ਜਲੰਧਰ ਚ ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਦੇ ਨਾਂ ਉਤੇ ਫਿਰੌਤੀ ਮੰਗਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਗੈਂਗਸਟਰਾਂ ਦੇ ਨਾਂ 'ਤੇ ਫਿਰੌਤੀਆਂ ਦਾ ਸਿਲਸਿਲਾ ਰੁਕਣ ਦਾ ਨਾਂ ਨਹੀਂ ਲੈ ਰਿਹਾ। ਦੱਸ ਦੇਈਏ ਕਿ ਇਹ ਮਾਮਲਾ ਫਿਲੌਰ ਤੋਂ ਸਾਹਮਣੇ ਆਇਆ ਹੈ, ਜਿੱਥੇ ਇਕ ਵਪਾਰੀ ਕਮ ਆੜਤੀ ਤੋਂ ਗੈਂਗਸਟਰ ਲਾਰੈਂਸ ਦੇ ਨਾਂ 'ਤੇ ਫੋਨ ਰਾਹੀਂ 25 ਲੱਖ ਰੁਪਏ ਦੀ ਫਿਰੌਤੀ ਮੰਗੀ ਗਈ। ਇਸ ਦੌਰਾਨ ਗੈਂਗਸਟਰ ਨੇ ਗੋਲੀ ਮਾਰਨ ਦੀ ਧਮਕੀ ਵੀ ਦਿੱਤੀ ਹੈ।
ਪੁਲਸ ਨੂੰ ਦਿੱਤੀ ਸ਼ਿਕਾਇਤ
ਪੀੜਤ ਨੇ ਗੈਂਗਸਟਰ ਵੱਲੋਂ ਫਿਰੌਤੀ ਦੀ ਸ਼ਿਕਾਇਤ ਫਿਲੌਰ ਪੁਲਸ ਅਤੇ ਜਲੰਧਰ ਦੇਹਾਤ ਪੁਲਸ ਦੇ ਡੀਐਸਪੀ ਫਿਲੌਰ ਸਵਰਨਜੀਤ ਸਿੰਘ ਨੂੰ ਦਿੱਤੀ ਹੈ। ਏਜੰਟ ਸਚਿਨ ਅਗਰਵਾਲ ਨੇ ਦੱਸਿਆ ਕਿ ਉਸ ਦੇ ਸੈਫਾਬਾਦ ਵਿੱਚ ਆਈਸ ਫੈਕਟਰੀ, ਲੁਧਿਆਣਾ ਵਿੱਚ ਕਮਰਸ਼ੀਅਲ ਕੰਪਿਊਟਰ ਵੇ-ਬ੍ਰਿਜ ਅਤੇ ਫਿਲੌਰ ਦੀ ਅਨਾਜ ਮੰਡੀ ਵਿੱਚ ਆੜ੍ਹਤ ਹੈ। ਉਸ ਨੂੰ ਫੋਨ ’ਤੇ ਧਮਕੀਆਂ ਦੇਣ ਵਾਲੇ ਵਿਅਕਤੀ ਨੂੰ ਉਸ ਦੇ ਸਮੁੱਚੇ ਕਾਰੋਬਾਰ ਦੀ ਜਾਣਕਾਰੀ ਸੀ। ਪੁਲਸ ਨੂੰ ਸ਼ਿਕਾਇਤ ਦਿੰਦੇ ਹੋਏ ਸਚਿਨ ਨੇ ਦੱਸਿਆ ਕਿ 21 ਜੁਲਾਈ ਨੂੰ ਉਹ ਪਿੰਡ ਸੈਫਾਬਾਦ ਸਥਿਤ ਆਈਸ ਫੈਕਟਰੀ 'ਚ ਸੀ, ਜਦੋਂ ਸ਼ਾਮ 4 ਵਜੇ ਦੇ ਕਰੀਬ ਉਸ ਨੂੰ ਇਕ ਵਿਦੇਸ਼ੀ ਨੰਬਰ ਤੋਂ ਵਟਸਐਪ ਕਾਲ ਆਈ, ਜਿਸ 'ਚ ਆਵਾਜ਼ ਸਾਫ ਨਾ ਹੋਣ ਕਾਰਨ ਨੈੱਟਵਰਕ ਸਮੱਸਿਆ ਸੀ।
