ਜੰਮੂ ਦੇ ਕਠੂਆ ਰੇਲਵੇ ਸਟੇਸ਼ਨ 'ਤੇ ਖੜ੍ਹੀ ਮਾਲ ਗੱਡੀ ਅਚਾਨਕ ਚੱਲਣ ਲੱਗੀ। ਕੁੱਝ ਹੀ ਦੇਰ ਵਿੱਚ ਗੱਡੀ ਬਿਨਾਂ ਡਰਾਈਵਰ ਅਤੇ ਗਾਰਡ ਦੇ ਅੱਸੀ ਦੀ ਰਫ਼ਤਾਰ ਨਾਲ ਪਠਾਨਕੋਟ ਵੱਲ ਵਧਣ ਲੱਗੀ। ਟਰੇਨ 84 ਕਿਲੋਮੀਟਰ ਤੱਕ ਬਿਨਾਂ ਡਰਾਈਵਰ ਦੇ ਚੱਲਦੀ ਰਹੀ। ਹੁਣ ਰੇਲਵੇ ਨੇ ਇਸ ਘਟਨਾ ਨੂੰ ਲੈ ਕੇ ਜਾਂਚ ਟੀਮ ਬਣਾਈ ਹੈ ਜੋ ਇਸ ਦੀ ਜਾਂਚ ਕਰੇਗੀ।
ਟਰੇਨ ਆਪਣੇ ਆਪ ਰੁਕ ਗਈ
ਜਾਣਕਾਰੀ ਦਿੰਦਿਆਂ ਰੇਲਵੇ ਅਧਿਕਾਰੀ ਨੇ ਦੱਸਿਆ ਕਿ ਇਸ ਘਟਨਾ ਸਬੰਧੀ ਜਾਂਚ ਟੀਮ ਦਾ ਗਠਨ ਕਰ ਦਿੱਤਾ ਗਿਆ ਹੈ। ਅਸੀਂ ਆਪਣੇ ਪੱਖ ਤੋਂ ਵੀ ਇਸ ਘਟਨਾ ਦੀ ਜਾਂਚ ਕਰ ਰਹੇ ਹਾਂ। ਮਾਲ ਗੱਡੀ ਕਿਧਰੇ ਨਹੀਂ ਜਾ ਰਹੀ ਸੀ, ਬੱਸ ਖੜ੍ਹੀ ਸੀ। ਇਹ ਪਠਾਨਕੋਟ ਦੇ ਸਾਹਮਣੇ ਉਚੀ ਬੱਸੀ ਵਿਖੇ ਆਪਣੇ ਆਪ ਰੁਕ ਗਈ।
ਜਾਂਚ ਤੋਂ ਬਾਅਦ ਕਾਰਵਾਈ ਕੀਤੀ ਜਾਵੇਗੀ
ਰੇਲਵੇ ਅਧਿਕਾਰੀ ਨੇ ਅੱਗੇ ਦੱਸਿਆ ਕਿ ਇਸ ਘਟਨਾ ਵਿੱਚ ਕੋਈ ਜਾਨੀ ਜਾਂ ਮਾਲੀ ਨੁਕਸਾਨ ਨਹੀਂ ਹੋਇਆ ਪਰ ਫਿਰ ਵੀ ਅਸੀਂ ਇਸ ਘਟਨਾ ਨੂੰ ਬਹੁਤ ਗੰਭੀਰਤਾ ਨਾਲ ਲੈ ਰਹੇ ਹਾਂ। ਇਸ ਲਈ ਉੱਚ ਪੱਧਰੀ ਜਾਂਚ ਕਮੇਟੀ ਬਣਾਈ ਗਈ ਹੈ ਜੋ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਜਾਂਚ ਤੋਂ ਬਾਅਦ ਹੀ ਕੋਈ ਕਾਰਵਾਈ ਕੀਤੀ ਜਾਵੇਗੀ।
ਡਰਾਈਵਰ ਹੈਂਡਬ੍ਰੇਕ ਲਗਾਉਣਾ ਭੁੱਲ ਗਿਆ
ਦੱਸ ਦੇਈਏ ਕਿ ਐਤਵਾਰ 15 ਫਰਵਰੀ ਸਵੇਰੇ ਕਰੀਬ 7 ਵਜੇ ਜੰਮੂ ਦੇ ਕਠੂਆ ਤੋਂ ਇਕ ਮਾਲ ਗੱਡੀ ਅਚਾਨਕ ਚੱਲਣ ਲੱਗੀ। ਲੰਘਦੇ ਸਮੇਂ ਮਾਲ ਗੱਡੀ ਨੇ ਰਫ਼ਤਾਰ ਫੜੀ ਅਤੇ ਹੁਸ਼ਿਆਰਪੁਰ ਦੇ ਉਚੀ ਬੱਸੀ ਕੋਲ ਰੁਕੀ। ਮੀਡੀਆ ਰਿਪੋਰਟਾਂ ਮੁਤਾਬਕ ਮਾਲ ਗੱਡੀ ਦਾ ਡਰਾਈਵਰ ਅਤੇ ਗਾਰਡ ਚਾਹ ਪੀਣ ਲਈ ਹੇਠਾਂ ਉਤਰੇ ਸਨ। ਇਸ ਦੌਰਾਨ ਮਾਲ ਗੱਡੀ ਦਾ ਇੰਜਣ ਚੱਲ ਰਿਹਾ ਸੀ ਅਤੇ ਹੈਂਡਬ੍ਰੇਕ ਵੀ ਨਹੀਂ ਲੱਗੀ ਸੀ, ਜਿਸ ਕਾਰਣ ਮਾਲ ਗੱਡੀ ਨੇ ਰਫਤਾਰ ਫੜ ਲਈ।