ਕੈਨੇਡਾ ਨੇ ਸਟੂਡੈਂਟ ਨੂੰ ਇਕ ਹੋਰ ਝਟਕਾ ਦਿੰਦੇ ਹੋਏ ਸਟੱਡੀ ਵੀਜ਼ਾ 40 ਪ੍ਰਤੀਸ਼ਤ ਤੱਕ ਘਟਾ ਦਿੱਤੇ ਹਨ, ਜਿਸ ਦਾ ਕੈਨੇਡਾ ਵਿੱਚ ਪੜ੍ਹ ਰਹੇ ਭਾਰਤੀਆਂ ਅਤੇ ਪੰਜਾਬੀਆਂ ਉਤੇ ਅਸਰ ਹੋਵੇਗਾ। ਸਭ ਤੋਂ ਵੱਧ ਬਦਲਾਅ ਉਨ੍ਹਾਂ ਕਾਲਜਾਂ ਵਿੱਚ ਦੇਖੇ ਜਾ ਰਹੇ ਹਨ ਜੋ ਪੰਜਾਬੀਆਂ ਦੀ ਪਸੰਦ ਸਨ। ਇੱਥੋਂ ਤੱਕ ਕਿ ਬਹੁਤ ਸਾਰੇ ਕਾਲਜਾਂ ਨੇ ਸਟਾਫ ਦੀ ਛਾਂਟੀ ਕਰਨੀ ਅਤੇ ਕੋਰਸ ਬੰਦ ਕਰਨੇ ਸ਼ੁਰੂ ਕਰ ਦਿੱਤੇ ਹਨ।
ਇਹ ਕੋਰਸ ਕੀਤੇ ਜਾ ਰਹੇ ਬੰਦ
ਟੋਰਾਂਟੋ, ਓਨਟਾਰੀਓ ਵਿੱਚ ਸੈਂਟੇਨੀਅਲ ਕਾਲਜ ਨੇ ਐਲਾਨ ਕੀਤਾ ਹੈ ਕਿ ਉਹ 2025 ਦੇ ਗਰਮੀਆਂ ਅਤੇ ਸਰਦੀਆਂ ਦੇ ਸਮੈਸਟਰਾਂ ਦੇ ਨਾਲ-ਨਾਲ 2026 ਦੇ ਸਮੈਸਟਰ ਲਈ 49 ਫੁੱਲ-ਟਾਈਮ ਪ੍ਰੋਗਰਾਮਾਂ ਵਿੱਚ ਨਵੇਂ ਦਾਖਲੇ ਰੋਕ ਦੇਵੇਗਾ। ਇਨ੍ਹਾਂ ਵਿੱਚ ਪੱਤਰਕਾਰੀ, ਵਿੱਤੀ ਯੋਜਨਾਬੰਦੀ, ਤਕਨਾਲੋਜੀ ਫਾਊਂਡੇਸ਼ਨ ਅਤੇ ਹੋਰ ਵਿਕਾਸਸ਼ੀਲ ਕੋਰਸ ਸ਼ਾਮਲ ਹਨ।
ਕਾਲਜ ਅਤੇ ਕਰਮਚਾਰੀ ਪ੍ਰਭਾਵਤ ਹੋਣਗੇ
ਕਾਲਜ ਵਿੱਚ ਇਨ੍ਹਾਂ ਤਬਦੀਲੀਆਂ ਦਾ ਵਿਦਿਆਰਥੀਆਂ, ਕਾਲਜ ਸਟਾਫ਼ ਅਤੇ ਹੋਰ ਕਰਮਚਾਰੀਆਂ ‘ਤੇ ਡੂੰਘਾ ਪ੍ਰਭਾਵ ਪਵੇਗਾ। ਹਾਲਾਂਕਿ, ਕਾਲਜ ਨੇ ਕਿਹਾ ਕਿ ਨਵੇਂ ਵਿਦਿਆਰਥੀਆਂ ਲਈ 128 ਪੂਰੇ ਸਮੇਂ ਦੇ ਪ੍ਰੋਗਰਾਮ ਅਜੇ ਵੀ ਉਪਲਬਧ ਹਨ ਅਤੇ ਜੋ ਰੋਕ ਦਿੱਤੇ ਗਏ ਹਨ, ਉਹ ਭਵਿੱਖ ਵਿੱਚ ਦੁਬਾਰਾ ਸ਼ੁਰੂ ਕੀਤੇ ਜਾ ਸਕਦੇ ਹਨ।
ਪਰਥ ਵਿੱਚ ਐਲਗੋਨਕੁਇਨ ਕਾਲਜ ਬੰਦ ਹੋ ਜਾਵੇਗਾ
ਇਸ ਦੌਰਾਨ, ਐਲਗੋਨਕੁਇਨ ਕਾਲਜ ਨੇ ਕਿਹਾ ਕਿ ਉਹ 2026 ਵਿੱਚ ਪਰਥ ਸ਼ਹਿਰ ਵਿੱਚ ਆਪਣਾ ਕਾਲਜ ਕੈਂਪਸ ਬੰਦ ਕਰ ਦੇਵੇਗਾ। ਕਾਲਜ ਦੇ ਇਸ ਬਿਆਨ ਤੋਂ ਬਾਅਦ, ਪਰਥ ਦੀ ਮੇਅਰ ਜੂਡੀ ਬ੍ਰਾਊਨ ਨੇ ਕਿਹਾ ਕਿ ਇਸ ਨਾਲ ਸਥਾਨਕ ਲੋਕਾਂ ਨੂੰ ਬਹੁਤ ਨੁਕਸਾਨ ਹੋਵੇਗਾ। ਸ਼ੇਰਡਿਨ ਕਾਲਜ ਨੇ 40 ਪ੍ਰੋਗਰਾਮਾਂ ਨੂੰ ਮੁਅੱਤਲ ਕਰ ਦਿੱਤਾ ਹੈ, ਜਦੋਂ ਕਿ ਓਨਟਾਰੀਓ ਦੇ ਮਾਰਖਮ ਵਿੱਚ ਸੇਨੇਕਾ ਕਾਲਜ ਨੇ ਕਾਲਜ ਨੂੰ ਅਸਥਾਈ ਤੌਰ ‘ਤੇ ਬੰਦ ਕਰਨ ਦਾ ਐਲਾਨ ਕੀਤਾ ਹੈ। ਮੋਹੌਕ ਕਾਲਜ ਨੇ 2025 ਤੱਕ ਆਪਣੇ 20 ਪ੍ਰਤੀਸ਼ਤ ਪ੍ਰਸ਼ਾਸਕੀ ਸਟਾਫ ਦੀ ਛਾਂਟੀ ਕਰਨ ਅਤੇ 16 ਪ੍ਰੋਗਰਾਮਾਂ ਨੂੰ ਰੱਦ ਕਰਨ ਦਾ ਫੈਸਲਾ ਕੀਤਾ ਹੈ।
