ਪੰਜਾਬ ਦੇ ਰੇਲਵੇ ਸਟੇਸ਼ਨਾਂ 'ਤੇ ਰੇਲ ਯਾਤਰੀਆਂ ਦੀ ਸਹੂਲਤ ਲਈ ਆਟੋਮੈਟਿਕ ਟਿਕਟ ਵੈਂਡਿੰਗ ਮਸ਼ੀਨ (ਏ.ਟੀ.ਵੀ.ਐਮ.) ਮਸ਼ੀਨਾਂ ਲਗਾਈਆਂ ਜਾ ਰਹੀਆਂ ਹਨ ਤਾਂ ਜੋ ਰੇਲ ਯਾਤਰੀਆਂ ਨੂੰ ਬਿਨਾਂ ਰਾਖਵੇਂ ਟਿਕਟਾਂ ਪ੍ਰਾਪਤ ਕਰ ਸਕਣ। ਲੁਧਿਆਣਾ ਸਟੇਸ਼ਨ 'ਤੇ ਅਜਿਹੀਆਂ ਚਾਰ ਮਸ਼ੀਨਾਂ ਲਗਾਈਆਂ ਗਈਆਂ ਹਨ। ਇਹ ਫੈਸਲਾ ਯਾਤਰੀਆਂ ਦੀ ਵਧਦੀ ਭੀੜ ਦੇ ਮੱਦੇਨਜ਼ਰ ਲਿਆ ਗਿਆ ਹੈ।
ਜਾਣਕਾਰੀ ਦਿੰਦਿਆਂ ਸੀਨੀਅਰ ਡਿਵੀਜ਼ਨਲ ਕਮਰਸ਼ੀਅਲ ਮੈਨੇਜਰ ਪਰਮਦੀਪ ਸਿੰਘ ਸੈਣੀ ਨੇ ਦੱਸਿਆ ਕਿ ਇਹ ਫੈਸਲਾ ਇਸ ਲਈ ਲਿਆ ਗਿਆ ਹੈ ਤਾਂ ਜੋ ਯਾਤਰੀਆਂ ਨੂੰ ਟਿਕਟਾਂ ਲੈਣ ਵਿੱਚ ਕੋਈ ਦਿੱਕਤ ਨਾ ਆਵੇ ਅਤੇ ਜ਼ਿਆਦਾ ਭੀੜ ਨਾ ਹੋਵੇ।
ਜਲੰਧਰ ਸਮੇਤ ਇਨ੍ਹਾਂ ਸਟੇਸ਼ਨਾਂ 'ਤੇ ਲਗਾਈਆਂ ਜਾਣਗੀਆਂ ਮਸ਼ੀਨਾਂ
ਇਸ ਦੇ ਨਾਲ ਹੀ ਲੁਧਿਆਣਾ ਤੋਂ ਤੁਰੰਤ ਬਾਅਦ ਜਲੰਧਰ ਸ਼ਹਿਰ, ਜਲੰਧਰ ਕੈਂਟ, ਫ਼ਿਰੋਜ਼ਪੁਰ ਛਾਉਣੀ, ਢੰਡਾਰੀ ਕਲਾਂ, ਫਗਵਾੜਾ, ਬਿਆਸ, ਅੰਮਿ੍ਤਸਰ, ਪਠਾਨਕੋਟ, ਪਠਾਨਕੋਟ ਕੈਂਟ, ਜੰਮੂ ਤਵੀ, ਸ਼ਹੀਦ ਕੈਪਟਨ ਤੁਸ਼ਾਰ ਮਹਾਜਨ, ਸ਼੍ਰੀ ਮਾਤਾ ਵੈਸ਼ਨੋ ਦੇਵੀ ਕਟੜਾ ਰੇਲਵੇ ਸਟੇਸ਼ਨਾਂ 'ਤੇ ਵਿਖੇ ਵੀ ਨਵੀਆਂ ਏ.ਟੀ.ਵੀ.ਐਮ ਮਸ਼ੀਨਾਂ ਲਗਾਈਆਂ ਗਈਆਂ |
ਟਿਕਟਾਂ ਖਰੀਦਣਾ ਹੋਵੇਗਾ ਆਸਾਨ
