ਲੁਧਿਆਣਾ 'ਚ 11 ਸਾਲਾ ਬੱਚੀ ਦਾ ਦੁਪੱਟਾ ਝੂਲਾ ਝੂਲਦੇ ਸਮੇਂ ਉਸਦੇ ਗਲੇ ’ਚ ਫਸ ਗਿਆ ਤੇ ਦਮ ਘੁਟਣ ਕਾਰਨ ਬੱਚੀ ਦੀ ਮੌਤ ਹੋ ਗਈ। ਤੀਜ ਦੇ ਤਿਉਹਾਰ ਮੌਕੇ ਘਰ 'ਚ ਝੂਲਾ ਲਗਾਇਆ ਗਿਆ। ਹਾਦਸੇ ਦੇ ਸਮੇਂ ਘਰ 'ਚ ਸਿਰਫ ਮੀਨਾਕਸ਼ੀ ਦੀ ਛੋਟੀ ਭੈਣ ਅਤੇ ਭਰਾ ਹੀ ਸਨ | ਉਹ ਤਿੰਨਾਂ ਭੈਣ-ਭਰਾਵਾਂ 'ਚ ਸਭ ਤੋਂ ਵੱਡੀ ਸੀ |
ਮ੍ਰਿਤਕ ਲੜਕੀ ਦਾ ਨਾਂ ਮੀਨਾਕਸ਼ੀ ਸੀ | ਹਾਦਸੇ ਸਮੇਂ ਪਰਿਵਾਰ ਵਾਲੇ ਬਾਜ਼ਾਰ ਗਏ ਹੋਏ ਸਨ। ਉਹ ਚੌਥੀ ਜਮਾਤ ’ਚ ਪੜ੍ਹਦੀ ਸੀ। ਲੜਕੀ ਦੀ ਲਾਸ਼ ਅੱਜ ਪੋਸਟਮਾਰਟਮ ਤੋਂ ਬਾਅਦ ਪਰਿਵਾਰ ਨੂੰ ਸੌਂਪ ਦਿੱਤੀ ਗਈ ਹੈ।
ਤੀਜ ਦਾ ਸਾਮਾਨ ਲੈਣ ਗਏ ਸਨ ਬਾਜ਼ਾਰ
ਮੀਨਾਕਸ਼ੀ ਦੇ ਪਿਤਾ ਲਖਨਲਾਲ ਨੇ ਦੱਸਿਆ ਕਿ ਉਹ ਉੱਤਰਾਖੰਡ ਦਾ ਰਹਿਣ ਵਾਲਾ ਹੈ। ਉਹ ਲੁਧਿਆਣਾ ਦੇ ਮਾਡਲ ਟਾਊਨ ਇਲਾਕੇ ’ਚ ਰਹਿੰਦਾ ਹੈ। ਲਖਨਲਾਲ ਨੇ ਦੱਸਿਆ ਕਿ ਉਹ ਆਪਣੀ ਪਤਨੀ ਨਾਲ ਬੱਚਿਆਂ ਲਈ ਤੀਜ ਦਾ ਸਾਮਾਨ ਖਰੀਦਣ ਲਈ ਬਾਜ਼ਾਰ ਗਿਆ ਸੀ। ਜਦੋਂ ਉਹ ਘਰ ਪਰਤਿਆ ਤਾਂ ਬੱਚੀ ਜ਼ਮੀਨ 'ਤੇ ਪਈ ਸੀ। ਉਹ ਤੁਰੰਤ ਉਸ ਨੂੰ ਹਸਪਤਾਲ ਲੈ ਗਏ ਜਿੱਥੇ ਡਾਕਟਰ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।
ਹਾਦਸੇ ਸਮੇਂ ਛੋਟੇ ਭੈਣ-ਭਰਾ ਹੀ ਸਨ ਮੌਜੂਦ
ਜਾਂਚ ਅਧਿਕਾਰੀ ਸੀਨੀਅਰ ਕਾਂਸਟੇਬਲ ਗੁਰਮੁਖ ਸਿੰਘ ਨੇ ਦੱਸਿਆ ਕਿ ਲੜਕੀ ਮੀਨਾਕਸ਼ੀ ਦੇ ਪਿਤਾ ਲਖਨ ਲਾਲ ਢਾਬੇ 'ਤੇ ਤੰਦੂਰ 'ਤੇ ਕੰਮ ਕਰਦੇ ਹਨ। ਉਹ ਤਿੰਨ ਭੈਣ-ਭਰਾਵਾਂ ’ਚੋਂ ਸਭ ਤੋਂ ਵੱਡੀ ਸੀ। ਇਹ ਪਰਿਵਾਰ ਮਾਡਲ ਟਾਊਨ ’ਚ ਕਿਰਾਏ ਦੇ ਮਕਾਨ ਵਿੱਚ ਰਹਿੰਦਾ ਹੈ। ਪਰਿਵਾਰ ਨੇ ਪੁਲਿਸ ਨੂੰ ਦੱਸਿਆ ਕਿ ਉਨ੍ਹਾਂ ਨੇ ਛੱਤ ਦੀ ਹੁੱਕ ਵਿੱਚ ਝੂਲਾ ਲਾਇਆ ਸੀ। ਝੂਲੇ ਨੂੰ ਝੁਲਾਉਂਦੇ ਸਮੇਂ ਅਚਾਨਕ ਸਕਾਰਫ਼ ਉਸ ਦੇ ਗਲੇ ਵਿਚ ਫਸ ਗਿਆ ਅਤੇ ਉਸ ਦਾ ਦਮ ਘੁੱਟ ਗਿਆ।ਹਾਦਸੇ ਦੇ ਸਮੇਂ ਘਰ 'ਚ ਸਿਰਫ ਮੀਨਾਕਸ਼ੀ ਦੀ ਛੋਟੀ ਭੈਣ ਅਤੇ ਭਰਾ ਹੀ ਸਨ।
ਪਰਿਵਾਰ ਵਾਲਿਆਂ ਅਨੁਸਾਰ ਜਦੋਂ ਉਹ ਮੌਕੇ 'ਤੇ ਪਹੁੰਚੇ ਤਾਂ ਲੜਕੀ ਦੀ ਗਰਦਨ ਫਾਹੇ 'ਚ ਫਸੀ ਹੋਈ ਸੀ। ਗੁਰਮੁਖ ਸਿੰਘ ਅਨੁਸਾਰ ਸੀਸੀਟੀਵੀ ਕੈਮਰੇ ਵੀ ਚੈੱਕ ਕੀਤੇ ਗਏ ਹਨ। ਅੱਜ ਲੜਕੀ ਦਾ ਪੋਸਟਮਾਰਟਮ ਕਰਵਾ ਕੇ ਲਾਸ਼ ਦਾ ਸਸਕਾਰ ਕੀਤਾ ਜਾਵੇਗਾ।