ਖਬਰਿਸਤਾਨ ਨੈੱਟਵਰਕ- ਦੱਖਣੀ ਭਾਰਤ ਦੇ ਪ੍ਰਸਿੱਧ ਧਾਰਮਿਕ ਅਸਥਾਨਾਂ ਦੇ ਦਰਸ਼ਨ ਕਰਨ ਦੇ ਚਾਹਵਾਨਾਂ ਲਈ ਖੁਸ਼ਖਬਰੀ ਹੈ। ਭਾਰਤੀ ਰੇਲਵੇ ਨੇ ਸ਼ਰਧਾਲੂਆਂ ਲਈ ਭਾਰਤ ਗੌਰਵ ਟ੍ਰੇਨ ਚਲਾਉਣ ਦਾ ਫੈਸਲਾ ਕੀਤਾ ਹੈ। ਇਹ ਵਿਸ਼ੇਸ਼ ਟ੍ਰੇਨ 28 ਜੁਲਾਈ ਨੂੰ ਦੱਖਣੀ ਭਾਰਤ ਦੀ ਬ੍ਰਹਮ ਯਾਤਰਾ 'ਤੇ ਰਵਾਨਾ ਹੋ ਰਹੀ ਹੈ।
ਦੱਖਣੀ ਭਾਰਤ ਦੇ ਪ੍ਰਸਿੱਧ ਧਾਰਮਕ ਅਸਥਾਨਾਂ ਦੇ ਕਰਵਾਏਗੀ ਦਰਸ਼ਨ
ਰਿਪੋਰਟ ਮੁਤਾਬਕ 28 ਜੁਲਾਈ ਨੂੰ 13 ਦਿਨਾਂ ਦੀ ਸ਼ਾਨਦਾਰ ਯਾਤਰਾ ਪਠਾਨਕੋਟ ਕੈਂਟ ਸਟੇਸ਼ਨ ਤੋਂ ਸ਼ੁਰੂ ਹੋਵੇਗੀ ਅਤੇ ਯਾਤਰੀਆਂ ਨੂੰ ਦੱਖਣੀ ਭਾਰਤ ਦੇ ਪ੍ਰਮੁੱਖ ਤੀਰਥ ਅਸਥਾਨਾਂ ਜਿਵੇਂ ਕਿ ਤਿਰੂਪਤੀ, ਰਾਮੇਸ਼ਵਰਮ, ਮਦੁਰਾਈ, ਕੰਨਿਆਕੁਮਾਰੀ ਅਤੇ ਮੱਲੀਕਾਰਜੁਨ ਤੱਕ ਲੈ ਜਾਵੇਗੀ ਜੋ ਕਿ ਅਧਿਆਤਮਿਕ ਅਨੁਭਵ, ਸਹੂਲਤ ਅਤੇ ਕਿਫਾਇਤੀ ਦਰਾਂ ਦਾ ਇੱਕ ਵਿਲੱਖਣ ਸੰਗਮ ਹੋਵੇਗਾ।
ਇਹ ਟ੍ਰੇਨ (ਭਾਰਤ ਗੌਰਵ ਟ੍ਰੇਨ) ਪਠਾਨਕੋਟ ਕੈਂਟ ਸਟੇਸ਼ਨ ਤੋਂ ਚੱਲੇਗੀ। ਇਸਦੇ ਮੁੱਖ ਬੋਰਡਿੰਗ ਪੁਆਇੰਟਾਂ ਵਿੱਚ ਜਲੰਧਰ ਸ਼ਹਿਰ, ਲੁਧਿਆਣਾ, ਚੰਡੀਗੜ੍ਹ, ਅੰਬਾਲਾ ਕੈਂਟ, ਕੁਰੂਕਸ਼ੇਤਰ, ਕਰਨਾਲ, ਪਾਣੀਪਤ, ਸੋਨੀਪਤ, ਹਜ਼ਰਤ ਨਿਜ਼ਾਮੂਦੀਨ, ਮਥੁਰਾ, ਆਗਰਾ ਕੈਂਟ ਅਤੇ ਗਵਾਲੀਅਰ ਸ਼ਾਮਲ ਹਨ। ਕੁੱਲ ਮਿਲਾ ਕੇ, ਇਹ ਯਾਤਰਾ 12 ਰਾਤਾਂ ਅਤੇ 13 ਦਿਨਾਂ ਦੀ ਹੋਵੇਗੀ, ਜਿਸਦੀ ਵਾਪਸੀ 9 ਅਗਸਤ ਨੂੰ ਨਿਰਧਾਰਤ ਕੀਤੀ ਗਈ ਹੈ।
ਜਾਣਕਾਰੀ ਲਈ, ਯਾਤਰਾ ਲਈ ਸੀਟਾਂ ਦੀਆਂ ਤਿੰਨ ਸ਼੍ਰੇਣੀਆਂ ਉਪਲਬਧ ਹਨ - ਸਲੀਪਰ ਕਲਾਸ (640 ਸੀਟਾਂ), 3AC ਸਟੈਂਡਰਡ (70 ਸੀਟਾਂ), ਅਤੇ 2AC ਕੰਫਰਟ (50 ਸੀਟਾਂ)। ਕਿਰਾਇਆ ਵੀ ਕਾਫ਼ੀ ਕਿਫਾਇਤੀ ਹੈ। ਸਲੀਪਰ ਕਲਾਸ 30,135, 3AC ₹43,370 ਅਤੇ 2AC ₹57,470 ਪ੍ਰਤੀ ਵਿਅਕਤੀ (ਸਾਰੇ ਰੇਟ GST ਸਮੇਤ)।
ਇਸ ਪੈਕੇਜ ਵਿੱਚ ਰੇਲ ਟਿਕਟਾਂ ਦੇ ਨਾਲ-ਨਾਲ ਰੋਜ਼ਾਨਾ ਭੋਜਨ, ਆਰਾਮਦਾਇਕ ਰਿਹਾਇਸ਼, ਸੈਰ-ਸਪਾਟੇ ਲਈ AC/ਨਾਨ-AC ਬੱਸ, ਟੂਰ ਐਸਕਾਰਟ, ਸੁਰੱਖਿਆ ਅਤੇ ਮੁੱਢਲੀ ਸਹਾਇਤਾ ਸਹੂਲਤ ਆਦਿ ਸ਼ਾਮਲ ਹਨ।