ਜਲੰਧਰ ਪੁਲਸ ਨੂੰ ਅੱਜ 10 ਨਵੀਆਂ ਮਹਿੰਦਰਾ ਬੋਲੇਰੋ ਨੀਓ SUV ਗੱਡੀਆਂ ਮਿਲੀਆਂ ਹਨ। ਇਨ੍ਹਾਂ ਵਾਹਨਾਂ ਨੂੰ ਸ਼ਹਿਰ ਦੇ 10 ਥਾਣਿਆਂ ਵਿਚ ਭੇਜ ਦਿੱਤਾ ਹੈ। ਪੁਲਸ ਕਮਿਸ਼ਨਰ ਸਵਪਨ ਸ਼ਰਮਾ ਨੇ ਖੁਦ ਇਨ੍ਹਾਂ ਵਾਹਨਾਂ ਨੂੰ ਹਰੀ ਝੰਡੀ ਦਿੱਤੀ। ਉਨ੍ਹਾਂ ਕਿਹਾ ਕਿ ਨਵੇਂ ਵਾਹਨਾਂ ਦੇ ਆਉਣ ਨਾਲ ਜਲੰਧਰ ਪੁਲਸ ਹੁਣ ਹਾਈਟੈੱਕ ਹੋ ਗਈ ਹੈ।
ਸ਼ਹਿਰ ਦੇ ਲੋਕਾਂ ਦੀ ਸਹੂਲਤ ਲਈ ਵਾਹਨ
ਪੁਲਸ ਕਮਿਸ਼ਨਰ ਸਵਪਨ ਸ਼ਰਮਾ ਨੇ ਕਿਹਾ ਕਿ ਇਸ ਪਹਿਲ ਦਾ ਉਦੇਸ਼ ਕਿਸੇ ਵੀ ਤਰ੍ਹਾਂ ਦੀ ਮੁਸ਼ਕਲ ਸਥਿਤੀ ਵਿੱਚ ਲੋਕਾਂ ਦੀ ਮਦਦ ਕਰਨਾ ਹੈ। ਹਾਈਟੈਕ ਵਾਹਨ ਪੁਲਸ ਨੂੰ ਕਿਸੇ ਵੀ ਕ੍ਰਾਈਮ ਸੀਨ/ਘਟਨਾ 'ਤੇ ਤੁਰੰਤ ਕਾਰਵਾਈ ਕਰਨ ਦੇ ਯੋਗ ਬਣਾਉਣਗੇ। ਇਹ ਕਦਮ ਸ਼ਹਿਰ ਦੇ ਲੋਕਾਂ ਦੀ ਸਹੂਲਤ ਲਈ ਪੁਲਸ ਦੇ ਆਧੁਨਿਕੀਕਰਨ ਤੇ ਨਵੀਨੀਕਰਨ ਵੱਲ ਇੱਕ ਹੋਰ ਕਦਮ ਹੈ।
ਨਵੇਂ ਅਪਗ੍ਰੇਡ ਨਾਲ ਪੁਲਸ ਪਹਿਲਾਂ ਨਾਲੋਂ ਬਿਹਤਰ
ਉਨ੍ਹਾਂ ਅੱਗੇ ਕਿਹਾ ਕਿ ਇਸ ਅਪਗ੍ਰੇਡ ਨਾਲ ਪੁਲਸ ਹੁਣ ਕਿਸੇ ਵੀ ਸਥਿਤੀ ਨਾਲ ਨਜਿੱਠਣ ਲਈ ਪਹਿਲਾਂ ਨਾਲੋਂ ਬਿਹਤਰ ਤਿਆਰ ਹੈ। ਟ੍ਰੈਫਿਕ ਸਟਾਫ ਅਤੇ ਪੀਸੀਆਰ ਸਟਾਫ ਨੂੰ ਐਮਰਜੈਂਸੀ ਰਿਸਪਾਂਸ ਸਿਸਟਮ (ERS) ਵਿੱਚ ਮਿਲਾ ਦਿੱਤਾ ਗਿਆ ਹੈ। ਇਸ ਤੋਂ ਇਲਾਵਾ ਈਆਰਐਸ ਵਿੱਚ ਤਾਇਨਾਤ ਕਰਮਚਾਰੀਆਂ ਨੂੰ ਮੋਢੇ ਵਾਲੇ ਬੈਜ ਜਾਰੀ ਕੀਤੇ ਗਏ ਹਨ, ਜੋ ਉਨ੍ਹਾਂ ਨੂੰ ਦੂਰੋਂ ਹੀ ਵੱਖਰੀ ਪਛਾਣ ਦਿਵਾਉਣ ਵਿੱਚ ਮਦਦ ਕਰਦੇ ਹਨ।
ਇਨ੍ਹਾਂ ਥਾਣਿਆਂ ਨੂੰ ਮਿਲੇ ਨਵੇਂ ਵਾਹਨ
ਪੁਲਸ ਕਮਿਸ਼ਨਰ ਨੇ ਦੱਸਿਆ ਕਿ ਇਹ ਵਾਹਨ ਸ਼ਹਿਰ ਦੇ 10 ਥਾਣਿਆਂ ਨੂੰ ਦਿੱਤੇ ਗਏ ਹਨ, ਜਿਸ ਵਿੱਚ ਥਾਣਾ ਡਿਵੀਜ਼ਨ ਨੰਬਰ 1, ਡਿਵੀਜ਼ਨ ਨੰਬਰ 2, ਡਿਵੀਜ਼ਨ ਨੰਬਰ 3, ਡਿਵੀਜ਼ਨ ਨੰਬਰ 4, ਡਿਵੀਜ਼ਨ ਨੰਬਰ 6, ਡਿਵੀਜ਼ਨ 7, ਥਾਣਾ ਨਵੀਂ ਬਾਰਾਦਰੀ, ਭਾਰਗੋ ਕੈਂਪ, ਜਲੰਧਰ ਕੈਂਟ ਅਤੇ ਬਸਤੀ ਬਾਵਾ ਖੇਲ ਸ਼ਾਮਲ ਹਨ।