25 ਲੱਖ ਰੁਪਏ ਦੀ ਮੰਗੀ ਫਿਰੌਤੀ
ਪੀੜਤ ਕਾਰੋਬਾਰੀ ਨੇ ਦੱਸਿਆ ਕਿ ਉਸ ਨੂੰ ਦੁਬਈ ਦੇ ਇੱਕ ਨੰਬਰ ਤੋਂ ਕਾਲ ਆਈ ਸੀ। ਕਾਰੋਬਾਰੀ ਨੂੰ ਧਮਕੀ ਦਿੰਦੇ ਹੋਏ ਗੈਂਗਸਟਰ ਨੇ ਕਿਹਾ ਕਿ "ਤੁਹਾਨੂੰ ਲਾਰੈਂਸ ਬਾਈ ਦਾ ਸੁਨੇਹਾ ਹੈ, ਅਸੀਂ ਪਿਛਲੇ 6 ਮਹੀਨਿਆਂ ਤੋਂ ਰੇਕੀ ਕਰ ਰਹੇ ਹਾਂ। ਪਿਸਤੌਲ ਦੀ ਗੋਲੀ 'ਤੇ ਤੁਹਾਡਾ ਨਾਂ ਲਿਖਿਆ ਹੋਇਆ ਹੈ। 25 ਲੱਖ ਰੁਪਏ ਤਿਆਰ ਰੱਖੋ। ਅਖੀਰ ਵਿਚ ਉਕਤ ਗੈਂਗਸਟਰ ਨੇ ਰਾਮ-ਰਾਮ ਕਿਹਾ ਤੇ ਫੋਨ ਕੱਟ ਦਿੱਤਾ।
ਛੇ ਮਹੀਨਿਆਂ ਤੋਂ ਕੀਤੀ ਜਾ ਰਹੀ ਸੀ ਰੇਕੀ
ਕਾਰੋਬਾਰੀ ਅਗਰਵਾਲ ਨੇ ਦੱਸਿਆ ਕਿ ਕਿਸੇ ਕਾਰਨ ਉਹ ਤਿੰਨ ਵਾਰ ਫ਼ੋਨ ਦਾ ਜਵਾਬ ਨਹੀਂ ਦੇ ਸਕਿਆ। ਪਰ ਜਦੋਂ 4:11 ਵਜੇ ਚੌਥੀ ਵਾਰ ਫੋਨ ਦੀ ਘੰਟੀ ਵੱਜੀ ਤਾਂ ਉਸ ਨੇ ਫੋਨ ਚੁੱਕਿਆ। ਫੋਨ ਕਰਨ ਵਾਲੇ ਨੇ ਕਿਹਾ ਕਿ ਤੁਸੀਂ ਸਚਿਨ ਅਗਰਵਾਲ ਹੋ, ਲਾਰੈਂਸ ਬਿਸ਼ਨੋਈ ਦਾ 25 ਲੱਖ ਰੁਪਏ ਤਿਆਰ ਰੱਖਣ ਦਾ ਸੁਨੇਹਾ ਆਇਆ ਹੈ। ਅਸੀਂ ਛੇ ਮਹੀਨਿਆਂ ਤੋਂ ਤੁਹਾਡੀ ਰੇਕੀ ਕਰ ਰਹੇ ਹਾਂ। ਅਸੀਂ ਤੁਹਾਡੇ ਬਾਰੇ ਸਿਰਫ ਇਹ ਜਾਣਦੇ ਹਾਂ ਕਿ ਤੁਹਾਡੇ ਕੋਲ ਹਾਈਵੇਅ 'ਤੇ ਇੱਕ ਬਰਫ਼ ਦੀ ਫੈਕਟਰੀ ਅਤੇ ਇੱਕ ਕਾਂਟਾ ਹੈ। ਤੁਹਾਨੂੰ ਬਹੁਤੇ ਹੁਸ਼ਿਆਰ ਹੋਣ ਦੀ ਲੋੜ ਨਹੀਂ, ਗੋਲੀ ਤੁਹਾਡੇ ਲਈ ਤਿਆਰ ਹੈ, ਜਦੋਂ 25 ਲੱਖ ਰੁਪਏ ਤਿਆਰ ਹੋ ਜਾਣ ਤਾਂ ਇਸ ਨੰਬਰ 'ਤੇ ਕਾਲ ਕਰੋ ਅਤੇ ਰਾਮ-ਰਾਮ ਕਹਿ ਕੇ ਫ਼ੋਨ ਕੱਟ ਦਿਓ।