ਖ਼ਬਰਿਸਤਾਨ ਨੈੱਟਵਰਕ: ਈਰਾਨ-ਅਮਰੀਕਾ ਅਤੇ ਇਜ਼ਰਾਈਲ ਵਿਚਾਲੇ ਜਾਰੀ ਜੰਗ ਦੇ ਦੌਰਾਨ ਈਰਾਨ ਨੇ ਸਾਫ਼ ਕਰ ਦਿੱਤਾ ਹੈ ਕਿ ਜਦੋਂ ਤੱਕ ਸਾਰੀਆਂ ਆਰਥਿਕ ਪਾਬੰਦੀਆਂ ਨਹੀਂ ਹਟਾਈਆਂ ਜਾਂਦੀਆਂ ਅਤੇ ਯੁੱਧ ਵਿੱਚ ਹੋਏ ਨੁਕਸਾਨ ਦਾ ਮੁਆਵਜ਼ਾ ਨਹੀਂ ਮਿਲਦਾ, ਉਦੋਂ ਤੱਕ ਜੰਗ ਜਾਰੀ ਰਹੇਗੀ। ਰਿਪੋਰਟਾਂ ਮੁਤਾਬਕ ਦੂਜੇ ਪਾਸੇ ਟਰੰਪ ਨੇ ਗੱਲਬਾਤ ਦਾ ਦਾਅਵਾ ਕੀਤਾ ਹੈ, ਪਰ ਤੇਹਰਾਨ ਨੇ ਇਸ ਨੂੰ ‘ਫੇਕ ਨਿਊਜ਼’ (ਝੂਠੀ ਖ਼ਬਰ) ਦੱਸਿਆ ਹੈ। ਈਰਾਨੀ ਸੁਪਰੀਮ ਲੀਡਰ ਮੁਜਤਬਾ ਖਾਮੇਨੇਈ ਦੇ ਸੀਨੀਅਰ ਫੌਜੀ ਸਲਾਹਕਾਰ ਮੋਹਸਿਨ ਰਜ਼ਈ ਨੇ ਕਿਹਾ ਕਿ ਈਰਾਨ ਦੀਆਂ ਸ਼ਰਤਾਂ ਸਪੱਸ਼ਟ ਹਨ—ਸਾਰੀਆਂ ਆਰਥਿਕ ਪਾਬੰਦੀਆਂ ਹਟਾਈਆਂ ਜਾਣ ਅਤੇ ਅਮਰੀਕਾ ਵੱਲੋਂ ਭਵਿੱਖ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਦਖਲਅੰਦਾਜ਼ੀ ਨਾ ਕਰਨ ਦੀ ਠੋਸ ਗਾਰੰਟੀ ਦਿੱਤੀ ਜਾਵੇ।
ਈਰਾਨ ਦੀ ਚੇਤਾਵਨੀ— ਅੱਖ ਦੇ ਬਦਲੇ ਅੱਖ ਨਹੀਂ, ਸਿਰ ਦੇ ਬਦਲੇ ਸਿਰ
ਮੋਹਸਿਨ ਰਜ਼ਈ ਨੇ ਆਪਣੇ ਬਿਆਨ ਵਿੱਚ ਬੇਹੱਦ ਹਮਲਾਵਰ ਰੁਖ਼ ਅਪਣਾਉਂਦੇ ਹੋਏ ਕਿਹਾ ਕਿ, ਇਸ ਵਾਰ ਈਰਾਨ ਦਾ ਜਵਾਬ ਪਹਿਲਾਂ ਵਰਗਾ ਨਹੀਂ ਹੋਵੇਗਾ। ਉਹਨਾਂ ਦਾ ਕਹਿਣਾ ਸੀ ਕਿ, ਹੁਣ ਇਹ ‘ਅੱਖ ਦੇ ਬਦਲੇ ਅੱਖ’ ਵਾਲਾ ਜਵਾਬ ਨਹੀਂ ਹੋਵੇਗਾ, ਸਗੋਂ ‘ਸਿਰ ਦੇ ਬਦਲੇ ਸਿਰ’ ਵਰਗਾ ਜਵਾਬ ਦਿੱਤਾ ਜਾਵੇਗਾ। ਉਨ੍ਹਾਂ ਨੇ ਚੇਤਾਵਨੀ ਦਿੱਤੀ ਕਿ ਜੇਕਰ ਸੰਘਰਸ਼ ਵਧਿਆ, ਤਾਂ ਵਿਰੋਧੀ ਦੇਸ਼ਾਂ ਨੂੰ ਪੂਰੇ ਗਲਫ਼ (ਖਾੜੀ) ਖੇਤਰ ਤੋਂ ਪਿੱਛੇ ਹਟਣਾ ਪੈ ਸਕਦਾ ਹੈ।
ਰਜ਼ਈ ਬੋਲੇ— ਜੰਗ ਇੱਕ ਹਫ਼ਤੇ ਵਿੱਚ ਖ਼ਤਮ ਹੋ ਸਕਦੀ ਸੀ
ਮੋਹਸਿਨ ਰਜ਼ਈ ਨੇ ਕਿਹਾ ਕਿ ਇਹ ਜੰਗ ਇੱਕ ਹਫ਼ਤੇ ਦੇ ਅੰਦਰ ਹੀ ਖ਼ਤਮ ਹੋ ਸਕਦੀ ਸੀ, ਪਰ ਇਜ਼ਰਾਈਲ ਕਾਰਨ ਇਹ ਜਾਰੀ ਰਹੀ। ਰਜ਼ਈ ਦੇ ਮੁਤਾਬਕ, ਅਮਰੀਕਾ ਜੰਗਬੰਦੀ (ਸੀਜ਼ਫਾਇਰ) ਲਈ ਤਿਆਰ ਸੀ ਅਤੇ ਸੰਘਰਸ਼ ਖ਼ਤਮ ਕਰਨ ਦੀ ਦਿਸ਼ਾ ਵਿੱਚ ਅੱਗੇ ਵਧ ਰਿਹਾ ਸੀ। ਹਾਲਾਂਕਿ, ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਹਮਲੇ ਜਾਰੀ ਰੱਖਣ ‘ਤੇ ਜ਼ੋਰ ਦਿੱਤਾ, ਜਿਸ ਕਾਰਨ ਜੰਗ ਲੰਬੀ ਖਿੱਚ ਗਈ। ਉਨ੍ਹਾਂ ਦਾਅਵਾ ਕੀਤਾ ਕਿ ਜੰਗ ਦੇ 15ਵੇਂ ਦਿਨ ਤੋਂ ਬਾਅਦ ਅਮਰੀਕਾ ਨੂੰ ਵੀ ਇਹ ਸਮਝ ਆ ਗਿਆ ਸੀ ਕਿ ਇਸ ਸੰਘਰਸ਼ ਵਿੱਚ ਜਿੱਤ ਦਾ ਕੋਈ ਰਸਤਾ ਨਹੀਂ ਹੈ।
