ਪੈਰਿਸ ਓਲੰਪਿਕ 2024 ਵਿੱਚ ਭਾਰਤੀ ਹਾਕੀ ਟੀਮ ਨੇ ਜਿੱਤ ਨਾਲ ਸ਼ਾਨਦਾਰ ਸ਼ੁਰੂਆਤ ਕੀਤੀ। ਇਹ ਮੈਚ ਰੋਮਾਂਚ ਭਰਿਆ ਰਿਹਾ। ਓਲੰਪਿਕ 2024 ਦੇ ਹਾਕੀ ਮੁਕਾਬਲੇ ਵਿੱਚ ਭਾਰਤ ਦਾ ਪਹਿਲਾ ਮੈਚ ਨਿਊਜ਼ੀਲੈਂਡ ਨਾਲ ਸੀ, ਜੋ ਕਿ ਭਾਰਤ ਨੇ 3-2 ਨਾਲ ਜਿੱਤ ਲਿਆ।
ਸ਼ੁਰੂਆਤੀ ਮਿੰਟਾਂ 'ਚ ਰਿਹਾ ਨਿਊਜ਼ੀਲੈਂਡ ਦਾ ਦਬਦਬਾ
ਨਿਊਜ਼ੀਲੈਂਡ ਨੇ ਪਹਿਲੇ ਕੁਆਰਟਰ ’ਚ ਗੋਲ ਕਰ ਕੇ ਲੀਡ ਹਾਸਲ ਕਰ ਲਈ ਸੀ ਪਰ ਭਾਰਤ ਦੇ ਫ਼ਾਰਵਰਡ ਮਨਦੀਪ ਸਿੰਘ ਨੇ ਦੂਜੇ ਕੁਆਰਟਰ ’ਚ ਗੋਲ ਕਰ ਕੇ ਸਕੋਰ ਬਰਾਬਰ ਕੀਤਾ। ਸ਼ੁਰੂਆਤੀ ਮਿੰਟਾਂ 'ਚ ਨਿਊਜ਼ੀਲੈਂਡ ਦਾ ਦਬਦਬਾ ਰਿਹਾ।
ਹਾਫ ਟਾਈਮ ਤੱਕ ਭਾਰਤ ਨਿਊਜ਼ੀਲੈਂਡ ਨਾਲ 1-1 ਦੀ ਬਰਾਬਰੀ
ਦੂਜੇ ਕੁਆਰਟਰ ਵਿੱਚ ਭਾਰਤ ਨੇ ਆਪਣੀ ਰਣਨੀਤੀ ਬਦਲੀ ਅਤੇ ਤੇਜ਼ ਖੇਡਿਆ। ਨਤੀਜੇ ਵਜੋਂ ਭਾਰਤ ਨੂੰ 24ਵੇਂ ਮਿੰਟ ਵਿੱਚ ਪੈਨਲਟੀ ਕਾਰਨਰ ’ਤੇ ਗੋਲ ਮਿਲਿਆ। ਹਾਲਾਂਕਿ ਨਿਊਜ਼ੀਲੈਂਡ ਨੇ ਰੈਫਰੀ ਤੋਂ ਸਮੀਖਿਆ ਮੰਗੀ ਪਰ ਉਹ ਅਸਫਲ ਰਹੇ, ਜਿਸ ਤੋਂ ਬਾਅਦ ਹਾਫ ਟਾਈਮ ਤੱਕ ਭਾਰਤ ਨਿਊਜ਼ੀਲੈਂਡ ਨਾਲ 1-1 ਦੀ ਬਰਾਬਰੀ ਕਰਨ ਵਿੱਚ ਸਫਲ ਰਿਹਾ।
ਭਾਰਤ ਤੀਜੇ ਕੁਆਰਟਰ ਵਿੱਚ 2-1 ਦੀ ਬੜ੍ਹਤ ਬਣਾਉਣ ਵਿੱਚ ਕਾਮਯਾਬ ਰਿਹਾ