ATVM ਮਸ਼ੀਨ ਤੋਂ ਬਿਨਾਂ ਰਾਖਵੇਂ ਟਿਕਟਾਂ ਖਰੀਦਣੀਆਂ ਬਹੁਤ ਆਸਾਨ ਹਨ। ਰੇਲਵੇ ਮੁਸਾਫਰਾਂ ਨੂੰ ਰੇਲਵੇ ਕਾਊਂਟਰ ਤੋਂ ਅਣਰਿਜ਼ਰਵਡ ਟਿਕਟਾਂ ਖਰੀਦਣ ਲਈ ਕਤਾਰਾਂ ਵਿੱਚ ਨਹੀਂ ਖੜ੍ਹਨਾ ਪਵੇਗਾ ਅਤੇ ਨਾ ਹੀ ਖੁੱਲੇ ਪੈਸਿਆਂ ਦੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪਵੇਗਾ।
ਬਣਾਉਣਾ ਹੋਵੇਗਾ ਸਮਾਰਟ ਕਾਰਡ
ਟਿਕਟਾਂ ਖਰੀਦਣ ਲਈ ਰੇਲਵੇ ਯਾਤਰੀਆਂ ਨੂੰ ਏ.ਟੀ.ਵੀ.ਐਮ ਸਹਾਇਕ ਨਾਲ ਸੰਪਰਕ ਕਰਨਾ ਚਾਹੀਦਾ ਹੈ ਜਾਂ ਬੁਕਿੰਗ ਕਾਊਂਟਰ 'ਤੇ ਆਪਣਾ ਸਮਾਰਟ ਕਾਰਡ ਬਣਾ ਸਕਦੇ ਹਨ ਜਾਂ ਕਿਊਆਰ ਕੋਡ ਨੂੰ ਵੀ ਸਕੈਨ ਕਰ ਸਕਦੇ ਹਨ ਅਤੇ ਸਧਾਰਨ ਤਰੀਕੇ ਨਾਲ ਡਿਜੀਟਲ ਭੁਗਤਾਨ ਕਰਕੇ ਆਪਣੀ ਯਾਤਰਾ ਦੀ ਟਿਕਟ ਬਣਵਾ ਸਕਦੇ ਹਨ।
ਇਸ ਤਰ੍ਹਾਂ ਕਰੇਗਾ ਕੰਮ
ATVM ਤੋਂ ਟਿਕਟ ਖਰੀਦਣ ਲਈ, ਸਭ ਤੋਂ ਪਹਿਲਾਂ ਯਾਤਰੀ ਨੇ ਜਿਸ ਸਟੇਸ਼ਨ ਦੀ ਟਿਕਟ ਖਰੀਦਣੀ ਹੈ ਉਸ ਸਟੇਸ਼ਨ ਦਾ ਨਕਸ਼ਾ ਜਾਂ ਉਸਦਾ ਨਾਮ ਲਿਖ ਕੇ ਸਿਲੇਕਟ ਕਰ ਸਕਦੀ ਹੈ। ਸਟੇਸ਼ਨ ਦੀ ਚੋਣ ਕਰਨ ਤੋਂ ਬਾਅਦ, ਯਾਤਰੀ ਨੂੰ ਉਸ ਟਰੇਨ ਦੀ ਕਲਾਸ ਚੁਣਨੀ ਪਵੇਗੀ ਜਿਸ ਵਿੱਚ ਉਹ ਸਫਰ ਕਰਨਾ ਚਾਹੁੰਦਾ ਹੈ। ਇਸ ਤੋਂ ਬਾਅਦ ਟਿਕਟ ਦਾ ਕਿਰਾਇਆ ਦੇਣਾ ਹੋਵੇਗਾ।
ਇਸ ਤੋਂ ਬਾਅਦ ਮਸ਼ੀਨ ਤੋਂ ਪ੍ਰਿੰਟ ਕੀਤੀ ਟਿਕਟ ਬਾਹਰ ਆ ਜਾਵੇਗੀ। ਇਸ ਮਸ਼ੀਨ ਰਾਹੀਂ ਯਾਤਰੀ ਮਾਸਿਕ ਸੀਜ਼ਨ ਟਿਕਟ (MST) ਅਤੇ ਪਲੇਟਫਾਰਮ ਟਿਕਟ ਦਾ ਨਵੀਨੀਕਰਨ ਵੀ ਕਰ ਸਕਦੇ ਹਨ। ਰੇਲਵੇ ਯਾਤਰੀ ਟਿਕਟ ਦੀ ਅਸਲ ਕੀਮਤ ਅਦਾ ਕਰਕੇ ਆਸਾਨੀ ਨਾਲ ਆਪਣੀ ਟਿਕਟ ਪ੍ਰਾਪਤ ਕਰ ਸਕਣਗੇ।