ਖ਼ਬਰਿਸਤਾਨ ਨੈੱਟਵਰਕ:ਜਲੰਧਰ ਦੇ ਪਿਮਸ ਹਸਪਤਾਲ ਨੇੜੇ ਸਥਿਤ ‘ਕ੍ਰਿਸਟਲ ਸਪਾ ਸੈਂਟਰ’ ‘ਚ ਛਾਪਾ ਮਾਰਨ ਗਈ ਪੁਲਿਸ ਨਾਲ ਅਜੀਬ ਘਟਨਾ ਵਾਪਰੀ। ਜਿੱਥੇ ਪੁਲਿਸ ਖੁਦ ਹੀ ਸਪਾ ਸੈਂਟਰ ਦੇ ਅੰਦਰ ਫ਼ਸ ਗਈ ਤੇ ਅਖੀਰ ‘ਚ ਪੁਲਿਸ ਨੂੰ ਪੌੜੀਆਂ ਦਾ ਸਹਾਰਾ ਲੈ ਕੇ ਬਾਹਰ ਨਿਕਲਣਾ ਪਿਆ। ਜਾਣਕਾਰੀ ਅਨੁਸਾਰ ਪੁਲਿਸ ਨੂੰ ਇੱਕ ਸੂਚਨਾ ਮਿਲੀ ਸੀ ਕਿ ਜਿੱਥੇ ਨਾਜਾਇਜ਼ ਗਤੀਵਿਧੀਆਂ ਚੱਲ ਰਹੀਆਂ ਹਨ। ਜਿਸ ਕਾਰਣ ਪੁਲਿਸ ਰੇਡ ਕਰਨ ਪੁੱਜੀ।
ਪੁਲਿਸ ਟੀਮ ਦੇ ਪਹੁੰਚਣ ‘ਤੇ ਮਾਲਕ ਨੇ ਬਾਹਰੋਂ ਸ਼ਟਰ ਨੂੰ ਲੌਕ ਲਗਾ ਦਿੱਤਾ। ਜਿਸ ਕਰਨ ਪੁਲਿਸ ਅੰਦਰ ਹੀ ਬੰਦ ਹੋ ਗਈ। ਹਾਲਾਂਕਿ ਪੁਲਿਸ ਨੇ ਨਾਲ ਲੱਗਦੀ ਇਮਾਰਤ ਰਾਹੀ ਨਵੀਂ ਬਾਹਰ ਨਿਕਲਣ ਦੀ ਕੋਸ਼ਿਸ਼ ਕੀਤੀ, ਪਰ ਅਸਫਲ ਰਹੇ। ਦੱਸ ਦੇਈਏ ਕਿ ਇਮਾਰਤ ਅੰਦਰ ਥਾਣਾ ਨੰਬਰ 7 ਦੀ ਇੱਕ ਮਹਿਲਾ ਮੁਲਾਜ਼ਮ ਅਤੇ ਤਿੰਨ ਪੁਲਿਸ ਕਰਮਚਾਰੀ ਕਰੀਬ ਡੇਢ ਘੰਟੇ ਤੱਕ ਫਸੇ ਰਹੇ। ਹੈਰਾਨੀ ਦੀ ਗੱਲ ਇਹ ਸੀ ਕਿ ਸਪਾ ਸੈਂਟਰ ਦੇ ਤਾਲੇ ਲੱਗੇ ਹੋਏ ਸਨ ਪਰ ਅੰਦਰ ਏਸੀ (AC) ਚੱਲ ਰਹੇ ਸਨ, ਜਿਸ ਤੋਂ ਸਾਫ਼ ਸੀ ਕਿ ਪੁਲਿਸ ਦੇ ਆਉਣ ਤੋਂ ਕੁਝ ਮਿੰਟ ਪਹਿਲਾਂ ਹੀ ਸਭ ਉੱਥੋਂ ਭੱਜੇ ਸਨ।
ਕਾਫੀ ਕੋਸ਼ਿਸ਼ਾਂ ਤੋਂ ਬਾਅਦ ਵੀ ਇਮਾਰਤ ਦੀ ਚਾਬੀ ਨਾ ਮਿਲੀ, ਤਾਂ ਪੁਲਿਸ ਨੂੰ ਮੌਕੇ ‘ਤੇ ਸੀੜ੍ਹੀ ਮੰਗਵਾਉਣੀ ਪਈ। ਇਸ ਤੋਂ ਬਾਅਦ ਮਹਿਲਾ ਮੁਲਾਜ਼ਮ ਅਤੇ ਹੋਰ ਕਰਮਚਾਰੀਆਂ ਨੂੰ ਸੀੜ੍ਹੀ ਦੇ ਰਸਤੇ ਹੇਠਾਂ ਉਤਾਰਿਆ ਗਿਆ। ਥਾਣਾ 7 ਦੀ ਪੁਲਿਸ ਦਾ ਕਹਿਣਾ ਹੈ ਕਿ ਸਪਾ ਸੈਂਟਰ ਦਾ ਮਾਲਕ ਭਾਵੇਂ ਮੌਕੇ ਤੋਂ ਫਰਾਰ ਹੋ ਗਿਆ ਹੈ, ਪਰ ਇਸ ਜਗ੍ਹਾ ‘ਤੇ ਲਗਾਤਾਰ ਨਜ਼ਰ ਰੱਖੀ ਜਾਵੇਗੀ ਅਤੇ ਬਣਦੀ ਕਾਰਵਾਈ ਕੀਤੀ ਜਾਵੇਗੀ।
