ਖਬਰਿਸਤਾਨ ਨੈੱਟਵਰਕ- ਜ਼ਿਲ੍ਹਾ ਭਾਸ਼ਾ ਦਫ਼ਤਰ, ਫ਼ਾਜ਼ਿਲਕਾ ਅਤੇ ਸਾਹਿਤ ਸਭਾ ਜਲਾਲਾਬਾਦ ਵੱਲੋਂ ਨਾਟਕ "ਜਨਕ" ਲੋਕਾਂ ਦੇ ਰੂ-ਬਰੂ ਕੀਤਾ ਗਿਆ, ਇਸ ਨਾਟਕ ਦੀ ਪੇਸ਼ਕਾਰੀ ਲਈ ਸਾਹਿਤ ਸਭਾ ਦੇ ਪ੍ਰਧਾਨ ਗੋਪਾਲ ਬਜਾਜ ਨੇ ਜ਼ਿਲ੍ਹਾ ਭਾਸ਼ਾ ਅਫਸਰ, ਫ਼ਾਜ਼ਿਲਕਾ ਭੁਪਿੰਦਰ ਕੁਮਾਰ ਉਤਰੇਜਾ ਅਤੇ ਉਹਨਾਂ ਦੇ ਨਾਲ ਆਈ ਸਮੁੱਚੀ ਟੀਮ ਨੂੰ ਜੀ ਆਇਆਂ ਕਿਹਾ।
ਇਸ ਦੌਰਾਨ ਸਟੇਜ ਦੀ ਭੂਮਿਕਾ ਐਡਵੋਕੇਟ ਪ੍ਰੀਤੀ ਬੂਟਾ ਨੇ ਬਾਖੂਬੀ ਨਿਭਾਈ, ਸਾਹਿਤ ਸਭਾ ਦੇ ਕੈਸ਼ੀਅਰ ਜਸਕਰਨਜੀਤ ਸਿੰਘ ਅਤੇ ਸਰਪ੍ਰਸਤ ਸੂਬਾ ਸਿੰਘ ਨੰਬਰਦਾਰ ਨੇ ਆਖਿਆ ਕਿ ਅਜਿਹੇ ਨਾਟਕ ਕਰਾਉਣਾ ਸਮੇਂ ਦੀ ਜ਼ਰੂਰਤ ਹੈ। ਇਹ ਨਾਟਕ ਸਾਡਾ ਮਨੋਰੰਜਨ ਹੀ ਨਹੀਂ ਕਰਦੇ ਸਗੋਂ ਸਾਨੂੰ ਸਮਾਜ ਵਿੱਚ ਹੋ ਰਹੀਆਂ ਕੁਰੀਤੀਆਂ ਤੋਂ ਵੀ ਜਾਣੂ ਕਰਵਾਉਂਦੇ ਹਨ।
ਇਸ ਮੌਕੇ ਜ਼ਿਲ੍ਹਾ ਭਾਸ਼ਾ ਅਫਸਰ ਭੁਪਿੰਦਰ ਸਿੰਘ ਉਤਰੇਜਾ ਨੇ ਕਿਹਾ ਕਿ ਦੋ ਸਾਲ ਪਹਿਲਾਂ ਸਾਡੇ ਵੱਲੋਂ ਸਾਹਿਤ ਸਭਾ ਦੇ ਸਹਿਯੋਗ ਨਾਲ ਪ੍ਰਧਾਨ ਕੁਲਦੀਪ ਸਿੰਘ ਬਰਾੜ ਦੀ ਅਗਵਾਈ ਵਿੱਚ ਇੱਕ ਨਾਟਕ "ਜੀ ਆਇਆ" ਕਰਵਾਇਆ ਗਿਆ ਸੀ। ਜਿਸ ਨੂੰ ਜਲਾਲਾਬਾਦ ਦੇ ਸਰੋਤਿਆਂ ਵੱਲੋਂ ਬਾਖੂਬ ਸਲਾਹਿਆ ਗਿਆ ਸੀ ਅਤੇ ਉਨਾਂ ਦੀ ਮੰਗ ਸੀ ਕਿ ਅਜਿਹਾ ਨਾਟਕ ਹੀ ਦੁਬਾਰਾ ਕਰਵਾਇਆ ਜਾਵੇ, ਅਸੀਂ ਵੀ ਦਰਸ਼ਕਾਂ ਦੀਆਂ ਉਮੀਦਾਂ ਉੱਪਰ ਖਰਾ ਉਤਰਨਾ ਚਾਹੁੰਦੇ ਸੀ। ਇਸ ਲਈ ਅਸੀਂ ਲੇਖਕ ਕਸ਼ਮੀਰ ਸਿੰਘ ਲੂਣਾ ਦੇ ਨਾਟਕ "ਜਨਕ' ਦੀ ਚੋਣ ਕੀਤੀ ਗਈ।
ਇਸ ਦੇ ਡਾਇਰੈਕਟਰ ਹਨੀ ਉਤਰੇਜਾ ਹਨ ਅਤੇ ਨਾਟਕ ਵਿੱਚ ਸੰਗੀਤ ਕੁਲਜੀਤ ਭੱਟੀ ਵੱਲੋਂ ਦਿੱਤਾ ਗਿਆ ਹੈ। ਇਸ ਨਾਟਕ ਦਾ ਮੇਨ ਰੋਲ ਹਨੀ ਉਤਰੇਜਾ ਅਤੇ ਗੁਲਜਿੰਦਰ ਕੌਰ ਦੇ ਨਾਲ ਤਾਨੀਆ ਮਨਚੰਦਾ ਵੱਲੋਂ ਬਾਖੂਬੀ ਨਿਭਾਇਆ ਗਿਆ। ਇਸ ਨਾਟਕ ਦੇ ਅੰਤ ਵਿੱਚ ਦਰਸ਼ਕਾਂ ਨੇ ਤਾੜੀਆਂ ਨਾਲ ਸਾਡਾ ਹੌਸਲਾ ਹੋਰ ਵੀ ਵਧਾ ਦਿੱਤਾ।
