ਦਿੱਲੀ ਦੇ ਸੀਮਾਪੁਰੀ ਇਲਾਕੇ 'ਚ ਇੱਕ ਕਲੱਬ ਦੇ ਬਾਹਰ ਹਥਿਆਰਬੰਦ ਬਦਮਾਸ਼ਾਂ ਨੇ ਅੰਨ੍ਹੇਵਾਹ ਗੋਲੀਆਂ ਚਲਾ ਦਿੱਤੀਆਂ। ਹੁਣ ਇਸ ਘਟਨਾ ਦੀ ਸੀਸੀਟੀਵੀ ਫੁਟੇਜ ਵੀ ਸਾਹਮਣੇ ਆਈ ਹੈ। ਜਿਸ 'ਚ ਸਾਫ ਦੇਖਿਆ ਜਾ ਸਕਦਾ ਹੈ ਕਿ ਕਿਸ ਤਰ੍ਹਾਂ ਪਿਸਤੌਲ ਨਾਲ ਬਦਮਾਸ਼ ਮਹਿਲਾ ਸਮੇਤ ਕਲੱਬ ਦੇ ਬਾਊਂਸਰ ਨੂੰ ਧਮਕੀਆਂ ਦੇ ਰਹੇ ਹਨ।
ਸੀਸੀਟੀਵੀ 'ਚ ਪਿਸਤੌਲ ਤਾਣਦੇ ਹੋਏ ਨਜ਼ਰ ਆਏ ਬਦਮਾਸ਼
ਸੀਸੀਟੀਵੀ 'ਚ ਤਿੰਨ ਬਦਮਾਸ਼ ਵੀ ਕਲੱਬ ਵੱਲ ਜਾਂਦੇ ਵੇਖੇ ਜਾ ਸਕਦੇ ਹਨ। ਇਨ੍ਹਾਂ 'ਚੋਂ ਦੋ ਕੋਲ ਬੰਦੂਕਾਂ ਹਨ ਅਤੇ ਉਹ ਕਲੱਬ ਦੇ ਬਾਹਰ ਮੌਜੂਦ ਬਾਊਂਸਰਾਂ ਨੂੰ ਧਮਕੀਆਂ ਦੇ ਰਹੇ ਹਨ। ਉਨ੍ਹਾਂ ਚ ਇੱਕ ਪੁਰਸ਼ ਕਲੱਬ ਦੇ ਤਿੰਨ ਬਾਊਂਸਰਾ ਨੂੰ ਗੋਡਿਆਂ ਭਾਰ ਬੈਠਣ ਲਈ ਕਹਿ ਰਿਹਾ ਹੈ। ਜਿਸ 'ਚ ਇੱਕ ਔਰਤ ਵੀ ਸ਼ਾਮਲ ਹੈ |
ਬਦਮਾਸ਼ ਉਨ੍ਹਾਂ 'ਤੇ ਬੰਦੂਕ ਤਾਣ ਕੇ ਕਹਿੰਦਾ ਹੈ ਕਿ ਜੇਕਰ ਤੁਸੀਂ ਉੱਠੇ ਤਾਂ ਮੈਂ ਤੁਹਾਡੇ ਸਿਰ 'ਚ ਗੋਲੀ ਮਾਰ ਦਿਆਂਗਾ। ਇਸ ਤੋਂ ਬਾਅਦ ਮੁਲਜ਼ਮਾਂ ਨੇ ਕਲੱਬ ਦੇ ਮਾਲਕ ਨਾਲ ਗਾਲਾਂ ਕੱਢਦੇ ਹੋਏ ਅਤੇ ਕਈ ਰਾਉਂਡ ਫਾਇਰ ਕੀਤੇ। ਫਾਇਰਰਿੰਗ ਤੋਂ ਬਾਅਦ ਉਹ ਭੱਜ ਗਏ।
ਇਕ ਦੋਸ਼ੀ ਨੂੰ ਪੁਲਸ ਨੇ ਕੀਤਾ ਗ੍ਰਿਫਤਾਰ
ਦੱਸਿਆ ਜਾ ਰਿਹਾ ਹੈ ਕਿ ਬਦਮਾਸ਼ਾਂ ਨੇ ਕਲੱਬ ਮਾਲਕ ਤੋਂ ਪੈਸੇ ਵਸੂਲਣ ਲਈ ਗੋਲੀਆਂ ਚਲਾਈਆਂ ਸਨ। ਇਸ ਗੋਲੀਬਾਰੀ 'ਚ ਕਿਸੇ ਜਾਨੀ ਨੁਕਸਾਨ ਦੀ ਕੋਈ ਖ਼ਬਰ ਨਹੀਂ ਹੈ। ਪੁਲਸ ਨੇ ਦੱਸਿਆ ਕਿ ਗਾਜ਼ੀਆਬਾਦ ਦੇ ਰਹਿਣ ਵਾਲੇ ਸ਼ਾਹਰੁਖ ਨਾਂ ਦੇ ਦੋਸ਼ੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੁਲਸ ਨੇ ਦੱਸਿਆ ਕਿ ਬਾਕੀ ਦੋਸ਼ੀਆਂ ਦੀ ਭਾਲ ਜਾਰੀ ਹੈ।