ਰੇਲਗੱਡੀ ਦੇ ਫਰਸਟ ਏਸੀ ਕੋਚ ਦੇ ਇੱਕ ਕੈਬਿਨ ਨੂੰ ਵਿਆਹ ਵਾਲੇ ਕਮਰੇ ਵਾਂਗ ਸਜਾਉਣ ਦਾ ਮਾਮਲਾ ਸੋਸ਼ਲ ਮੀਡੀਆ ‘ਤੇ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਭਾਰਤੀ ਰੇਲਵੇ ਨੇ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਸੰਬੰਧਤ ਟਿਕਟ ਚੈਕਰ (TTE) ਨੂੰ ਮੁਅੱਤਲ ਕਰ ਦਿੱਤਾ ਹੈ ਅਤੇ ਵਿਭਾਗੀ ਜਾਂਚ ਦੇ ਹੁਕਮ ਜਾਰੀ ਕਰ ਦਿੱਤੇ ਹਨ।
ਰੇਲਵੇ ਮੰਤਰਾਲੇ ਮੁਤਾਬਕ, 6 ਜੁਲਾਈ 2026 ਨੂੰ ਨੰਦੀਗ੍ਰਾਮ ਐਕਸਪ੍ਰੈਸ (ਟ੍ਰੇਨ ਨੰਬਰ 11002) ਵਿੱਚ ਸਫ਼ਰ ਕਰ ਰਹੇ ਇੱਕ ਜੋੜੇ ਨੇ ਆਪਣੇ ਫਰਸਟ ਏਸੀ ਕੈਬਿਨ ਨੂੰ ਸਜਾਉਣ ਲਈ ਆਨਲਾਈਨ ਇੱਕ ਨਿੱਜੀ ਡੈਕੋਰੇਟਰ ਨੂੰ ਬੁਲਾਇਆ ਸੀ।
ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਡੈਕੋਰੇਟਰ ਦੀ ਟ੍ਰੇਨ ਵਿੱਚ ਐਂਟਰੀ ਲਈ ਰੇਲਵੇ ਤੋਂ ਕੋਈ ਅਧਿਕਾਰਤ ਮਨਜ਼ੂਰੀ ਨਹੀਂ ਲਈ ਗਈ ਸੀ। ਰੇਲਵੇ ਨੇ ਇਸ ਨੂੰ ਸੁਰੱਖਿਆ ਵਿੱਚ ਗੰਭੀਰ ਲਾਪਰਵਾਹੀ ਮੰਨਦਿਆਂ ਸੰਬੰਧਤ TTE ਨੂੰ ਤੁਰੰਤ ਪ੍ਰਭਾਵ ਨਾਲ ਮੁਅੱਤਲ ਕਰ ਦਿੱਤਾ ਹੈ।
ਵੀਡੀਓ ਵਿੱਚ ਕੈਬਿਨ ਨੂੰ ਲਾਲ ਗੁਲਾਬਾਂ, ਰੰਗ-ਬਿਰੰਗੇ ਗੁਬਾਰਿਆਂ, ਫੁੱਲਾਂ ਦੀਆਂ ਲੜੀਆਂ ਅਤੇ ਲਾਈਟਾਂ ਨਾਲ ਸਜਾਇਆ ਗਿਆ ਸੀ। ਇਸ ਨੂੰ ਦੇਖ ਕੇ ਸੋਸ਼ਲ ਮੀਡੀਆ ‘ਤੇ ਲੋਕਾਂ ਨੇ ਇਸ ਨੂੰ ‘ਹਨੀਮੂਨ ਸੂਟ’ ਅਤੇ ‘ਸੁਹਾਗਰਾਤ ਐਕਸਪ੍ਰੈਸ’ ਵਰਗੇ ਨਾਂ ਦੇਣੇ ਸ਼ੁਰੂ ਕਰ ਦਿੱਤੇ।ਰੇਲਵੇ ਨੇ ਕਿਹਾ ਹੈ ਕਿ ਪੂਰੇ ਮਾਮਲੇ ਦੀ ਵਿਸਤ੍ਰਿਤ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਜਾਂਚ ਰਿਪੋਰਟ ਦੇ ਆਧਾਰ ‘ਤੇ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।
ਹਾਲਾਂਕਿ, ਰੇਲਵੇ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਜੇਕਰ ਕੋਈ ਯਾਤਰੀ ਪੂਰਾ ਕੈਬਿਨ ਬੁੱਕ ਕਰਨ ਤੋਂ ਬਾਅਦ ਆਪਣੇ ਪੱਧਰ ‘ਤੇ ਸਜਾਵਟ ਕਰਦਾ ਹੈ ਤਾਂ ਇਸ ‘ਤੇ ਕੋਈ ਇਤਰਾਜ਼ ਨਹੀਂ ਹੈ। ਪਰ ਬਿਨਾਂ ਮਨਜ਼ੂਰੀ ਕਿਸੇ ਬਾਹਰੀ ਵਿਅਕਤੀ ਜਾਂ ਡੈਕੋਰੇਟਰ ਨੂੰ ਟ੍ਰੇਨ ਵਿੱਚ ਦਾਖਲ ਕਰਵਾਉਣਾ ਨਿਯਮਾਂ ਦੇ ਉਲਟ ਹੈ ਅਤੇ ਇਸ ਨੂੰ ਸੁਰੱਖਿਆ ਨਾਲ ਜੁੜੀ ਗੰਭੀਰ ਲਾਪਰਵਾਹੀ ਮੰਨਿਆ ਜਾਂਦਾ ਹੈ।