ਅੱਧੇ ਸਮੇਂ ਤੋਂ ਤੁਰੰਤ ਬਾਅਦ 34ਵੇਂ ਮਿੰਟ ਵਿੱਚ ਮਿਡਫੀਲਡਰ ਵਿਵੇਕ ਸਾਗਰ ਪ੍ਰਸਾਦ ਨੇ ਨੇੜੇ ਤੋਂ ਗੋਲ ਕਰ ਕੇ ਭਾਰਤ ਨੂੰ ਬੜ੍ਹਤ ਦਿਵਾਈ। ਤੀਜੇ ਕੁਆਰਟਰ ਵਿੱਚ ਨਿਊਜ਼ੀਲੈਂਡ ਨੂੰ ਪੰਜ ਪੈਨਲਟੀ ਕਾਰਨਰ ਮਿਲੇ, ਪਰ ਸ੍ਰੀਜੇਸ਼ ਕੰਧ ਵਾਂਗ ਖੜ੍ਹਾ ਰਿਹਾ ਅਤੇ ਨਿਊਜ਼ੀਲੈਂਡ ਦੇ ਸਾਰੇ ਪੰਜ ਪੈਨਲਟੀ ਕਾਰਨਰ ਗੋਲ ਵਿੱਚ ਤਬਦੀਲ ਨਹੀਂ ਹੋਣ ਦਿੱਤੇ। ਜਿਸ ਤੋਂ ਬਾਅਦ ਭਾਰਤ ਤੀਜੇ ਕੁਆਰਟਰ ਵਿੱਚ 2-1 ਦੀ ਬੜ੍ਹਤ ਬਣਾਉਣ ਵਿੱਚ ਕਾਮਯਾਬ ਰਿਹਾ।
ਰੋਮਾਂਚਕ ਰਿਹਾ ਚੌਥਾ ਕੁਆਰਟਰ
ਚੌਥੇ ਕੁਆਰਟਰ 'ਚ ਭਾਰਤ ਦੇ ਮਜ਼ਬੂਤ ਡਿਫੈਂਸ ਦੇ ਬਾਵਜੂਦ ਸ਼੍ਰੀਜੇਸ਼ ਰੀਬਾਉਂਡ ਨੂੰ ਕਲੀਅਰ ਨਹੀਂ ਕਰ ਸਕੇ, ਜਿਸ ਕਾਰਨ ਨਿਊਜ਼ੀਲੈਂਡ ਨੇ ਸਕੋਰ ਬਰਾਬਰ ਕਰ ਲਿਆ। ਅਜਿਹਾ ਲੱਗ ਰਿਹਾ ਸੀ ਕਿ ਮੈਚ ਡਰਾਅ ਵੱਲ ਵਧ ਰਿਹਾ ਹੈ ਪਰ 59ਵੇਂ ਮਿੰਟ 'ਚ ਨਿਊਜ਼ੀਲੈਂਡ ਵੱਲੋਂ ਫਾਊਲ ਕਰਨ 'ਤੇ ਭਾਰਤ ਨੂੰ ਪੈਨਲਟੀ ਸਟ੍ਰੋਕ ਮਿਲਿਆ। ਕਪਤਾਨ ਹਰਮਨਪ੍ਰੀਤ ਸਿੰਘ ਨੇ ਇਸ ਮੌਕੇ ਦਾ ਫਾਇਦਾ ਉਠਾਉਂਦੇ ਹੋਏ ਗੋਲ ਕਰ ਕੇ ਭਾਰਤ ਨੂੰ 3-2 ਨਾਲ ਜਿੱਤ ਦਿਵਾਈ।
ਭਾਰਤ ਦਾ ਅਗਲਾ ਮੈਚ ਅਰਜਨਟੀਨਾ ਨਾਲ
ਭਾਰਤ ਹੁਣ ਪੂਲ ਬੀ 'ਚ ਤੀਜੇ ਸਥਾਨ 'ਤੇ ਹੈ, ਜਦਕਿ ਬੈਲਜੀਅਮ ਅਤੇ ਆਸਟ੍ਰੇਲੀਆ ਪਹਿਲੇ ਅਤੇ ਦੂਜੇ ਸਥਾਨ 'ਤੇ ਹਨ। ਭਾਰਤ ਦਾ ਅਗਲਾ ਮੈਚ 29 ਜੁਲਾਈ ਨੂੰ ਅਰਜਨਟੀਨਾ ਨਾਲ ਹੋਵੇਗਾ। ਪੂਲ ਬੀ ਦੀਆਂ ਚੋਟੀ ਦੀਆਂ ਚਾਰ ਟੀਮਾਂ ਕੁਆਰਟਰ ਫਾਈਨਲ ਵਿੱਚ ਪਹੁੰਚਣਗੀਆਂ।