂ ਦੋ ਚੋਰ ਸਾਮਾਨ ਚੋਰੀ ਕਰਦੇ ਫੜੇ ਗਏ ਹਨ। ਘਟਨਾ ਦੀ ਸੀਸੀਟੀਵੀ ਫੁਟੇਜ ਵੀ ਸਾਹਮਣੇ ਆਈ ਹੈ। ਜਿਸ 'ਚ ਸਾਫ ਦਿਖਾਈ ਦੇ ਰਿਹਾ ਹੈ ਕਿ ਦੋਵੇਂ ਨੌਜਵਾਨ ਕਾਫੀ ਦੇਰ ਤੱਕ ਬੇਕਰੀ 'ਚ ਖੜ੍ਹੇ ਰਹੇ। ਮੌਕਾ ਮਿਲਦੇ ਹੀ ਉਨ੍ਹਾਂ 'ਚੋਂ ਇਕ ਨੇ ਬੇਕਰੀ 'ਚੋਂ ਸਾਮਾਨ ਚੁੱਕ ਕੇ ਆਪਣੀ ਕਮੀਜ਼ ਦੇ ਅੰਦਰ ਲੁਕੋ ਲਿਆ ਅਤੇ ਬਾਹਰ ਜਾਣ ਲੱਗਾ।
ਬੇਕਰੀ ਮਾਲਕ ਨੇ ਚੋਰ ਨੂੰ ਫ਼ੜਿਆ
ਪਰ ਇਸ ਦੌਰਾਨ ਸੀਸੀਟੀਵੀ ਕੈਮਰਾ ਦੇਖ ਰਿਹਾ ਬੇਕਰੀ ਮਾਲਕ ਕੁਨਾਲ ਦੋਵਾਂ ਨੂੰ ਫੜ ਲੈਂਦਾ ਹੈ ਅਤੇ ਪੁੱਛਦਾ ਹੈ ਕਿ ਉਨ੍ਹਾਂ ਨੇ ਕਿਹੜਾ ਸਾਮਾਨ ਚੁੱਕਿਆ ਹੈ। ਇਸ 'ਤੇ ਨੌਜਵਾਨ ਦਾ ਕਹਿਣਾ ਹੈ ਕਿ ਉਸ ਨੇ ਕੁਝ ਨਹੀਂ ਚੁੱਕਿਆ। ਜਦੋਂ ਇਸ ਦੀ ਤਲਾਸ਼ੀ ਲਈ ਗਈ ਤਾਂ ਕਮੀਜ਼ ਦੇ ਅੰਦਰੋਂ ਇੱਕ ਡੱਬਾ ਨਿਕਲਿਆ। ਇਸ ਤੋਂ ਬਾਅਦ ਬੇਕਰੀ ਦੇ ਸਟਾਫ ਨੇ ਦੋਵਾਂ ਨੂੰ ਫੜ ਲਿਆ।
ਪਹਿਲਾਂ ਵੀ ਹੋ ਚੁੱਕੀ ਹੈ ਚੋਰੀ
ਬੇਕਰੀ ਦੇ ਮਾਲਕ ਕੁਨਾਲ ਨੇ ਦੱਸਿਆ ਕਿ ਜਿਵੇਂ ਹੀ ਉਹ ਦੋਵੇਂ ਦੁਕਾਨ ਤੋਂ ਬਾਹਰ ਜਾਣ ਲੱਗੇ ਤਾਂ ਉਨ੍ਹਾਂ ਦੀ ਸੀਸੀਟੀਵੀ ਕੈਮਰੇ ਵਿੱਚ ਦੇਖ ਕੇ ਉਨ੍ਹਾਂ ਦੋਨਾਂ ਨੂੰ ਕਾਬੂ ਕਰ ਲਿਆ। ਕੁਝ ਦਿਨ ਪਹਿਲਾਂ ਵੀ ਉਨਾਂ ਦੀ ਬੇਕਰੀ ਵਿੱਚ ਚੋਰੀ ਦੀ ਘਟਨਾ ਵਾਪਰੀ ਸੀ। ਜਿਸ ਤੋਂ ਬਾਅਦ ਅੱਜ ਉਹ ਫਿਰ ਆਏ ਅਤੇ 850 ਰੁਪਏ ਦਾ ਡੱਬਾ ਲੈ ਕੇ ਭੱਜਣ ਲੱਗੇ ਸੀ ।
ਜਨਮ ਦਿਨ ਦਾ ਦੇਣਾ ਸੀ ਤੋਹਫਾ
ਇਸ ਮਾਮਲੇ ਵਿੱਚ ਜਦੋਂ ਮੁਲਜ਼ਮ ਤੋਂ ਪੁੱਛਿਆ ਗਿਆ ਕਿ ਉਸ ਨੇ ਚੋਰੀ ਕਿਉਂ ਕੀਤੀ। ਤਾਂ ਉਸਨੇ ਦੱਸਿਆ ਕਿ ਅੱਜ ਕਿਸੇ ਦਾ ਜਨਮ ਦਿਨ ਸੀ ਅਤੇ ਉਹ ਤੋਹਫਾ ਦੇਣਾ ਚਾਹੁੰਦਾ ਸੀ। ਉਸ ਕੋਲ ਪੈਸੇ ਨਾ ਹੋਣ ਕਾਰਨ ਉਸ ਨੇ ਇਹ ਚੋਰੀ ਕੀਤੀ। ਪੁਲੀਸ ਮੁਲਜ਼ਮਾਂ ਨੂੰ ਫੜ ਕੇ ਆਪਣੇ ਨਾਲ ਲੈ ਗਈ ਹੈ।
ਚਾਕਲੇਟਾਂ ਦਾ ਕੀਤਾ ਡੱਬਾ ਚੋਰੀ
ਮਾਮਲੇ ਸਬੰਧੀ ਜਾਣਕਾਰੀ ਦਿੰਦਿਆਂ ਪੁਲਿਸ ਅਧਿਕਾਰੀ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਇੱਕ ਬੇਕਰੀ ਤੋਂ ਚੋਰੀ ਦੀ ਘਟਨਾ ਸਬੰਧੀ ਫ਼ੋਨ ਆਇਆ ਸੀ। ਜਿਸ ਤੋਂ ਬਾਅਦ ਜਦੋਂ ਉਹ ਮੌਕੇ 'ਤੇ ਪਹੁੰਚੇ ਤਾਂ ਪਤਾ ਲੱਗਾ ਕਿ ਉਕਤ ਚੋਰ ਦੁਕਾਨ 'ਚੋਂ ਚਾਕਲੇਟਾਂ ਦਾ ਡੱਬਾ ਚੋਰੀ ਕਰਕੇ ਲੈ ਗਏ ਹਨ, ਜਿਸ ਨੂੰ ਰੰਗੇ ਹੱਥੀਂ ਕਾਬੂ ਕਰ ਲਿਆ ਗਿਆ ਹੈ |